YUHANI 9

I Miri Yehu na-pamàlaru-ya na madedi poki hi nangita

1Nu ba talànga lakuna i Yehu, naita-ya na haàtu tau na mapoki welingu la kambu. 2Ka paàra-danyaka i Yehu paraï da papanau-na, “Màla Umbu Ngguru, ka nggikina duna na tau yiana hi nadedi mangu pokingu? Ruku njala wiki-mana ihu jàka ndia ruku njala inana amana?” wàdanya.

3Nanapa-ya i Yehu, “Nda ruku njala wiki-ana dàngu nda ruku njala ina ama-mbuna hi kiri pokina, tàka màta ka peku ita-nanya tau na paràma-na na mbihana i Ala lai nyuna. 4Ba naharii-ipa, taràma-maha bàdi da paràma-na Nyuna na ma-palewa-ka Nyungga. Maa ba nàmunya na rudungu, hi nda peku ràma-anapa na tau. 5Ba ninggapa la pinu tana, jiaka Nyungga paharii wàna na pinu tana,” wànanja.

6Ba nahàla-ka papanii tuna nu, pangànji-nanyaka la tana i Yehu, hi na-haüru-nya tana na wai pangànji-na. Hàlaka nu hi naperi-nya nuna na tana la wua matana nuna na tau, 7hi napanii-nya, “Luawa kau baha matamu la Ngia Paihu Hiluamu,” wànanya. (Hiluamu ba wàna na ‘Papalewa’ wànda la hilunda.) Ka laku-nanyaka pabaha matana nuna na tau. Ba nabeli-yaka, mbàda ita-naka.

8Da angu kotaku-na dàngu da tau matanda-ya ba nakarai pa-ndemangu, dapanii ndàba, “Ka nda jiaya yia na tau na makàli mandapu ba nakarai pandemangu?” wàda.

9“Jia-mayaka” wàda hawiangu. Tàka hawiangui, “Ndia-a, nda jia-aya pahama mata-adanya,” wàda.

Tàka napanii wikina nuna na tau, “Jia-makaka,” wàna.

10“Nggiki hama biana hi jia ita biamu?” wàdanya.

11Nanapa-ya nyuna, “Na tau na ma tamungu Yehu, na-uraku hakudu kapihaku, hi naperi-nja da wua matanggu. ‘Luawa kau baha matamu la Ngia Paihu Hiluamu,’ wànangga. Tàka hi kulaku. Tàka nu ba kubaha-ka matanggu, peku ita-ngguka,” wàna.

12“Nggiya nu na tau?” wàda na paàra-danya.

“Nda kupi-anya,” wàna ba nahema.

Da tau Parihi da kanuturu-ya na ngera màlaru-na nu na tau mapoki

13-14Nu lodu Hangahu-ya ba jiaya na-haüru-nanya tana na wai pangànji-na i Yehu pa-pabula wànja da matana nu na tau mapoki. Tàka nu na tau na mapoki da-karia-nya la tau Parihi. 15Da-paàra-mbunya paraï da tau Parihi jàka nggiki hama biana hi kiri itana. Nanapa-ya nyuna, “Natunja kapihaku da wua matanggu hàla hi kubaha-ha tàka hi kuita,” wànanja.

16Dapanii hawiangu da tau Parihi, “Nda jia welina lai Ala-a nu na tau na mawunda-ya yiana, maa ba nda na-wàrihu-duya na lodu Hangahu,” wàda.

Tàka dapanii hawiangu, “Nggiki hama pekuna-kaka na tau na manjala pawunda-ha da pa-hangàtarungu tungu yia?” wàdai. Ka tumbu-duna-nyaka na pahili kanandingu dua wikida.

17Ka hili paàra-danyaka nuna na tau paraï da tau Parihi, “Màla nggikina wàmuka nyumu rukuna nu na tau na ma-pamàlaru-kau hi peku itamu?” wàdanya.

“Wunangu-ya, wànggu,” wàna nu na tau.

18Tàka da liku uru Yahundi, nda dawai-aya ba napoki làti hi na-pabulangu nàhu. Tuna nuduka hi dapaau-nja da inana da amana, 19hi da-paàra-nja, “Deningu-na dimi ba jiaya na anami yiana na madedi ngàndi pokina ba wàmi? Nggiki hama biana hi naita nàhu?” wàdanja.

