DEDI 37

I Yuhupu dàngu da anguna paluhu

1I Yakupu pa-daingu-nanyaka la tana Kanaàngu, ngia pa-ngiangu-na na amana, 2dàngu yiana-yaka na rukuda da ihi kuru umana i Yakupu:

Ba hakambulu pihu mbua ndau-naka na ndau lurina i Yuhupu anana i Yakupu na-paloku dànjaha da kabàba mbimbi kamàmbi da ayana nu da anana i Mbiluha dàngu i Hilipa da kala wihina na amana. Da pawunda-da da ma-akatu da ayana napanii-ha la amana.

3I Yakupu narihi mbuhanya i Yuhupu welingu la anana hawiangu, nadu ba nadedi i Yuhupu ba mbàda kaweda-mànaka na amana. La hau na lodu na-pandoi-nya i Yuhupu hawàla kalembi bokulu ma-kanjupu manandangu-ya.#kalembi bokulu ma-kanjupu manandangu-ya; jàka ndia: kalembi bokulu mamalai limana. 4Ba daita-yaka paraï da ayana ba narihi mbuha-manyapa i Yuhupu welingu lai nyuda paraïna amada, ka paumbi-danyaka i Yuhupu hi lupa nda da-mbuhangu-mbu papanii pahàmu dànya nyuna.

5La hau na rudungu i Yuhupu na-manggadipangu, tàka ba napeka-yaka nuna na manggadipangu-na la aya-naka, bonjangu-madua-nanyaka na paumbi-danya. 6Yiana-yaka na papanii-na i Yuhupu lai nyuda, “Màla irongu! 7Nyungga ku-manggadipangu, talànga ni ndàbanda la woka ba ta-paingu uhu nggàndumu, wànggu, hi jia hadangu ndolaku biana na paingu-nggu nyungga. Da paingu-mi nyimi da-ndolaku winggiru-nya na paingu-nggu nyungga, hi da-marubuku-nya na paingu-nggu nyungga, wànggu,” wànanja.

8Danapa-ha da ayana, “Bau rekiya, nyumuka nu ma-hanganji dàngu ma-kuaha-kama nyuma?” wàdanya ba dahàngga-nya. Ka manaü paumbi-madua-danyaka rukuda da manggadipangu-na dàngu da panii-naka.

9Tunaka nu hili manggadipangu-nanyai i Yuhupu, hi napanii-nja da ayana, “Nyungga hili manggadipangu-nggunyai. Kuita-ya na matalodu, na wulangu dàngu ba hakambulu hauda da kandunu ba da-marubuku lai nyungga,” wàna.

10Nuna na manggadipangu napanii-mbunya na amana, tàka na amana hi nahàngga-nya, “Nggàra manggadipangu-yaka nu? Bau rekiya, nyungga, na inamu dàngu da angumu paluhu napa mamai pa-patika pa-marubuku-nggau nyumu?” wànanya. 11Da ayana i Yuhupu da-malara-nya eti i Yuhupu, tàka na amana duna pa-daingu pangàda-mananya nuna na manggadipangu.

I Yuhupu ba dangganya hi ngàndiya la Mehiru

12La hau na lodu ba dalaku la Hikimu da ayana i Yuhupu papawa-nja da kabàba mbimbi kamàmbi-na na amada, 13panii-nanyaka i Yakupu lai Yuhupu, “Luawa la Hikimu la ngia papawa-danja da kabàba mbimbi kamàmbi-nda paraï da ayamu,” wànanya. Nahema i Yuhupu, “Wua, ama,” wàna.

14Napaya na amana, “Tàngaru-ha jàka nggàra ulada da ayamu dàngu jàka nggiki da da kabàba mbimbi kamàmbi, hàla beli kau paniingga,” wànanya. Ka puli-nanyaka i Yuhupu palaku, ba na-dunjaku-nya na Lolangu Hemburungu.

Ndedi nggi mandaina tàka-nanyaka i Yuhupu la Hikimu. 15Ba talànga lua kàndana-nyaka na padangu, tàbuku-nanyaka na haàtu na tau mini, na ma-paàranya, “Nggàraya na pahimbu-mu?” wànanya.

16“Da ayanggu. Pawangu-danya kabàba mbimbi kamàmbi, upinya nyumu ama jàka ngginiha?” hi wàna i Yuhupu.

17Napaya na tau nuna, “Hambàda-haka welingu yiahu. Kurongu-ha ba dapanii ka laku la Ndotàngu, wàda,” hi wàna. Ka laku-nanyaka i Yuhupu pandutu-ha da ayana hi natoma-nja la Ndotàngu.

