Lukas 5
5
Is ap hiane wogu legesa a’ge aphwami wogenebil denaga lemagoluk naduk yo’go enebesi wene
(Matius 4:18-22; Markus 1:16-20)
1 #
Mat. 13:1,2; Mrk. 3:9,10; 4:1 Agauwa mesik erlige re, at Yesus ik Genesaret omugwema eba edik oruakma re, aphwami modok a’bik Allah iak enesa’go holuogoluk e’bek odoktu egesa. 2Odokti lagaihwe, is ap hiane wogu legesa a’ge logon ik so ’biren a’ge ik esa’goma poluk e, sum hiane sum hiane wogu legesa a’ge emerugumu il yerentesi. 3Il yerentesirik e, Yesus ebe ik so Simon en a’ge ano ogola ’gwi lagarik e,
“Ik so yu wei nagat hegilogo peraknebi suk o,” oluk, Simon mo’gulesi. Asogo mo’gulotluk, at ebe so ogola huragarik e, aphwami a’bik ebano ik esa’go’gwe oruakma wene mo’gulentesi. 4Arat mo’gulontoluk e, at Yesus en Simon disogo mo’gulesi,
“Hiane a’bik wagup en e, henebe ik ede ’burl ’gela’ge eria loluk sum egeik a’ge ai ’belakpei lit o,” oluk mo’gulentesimu, 5#Yoh. 21:3at Simon en e,
“Nue! Hup hwedik ’belabogwi modok welege a’ge re, mesik modok wo erlak o. A’geat de, hat en mo’gulnigenma en e, an en sum egeik ’bela’bigat o,” oluk 6#Yoh. 21:6asogo mo’gulotluk ’belakpegesa ’gal e, hiane modok a’bik ogola yagaragama onosum ano derlep u ’gela’ge aga. 7Asogo agama, is enarilak ik so mu a’ge mesik ogola welegesa a’ge en lerentaumagoluk, ene’gik map hogulat worlentigisa. Asogo worlentigisema re, is ano wegesarik e, hiane ebano dedilogo re, so mesik ogola yagarogulat, mesik ogola yagarogulat, so ’birenat emde lorophegeik yagatil legesa a’geat de, hiane e’gin en, so ik ogola wokhai yogoluk tegei. 8Asogo tigoluk tegeimu, at Simon ano Yesus ilem odogorlu pam huragarik e,
“Nue e! An wiak taga legi a’ge yu re, yema uknoboluk lak o,” oluk mo’gulesi. 9Hiane a’bik wegesa ai en, at Simon arilak enemin onogorlok egesarik e, asogo mo’gulegisa. 10Ai ’gela’ge, at Simon arilak enemin hwedik a’ge Zebedeus eiyagai Yakobus Yohanes e’birek, asogoat onogorlok agama re, at Yesus en Simon disogo mo’gulesi,
“Hogorlok hagun o. Hiane wasu legen ai ’gela’ge re, hwerli yogodak en e, aphwami wogenebil denaga lorogun ani o,” oluk mo’gulesi. 11Asogo egeimu re, ik so ano ik iak pam pou wegesarik e, di a’ge yu a’ge ’berlegat ukpoluk Yesus e’berlik legesa.
At Yesus en ap mesik ebam hwena’go ’gela’ge oruakma obaptegei wene
(Matius 8:1-4; Markus 1:40-45)
12Asogo legesarikmu en, agauwa mesik erlige re, Yesus o seli mesik lagarik oruakma, ap mesik yebil hwena’go ’gela’ge onogorlok a’ge ebetne a’bik agarik welat, at en Yesus il hesirik e, odogorlu pam hweriogo welat hau weriselat e, disogo mo’gulesi,
“Yesus, nue! Hat en obapnebagun epegen holuk e, elirat obapnoboat o,” oluk mo’gulesi. 13Mo’gulesimu, at Yesus en ap ano e’gik tenak pasulat e,
“Obaphebaigoluk taga legi. Holuk e, op emen o,” oluk, mo’gulosokhwe erianoat, yebil hwena’go ’gela’ge ano modok erlak aga. 14#Ima. 14:1-32Erlak agama, at Yesus en e, disogo mo’gulesi,
“Hat en e,
Yesus en asogo obapnebesi, oluk e, aphwami logon modok mo’gulentagun o. We, ap Allah eiye a’ge en il hiouwagoluk, e’bek laguntik e, disogo tip. At Musa en eselat e,
Aphwami enebam op agai holuk, Allah paget disogo po yo, oluk egei ano hegitsogoat,
Nebam hwena’go ’gela’ge ano erlak agama op egi o, oluk, Allah akhit mesik pasumu pobi hobuagoluk, mesik pei lak,” oluk esa’go wusogo perakpesi.
