DEDI 31

I Yakupu ba napalai welingu lai Lambàngu

1I Yakupu narongu-ha ba dapanii da anana i Lambàngu, “I Yakupu napiti hàla-mahaka da banda manguna na amanda. Mbu ndàbada da pawulu-na welida la amanda nyuta,” wàda. 2I Yakupu naita-mbuyaka i Lambàngu ba nda nahili hawelaru dànya hama tuna la wungana. 3Tàka i MIRI napanii-nya i Yakupu, “Beliwa dumu la tana amamu dàngu la nua kalembimu. Napa Nyungga ku mangga - manggau,” wànanya.

4Hàlaka nu i Yakupu palewa-nanyaka tau pa-paninya i Rahilu dàngu i Lia, la pamai tomaya nyuna la maràda ngia pa-pawangu-na mbimbi kamàmbi-na. 5Napanii-nja paraïna i Yakupu, “Nàhu ba kuita-ya na amami nda nahilu hawelaru da-anggapa hama tuna na-pakàli wàna; na nyuna i Ala na palumu-na na amanggu manggana-padua-nangga. 6Nyimi na bai dua mi-pimbunya nyungga ba kuràma la amami ba lundu diranggu. 7Jiapa-a ba tuna nu mbàda lapi-nanggaka dàngu mbàda pa-hakambulungu-naka pa-panjilu-nja da wundanggu. Na nyuna i Ala nda na-pahia-anya patungga ma-akatu nyungga. 8Ba jiaya na paniina na amami, ‘Da kamàmbi da ma-kadutulu jia-aha da wundamu’ ba wànangga, ka paana ndàba madua-danyaka da kabàba makadutu - kadutulu. Ba napanii-ngga, ‘Da kamàmbi da ma-mbàlangu jia-aha da wundamu’ ba wànangga, ka pa-anangu hàla madua-danyaka ma-mbàlangu da kabàba. 9Tuna nuduka i Ala ba napiti-ha da kabàba banda manguna na amami hi nawua-ngganja nyungga.

10Nu la rehi pa-miningu-da da banda, ku-manggadipangu pangita-ha mbuu ndàbada da bumbu kamàmbi da ma-talànga pa-miningu da-pandàningu, da-kadutu - kadutulu dàngu da mbàlangu. 11Tàka i Ala la hada papalewa, napanii-dàngga nu la manggadipangu, ‘Yakupu!’ wànangga. ‘Ou, MIRI’ hi wànggu. 12Nahili panii na papalewa, ‘Tàngaru, mbuu ndàbada da kamàmbi bumbu da ma-talànga pa-miningu ba da-pandàningu, ba da-kadutulu dàngu ba da-mbàlangu. Wuku-manggu pa-paloku tunggunggau nu nyumu, nadu ba kuita-duyaka mbuu ndàbana na pawunda-na i Lambàngu hanggangu lai nyumu. 13Nyungga maka Ala ma-paitangu wikina lai nyumu la Mbetilu. Lai nu nyumu mbàda pa-nudangu-muka hau watu tanda, bau wàngu paburi-nya mina haitungu la pinuna. Lai numbu nyumu bau patura pa-njanjingu lai Nyungga. Nàhu kamomatu-wa dàngu beliwa la tana ngia padedi-mu,’ ” wànangga.

14Dahema i Lia dàngu i Rahilu, “Nda ningu-apa duma tangguma welingu la pawulu-na i ama pa-kangeha-ma. 15Nyuna ba nareki-kama hama tau hangàdangu-kama. Ba hàla-madu-naka padangga-nggama dàngu jàka nggàraha da pekeina duna rukuna nuna ba mbàda pambuta-mbuna-haka. 16Mbuu ndàbada da pawulu da pambàda pitina i Ala welingu la amama làti ba mangu-madu-manja dàngu ba manguda da ana-madu-manja. Wa bia-nyawa nu jàka nggàra wànanggau i Ala lai nyumu,” wàdanya.

17-18Ka kamomatu-nanyaka i Yakupu la pabeli la amana la tana Kanaàngu. Nawotu-ha da papaha-na dàngu da anana la kajia ota dàngu hi naweli-nja mbuu ndàbada da kabàba mbimbi kamàmbi-na hamanai mbuu ndàbada da pambàda ngalana la Mahupatamia. 19La rehi nuna nyuna i Lambàngu la padangu-ya talànga nggutingu-da wulu mbimbi, nu la rehina nuna-duka i Rahilu ba na-manganga-ya na kahala hada hiwaru kabihu#na kahala hada hiwaru kabihu; Na hilu Imbarani-na: Terafim, jia-duyaka na kahala tau marapu ba hama hada tauya hi lumunya ba hiwaru kabihu-ya ba wàda. manguna na amana. 20I Yakupu na-kahili-ya i Lambàngu ba nda na-paihi-nya na lakuna. 21Napiti hala-maha da banda mangu-naka hi nalaku pare - renggangu. Napala-ya na Luku Epuràtu hi na-hanggangu la ngaba ma-palindingu la Nggiliatu.