20Dahema da inana da amana, “Deningu-mana, jia-maya duma yiana na anama; dàngu poki welina ba nadedi-maka. 21Tàka jàka nggiki hamana hi jia ita biana nàhu, nda mapi-anya duma. Dàngu jàka nggamu ma-pamàlaru-ya hi naita, nda mapi-mbunya. Paàra bianya nyuna, ba matua-madu-nanyaka; peku hema wiki-mana duna,” wàda. 22Hi kiri panii tuda nu da inana da amana, mangàdatu-danja da liku uru Yahundi; nadu ba mbàda pa-hamangu-madaka, na tau na mapeka ba Hanganji Ma-pamànangu-ya i Yehu, àmbu natama-dupa la uma bungguru, mbàda wàda-maka. 23Tuna nuduka hi kiri paniida da inana da amana nu na tau, “Matua-mana-nyaka; paàra bianya nyuna,” hi kiri wàda.

24Ka hili paau-danyaka na tau na mapoki la wungana, hi dapanii-nya, “Harangu-wa nàhu bau wàngu ma-padeningu la kareuku-mu taï. Mapi-manya ba tau njalaya nuna na tau,” wàdanya.

25“Jàka nanjala jàka ndia, nda kupi-anya duku,” wàna na hemana nuna na tau. “Na nyuna hangia-na na papinggu; làti kupoki, tàka nàhu kuita-ka,” wànanja.

26Ka hili paàra-danyaka nuna na tau, “Wàngu panggiki-nanggau? Nggiki bia-nanja da matamu hiu ita,” wàdanya.

27Nahema nu na tau, “Mbàda panii-madu-nggunggai-nyaka, tàka ndai bihua parongu. Ka nggikina hii hili mbuhangu parongu-ya nàhu? Ka mbuhangu-minya ihu panjadi papanau-mbuna?” wànanja.

28Ka pa-iraku-danyaka hi dapanii, “Nyumuka dumu ka papanau-nanggau; nyuma duma ndia-a. Papanau-na i Muha-kama duma. 29Mapii-manya ba mbàda panii-naka i Ala lai Muha. Tàka na tau nuna, nda mapi-anya jàka nggi ngia paweli-na,” wàdanya.

30Nahema nu na tau, “Ai, ku-hangàtaru-nggai nyimi yia ba ndai pinya na ngia paweli-na, tàka hi mbàda pahàmu pàku-nangga hi kuita. 31Tapi-manya ba nda narongu niaya na tau njala duna i Miri, mbulungu-ana na tau na matembi-ya i Ala dàngu na ma-pahàra-nya na pambuha-na. 32Weli mulangu ndedi parongu-a ba ningu tau ma-pahàmu mata tau madedi poki hi naita. 33Jàka nda welina lai Ala na tau nuna, nda ana nggàra-a pawunda-na,” wàna.

34Tàka nyuda, “Nggàra wàmu?” wàda. “Yii nyumu pàku naa ma bundungu njalamu piti welingu bau dedi, ka ku-papeka-nja wàmu-nggamaka nu?” wàdanya.

Nu ba tuna piti welingu la rehi nu dahiri-nya nyuna patama la uma bungguru.

Na poki la ngera ndewa

35Ka rongu-nanyaka i Yehu ba mbàda hàpi-danyaka na tau nuna welingu la uma bungguru. Ka himbu-nanyaka hi napanii-nya, “Uwai-duya na Ana Tau?” wànanya.

36Nahema nu na tau, “Nggamuya nu, Umbu? Peka àru-ngganya làti Umbu ka kuwaiya,” wànanya.

37Nanapa-ya i Yehu, “Mbàda ita mamu-nyaka. Jiaya Nyuna-maka na mapanii-danggau nàhu,” wànanya.

38“Kupawai-ma duku ou Miri,” wàna nu na tau, hi na-marubuku la hanggana i Yehu.

39Tàka i Yehu, “Namainggu la pinu tana yiana jiaya la pa-patandangu ngera; màtawa na tau na mapoki ka naita, tàka na tau na maita ka napoki,” wàna.

40Da tau Parihi da manda pirada lai nu darongu-ya ba panii tuna nu i Yehu, ka paàra-danyaka, “Dapoki-mbu nyuda wàmu-nggamaka nu?” wàdanya.

41Nahema i Yehu, “Ngera hama tuna jàka poki-minya làti, nda ningua njalami. Na nyuna rukuna na paniimi, ‘Maita-ma duma’ ba wàmi pa-daingu dimi-nyapa la njala,” wànanja.

Currently Selected:

YUHANI 9: KAM

Highlight

Copy