15Esa’go wusogo perakpesi a’geat de, Yesus en obaptegei a’ge ebano obok sagatil legesema, aphwami a’bik hweligisarik, is di ou yu ou enebam oruak a’ge obabonobuagoluk e, Yesus e’bek modok a’bik odoktu aga legesa. 16Asogo tugukhweat de, at Yesus se’ban igoluk ebe aphwami erlakma o leimu eba lasu laga.
At Yesus en ap mesik e’gik oyuk soborak a’ge obaptegei wene
(Matius 9:1-8; Markus 2:1-12)
17Agauwa mesik erlige re, at Yesus wene mo’gulentasu oruakma, is ap Farisi a’ge emin, Allah iak pelal wogo a’ge mo’gulontogu legesa a’ge emin, onowi o Galilea do’go en, Yudea en, kota Yerusalem en, e’bek wegesarik enesa’go hologo hweriogo oruakma, Nenaik ’gain Onuk Logo a’ge en aphwami ou wiak a’ge Yesus en obabenebise lemagoluk anni wogentasukhwe obabenebise laga. 18Asogo obabenebisoma re, ap mesik e’gik oyuk soborak modok welaga a’ge erlis demak pam ’bourak oruakhwe e yesogo woluk wegesarik e, Yesus ebe olema oruakma ologotma ’belabi ’guogoluk tigisa. 19Asogo tuogoluk tigisa a’geat de, aphwami modok ’beterak oruak en e, ’gesogo woluk ’gu ’gela’geat agama, ap ano o dum pam woluk ligegesarik e, dum hialholuk erlis demogo nogese laga a’ge ano ebe demogo modok oruakhwe aphwami a’bik ebano ene’gerlakma ’burl, at Yesus oruak hegitsogo ologotma ’biasogo ’belakpegesa. 20’Belakpegesema, at Yesus en,
“Is ai enede nebam he’berik pegesarik en woluk wegesa hegi o,” oluk il enagat ontoluk e,
“Nare e! Hat wiak taga legen a’ge re, an en erlagapsogo ukpegi o,” oluk mo’gulesi. 21Asogo mo’gulesimu, is ap Allah iak pelal wogo eiye a’ge emin, is ap Farisi a’ge emin, onogola en e,
“Nis aphwami wiak togu lege a’ge ai, is aphwami logon en erlagapsogo ukpo no? We, at Allah ematek en nak e, elirat erlagapsogo pasu a’geat de, at ap yu ogola en Allah mi-miarak pasulat onuk wiagap pasu yu sa epegep,” oluk onogola epegesa. 22Asogo epegesema, at Yesus en e, is onogola epegesa a’ge enagat pobirak onoboluk e,
“His honogola asogo oborogu legep ai nopaget. 23An en ap yu wene mo’gulom e, se ’gela’ge re, ’ge epegep.
Hat wiak taga legen a’ge ai, arat erlagapsogo ukpegi o, oluk mo’gulegis ai se a’ge ’gela’ge mo’gulegis epegep a? Ye, at e,
Hebe inoroguntik lak o, oluk mo’gulom nak e, se ’gela’ge opogu legep a. Erlak o. Hebe inoroguntik lak o, oluk mo’gulummu re, e’ginat o. 24E’gin a’geat de, an abat daklau wegi ano re, ’gwiangma yema welat, aphwami di wiak yu wiak togwi a’ge an enat erlagapsogo ukpasu lemagoluk, Allah en eiye taknebesi a’ge ano pobirak nebagup en,” oluk mo’gulentesirik e, ap e’gik oyuk soborak a’ge ano disogo mo’gulesi,
“Hebe inoroguntik hegerlis demogo nogo ese legen a’ge ano horloluk e, howi pam lak o,” oluk mo’gulesi. 25Asogo mo’gulosokhwe erianoat, ap ano aphwami ebano enilem inagarik e, egerlis delak nogo ese laga a’ge ano horloluk Allah erliktil-til owi pam laga. 26Asogo tegeimu aphwami ebano enebe ’berlegat onogorlok en mu ebelesogo tigisarik e, disogo egesa,
“Nenil yogodak hege ai re, modok mu a’geat hege yu nonogorlok e,” oluk Allah erliktigisa.