I Lambàngu ba nakeha-nya i Yakupu

22Palàngangu tailu mbua lodu hinaka hi ningu mapanii-nya i Lambàngu napalai-ka i Yakupu wàdanya. 23Ka pauhi-nanjaka da tauna i Lambàngu hi da-pakariangu pakeha-nya i Yakupu, pa-làngangu pihu mbua lodu-mapa hi damangu patoma-nya la ngaba ma-palindingu la Nggiliatu. 24Nu la rudungu namai i Ala lai Lambàngu la manggadipangu-na, hi napeka-nya, “Rimangu, màtangu ailulu nyumu la pa-nggànggalu-ya i Yakupu jiapa ka wàngu hau jua-a kareuku,” wànanya. 25La rehi nuna i Yakupu mbàda pandàngi-naka maüna la hau tunduna. Tunaka nu i Lambàngu dàngu da tauna pandàngi-madanyai duda maüda la hili hau tundu la ngabana lai numai.

26Hàlaka nu napanii i Lambàngu lai Yakupu, “Nggikina hiu kahili-ka tàka hiu palai ngàndiha da ananggu hama tuna na tanawangu la pabera? 27Nggikina hiu kahili-ka tàka hi laku winingu bia-munya, màta ka kulaku-wa ba nda ana wàmumbu? Jàkau peka pàku làti lakumu kupuli-manggau duku làti dàngu hàmu etinggu, ba ku-pakaria-nggau ludu, anamongu, lamba hakapapa dàngu jungga! 28Nyumu ndau pahia-ngga la pa-puduku pàkuha da ananggu da umbuku-nggu ka ku-pahewa dànja. Manduba langatàka-ya na palimu nyumu! 29Kumàka-ma duku làti nyungga patunggau ma-akatu, jia-aya kamodu i Ala na palumu-na na amamu na-panau-ngga ka àmbu jia nggànggalu-nggunggau. 30Kupi-manya bau laku tumu nu ba rinjungu-mamu-nyaka pabeli. Tàka nggikina nyumu hiu manganga-ya na kahala hada hiwaru kabihunggu?” wàna.

31Tàka nahema i Yakupu, “Nyungga hi kulaku winingu tunggu nu, mangàdatu-ma-anggunggau Tuya, napa napàtu duha i Tuya da anana,” wànggunggau. 32“Jàka jiaya nu na kahala hada, jàka ningu nu haàtu lai jiahu ngia pahunggu-munya, mambàda manganga-ya, napa nyuna ka huku pameti-ya. Pareha-wa na Tuya napa hi ningu nu malanja-mu lai yiahu. Jàka ningu, piti biaya. Napa da angunda ka da-hakahii ndàbanya,” wàna. I Yakupu duna nda napi-anya ba i Rahilu duna na ma-manganga-ya nuna na kahala hada.

33Ka lua-nanyaka i Lambàngu la maüna i Yakupu pa-linggaru-ya; hàlaka nu la maüna i Lia dàngu la maüda da ata ngàndi da madua, tàka nda nahunggu-aya nuna na kahala hada. Hàla hi natama la maüna i Rahilu. 34Ba talànga tuna nu, nyuna i Rahilu mbàda piti-nanyaka nu na kahala hada hi natuya daa la ndàni hela ota, tàka nyuna wiki hi na-mandapu la pinu hela. I Lambàngu na-linggaru hàlaya na maüna i Rahilu, tàka nda nahunggu-aya nuna na kahala hada. 35Hi napanii i Rahilu la amana, “Àmbu jia mbeni-dumu ama, ba nda peku hadangu-nggu pa-hamburu-kau, nyungga ba talànga tàka-nangga wulanggu,” wànanya. Nahimbu pa-hàmungu-ma i Lambàngu, tàka jia-maya ba nda nahunggu-ya nu na anatau.