18Welingu la ma-marau daita-ya i Yuhupu, dàngu ba ndedi natàka-nja, mbàda hàla-daka pa-pahamangu la pa-pameti-ya. 19Dapanii dàngga anguda, “Tàngaru, nàmunya-ka na makàli manggadipangu. 20Màla ka ta-pameti-ya ka tapuha-ya na metina la humuru mamàdu. Ka tapanii bia napa ba njàkapu-nanya banda bohu. Ka taita wànya napa jàka nggi - nggiki-daka da manggadipangu-na,” wàda.

21Ba narongu-yaka na pawuku-da paraïna i Rumbingu, himbu-nanyaka wihu ka pamara-ya i Yuhupu, “Àmbu pameti-duya,” wàna. 22“Tawàngu papuha biaya la humuru la maràda telangu yiana, tàka àmbu tawàngu papalu-duya jàka ndia àmbu ta-pamanua-duya,” wàna. Nu hi panii tuna nu ba wuku-nanya pa-pamara-ya i Yuhupu ka paràha-nya pabeli la uma. 23Ba natàka-njaka da ayana nyuna i Yuhupu, wàngu hanggàritu-da da-kalàba-ya na kalembi bokulu-na i Yuhupu na ma-kanjupu manandangu-na.#kalembi bokulu-na ... manandangu-na; jàka ndia: kalembi bokulu mamalai limana. 24Hàla hi daru-ruhuya hi dapuha-ya la humuru mamàdu.

25Ba talànga nganguda hi jia ita bia-daha da pa-jurungu otada da tau Ihimailu da malaku welingu la Nggiliatu hanggangu la Mehiru. Da otada pa-pabukungu rungu dàngu kimihu-ha. 26Ka panii-nanyaka i Yahunda la anguna paluhu-ka, “Nggàra linguna ba ta-pameti-ya na erinda, hi màngu ta-paràpu-ya na pameti-ndanya? 27Màla ka tadangga-nya nyuna la tau Ihimailu nida. Àmbu ta-pajàra-duya. Jiapa ka nggi - nggikina nyuna pa-daingu-mananya ba eri wiki-ndanya,” wàna. Da-patunju-ma da anguna paluhu, 28tàka ba dali ninguka lai nu da tau danggangu Mindiangu,#Mindiangu; Da tau Mindiangu dàngu da tau Ihimailu dadangu-ma da ma-danggangu. Na pawàngu nda pakàli heka-anja. ba mapira-ha, ka padita-danyaka i Yuhupu welingu la humuru paraï da ayana#da ayana; na hilu Imbarani-na: nyuda wàna (da tau Mindiangu). hàla hi dangganya la tau Ihimailu nuda wàngu dua kambulu àmahu bara wilina. Tunaka nu ngàndi-danyaka la Mehiru paraï da nuda da tau danggangu.

29Ba nabeli-ka i Rumbingu nu la humuru dàngu ba nda natoma-nyapa i Yuhupu lai nu, bàriku-nahaka da pakina paraï pa-hawina. 30Nabeli tomaha da anguna paluhu hi napanii, “Nda ni-anyapa na anakeda lai nu! Nggikina wànggu-aka bàdi nàhu?” wàna.

31Hàla hi darupu heu kamàmbi hi dahàbu-ya na kalembi bokulu-na i Yuhupu la wai riana nuna na kamàmbi. 32Tunaka nu hi da-paràhangu palua patuya la amada nuna na kalembi bokulu pa-karia-nya na lii pa-patàka-nya, “Yiana na kalembi bokulu paita-manya. Jiaya ihi yia na manguna na anamu Ama?” wàdanya.

33Natanda-maya paraïna i Yakupu nuna na kalembi bokulu, hi napanii, “Deningu-na jia-maya yiana na kalembi bokulu-na na ananggu! Jiangu-maka duna ba mbàda njàkapu-nanya banda bohu. Ai-inai, na ananggu i Yuhupu nameti-ka ba nahi - hiraya paraïna nuna na banda!” wàna. 34Na-bàriku-ha da pakina i Yakupu paraï pa-hawina tàka hi napaki paki tanda hawina-na. Nda pira mbua lodu biana ba nahii paduduru-nya nuna na anna. 35Mbuu ndàbada da anana, mini kawini damai ndàba pa-panggaüru-ya, tàka nda nabihu-a ka pa-nggaüru-ya, “Lundu kumeti hii pangala-manggunya napa na ananggu,” wàna. Tuna nuduka ba na-hawina pangalangu lumunya i Yuhupu na anana.

36Nu ba tuna, la Mehiru, mbàda dangga-danyaka i Yuhupu paraï da tau Mindiangu lai Potiparu, na haàtu na parawira hanganji na ma-pawai ngaba pa-kapala manggangu uma hanganji.

Currently Selected:

DEDI 37: KAM

Highlight

Copy