36Ka mbeni-nanyaka i Yakupu, “Nggàra-mayaka nu na akatu pawunda-nggu nyungga?” wàna ba na-hawuwatu, “Nggàraya nu na njalanggu hi tuu-inaka na keha-mungga? 37Nàhu bau hàlaka pa-linggaru ndàbaha da malanja-nggu, màla muhunggu-yaka nu na mangumu Tuya? Paluhu-yawa nu kau bànjalu-ya lai yiahu ka pekuna da taunggu nyungga hamanai da taumu nyumu ka daita-ya dàngu ka dabota-ya jàka nggamuya lai nyuta tau madua na ma-mànangu. 38Dua kambulu ndau-ngguka ba ku-engangu lai nyumu Tuya. Da kabàba mbimbi kamàmbi-mu da bonjangu-ka paworu pa-mbàmbaru dàngu ndedi ku-handàkangu-maduku parupu heu ana bumbu kamàmbi-mu welingu la banda pawulu-mu. 39Da mameti da pakau banda bohu nda ku-handàkangu-a pangàndi-nggau nyumu, tàka nyungga wikima duku ma-hiluha. Da pa-manganga lodukai jàka ndia rudungu-kai naingu màna bau karuhi-ka ka kuhilu-ya. 40Nua naingu màna duku ba ku-pambanahungu la lodu dàngu ba kumaringu la rudungu. Dàngu nda kukàli katuda-mbu. 41Tuna nu na ngeranggu nyungga ba kuràma lai nyumu Tuya ba dua kambulu ndau pa-tumbukungu-nggu. Hakambulu patu mbua ndaunggu ba kuràma lai Tuya la pangala-nja da anamu Tuya da madua – dàngu nomu mbua ndaunggu la pangala wànja da kabàba mbimbi kamàmbi-nggu. Dàngu la ngaba mandai tuna numbu ba mu-pahakambulu wundangu la pa-panjilu-nja da wundanggu. 42Làti jàka nda namangga-ngga na Ala boku la mangilu-nggu, na Ala na palumu-da i Ambarahàmu dàngu i Ihàku, jiangu-maka dumu làti Tuya bau paràha-ngga pabeli lima juanggu. Na nyuna i Ala mbàda hamata-nanggaka la handuka-nggu dàngu la paràma-nggu na pambàda paloku-nggu, nu kamodu wuangu-nanyaka botangu-na,” wàna.

Na pa-panjanjingu da i Yakupu dàngu i Lambàngu

43Napaya i Lambàngu lai Yakupu, “Nada da tau kawini madua ananggu-nja; da anada mangunggu nyungga-ha, da kabàba mbimbi mangunggu nyungga-mbuha. Langatàka, mbuu ndàbada da paita-mu lai yiahu nyungga-ma mamangu-nja. Na nyuna ba tuna nda nggi - nggiki-anggu la pa-pamàndu-nja da ana umbuku-nggu. 44Jia-duyaka màlawa ka tatura lii pa-njanjingu ka ta-panunggulungu watu tanda pa-njanjingu-nda,” wànanya.

45Tunaka nu i Yakupu hi napiti hau watu hi na-pandolaku-ya ka tanda panda rombanguya. 46Ka paràha-nanjaka da tauna pa-pauhingu watu hi da-pabundu-nja. Hàlaka nu hi dangangu la lihina nu na pabundu watu. 47I Lambàngu natunya tamuna nuna na pabundu watu Yenggàru-Hahanduta,#Yenggàru-Hahanduta; Na tamu yiana la hilu Aràmu “pabundu watu tanda panda rombangu,” wàna. tàka i Yakupu duna natunya tamuna Nggalitu#Nggalitu; Na tamu yiana la hilu Imbarani “pabundu watu tanda panda rombangu,” wàna. wànanya. 48I Lambàngu napanii-nya i Yakupu, “Yiana na pabundu watu tanda pànda rombangu-ya lai nyuta tau madua,” wànanya. Jia-duyaka na pangia nuna la Nggalitu hi wàdanya. 49Napanii-mbu i Lambàngu, “Màla àru i MIRI ka na-kawàra hamata-ta ba talànga luri pa-maraungu-nda,” wàna. Jia-duyaka na pangia nuna la Mihipa#Mihipa; Na tamu yiana hama linguna na kareuku hilu Imbarani “ngia pa-hamata-ta,” ba wàna. hi wàda-mbunya. 50Nahili panii i Lambàngu, “Nyumu jàka muwunda ma-akatu la ananggu, jàka ndia jàka mupiti kawini hawiangu, jiapa ka nda ningu mapinya, namu-maya ba hamata-nanda padua i Ala. 51Yiada-haka da watu pa-pabundunggu dàngu yiana na watu tanda. 52Yiada da watu pa-pabundungu, hamanai nuna na watu tanda, peka-danda nyuta ka àmbu ku-panggaya yiana na pabundu watu la pahada-nggau nyumu, dàngu nyumui dumu àmbu panggaya yiana na pabundu watu dàngu yiana na watu tanda la pahada-ngga nyungga. 53I Ala na palumu-na i Ambarahàmu dàngu na palumu-na i Nahuru#i Ambarahàmu ... i Nahuru; i Ambarahàmu jiaya na bokuna i Yakupu, tàka i Nahuru jiaya na amana i Lambàngu. na amanggu jia-yaka na manjadi hakimu napa lai nyuta tau madua,” wàna. Ka harangu-nanyaka i Yakupu la parongu-na i Ala na pa-maraku-na i Ihàku na amana, la pa-patutu-nya na njanjina. 54Ka rupu-nanyaka heu banda hi na-maraku wànya dita la pinu palindi. Hi nawànda-ha da tauna la pangangu pa-mataru dànya. Ba da-hàlaka pangangu, todu-danyapa nu la rudungu la pinu palindi. 55Hadangu harii la mbaru, nyuna i Lambàngu puduku-nanjaka da anana da umbuku-na ba na-pahewa danja, hi na pa-kanyuru-nja, ka beli-nanyaka duna la ngia pa-ngiangu-na.

Currently Selected:

DEDI 31: KAM

Highlight

Copy