At Yesus en ap Lewi yo’go pesi wene
(Matius 9:9-13; Markus 2:13-17)
27Asogo toluk at Yesus o eba en libagarik e, ebela pam lasulat il yethesi ’gal e, ap uang pemerintah paget ’gonu oluk wogwi a’ge mesik onuk Lewi ai, kantor uang ’gonu oluk wogumu eba hweriogo oruakma il hesi. Asogo oruakma il hesirik e,
“Ne’berlik suk o,” oluk mo’gulesimu re, 28inagarik, di a’ge yu a’ge ’berlegat ukpoluk e, e’berlik laga. 29Lagarik e, at owi pam Yesus ebaget seni logat seregei. Asogo sogo poluk e, aphwami a’bik uang pemerintah paget ’gonu oluk wogu legesa a’ge emin, aphwami pema akhit emin, at emin huregesarik so’boru mesikmu no’gu legesa. 30#Luk. 15:1,2Asogo no’gumu, is ap Farisi a’ge emin, is ap Allah iak pelal wogo eiye a’ge emin en e, at Yesus osi iak wogu legesa a’ge ebano disogo mo’gulentesi,
“His e, ap uang pemerintah paget ’gonu oluk wogwi a’ge emin, is pema wiak togwi a’ge emin, henemin so’boru mesikmu no’gu legep eba nopaget,” oluk mo’gulentigisa. 31Asogo mo’gulentigisema, at Yesus en e,
“Is aphwami agaikhen enebam op ou erlak a’ge, dokter lak en ou obabonobuagoluk yo’go onobo no? Erlak o. We, enebam ou oruak holugat, dokter lak yo’go onobo yo. 32An wegi ai re, aphwami op togwi a’ge yo’go enebaigoluk wegi puk. Erlak o. We, aphwami wiak togwi a’ge ai ukpoluk enebabut heberlemagoluk, yo’go enebaigoluk wegi o,” oluk mo’gulentesi.
Se’ban uogoluk so’boru no’gwi erlak
’bonuk welegesa wene
(Matius 9:14-17; Markus 2:18-22)
33Asogo mo’gulentesirik e’berlik en e, is aphwami pema en Yesus disogo mo’gulegisa,
“Is ap Yohanes osi iak wogwi a’ge eba, agauwa a’bik wolom erlakma en, se’ban uogoluk holuk e, so’boru no’gwi erlak ’bonuk welat se’banat ogwi welagai yo. Ye, is ap Farisi a’ge onosi eniak wogwi a’ge ai re, asogoat togwi o. A’geat de, is ap hat hiak wogwi a’ge ai re, we, yogunat so’boru no’gulat, anggur e’gen a’bosu no’gulat, no’gwi yema re,” oluk mo’gulegisa. 34Asogo mo’gulegisema re, at Yesus en e, disogo mo’gulentesi,
“Ap mesik en ugwe hwerlasulat e, arilak orokhwi yo’go onobouwa a’ge enemin welat,
His so’boru weat welemis o, oluk mo’gulonto epegep? Mia o. 35Asogo a’geat de, ap ai arilak orokhwi onoboluk ebe woluk lo a’ge agauwa oruagat o. Asogo woluk loma eria hegit nak e, is ai agauwa mesik so’boru no’gwi erlak ’bonuk welemayat o,” oluk mo’gulentesi.
36Asogo mo’gulentesirik e, wene mesik ebam elitsogo re, disogo mo’gulentesi,
“Aphwami en, sum naduk ’buktogwi a’ge derlep oso holuk, sum ’get a’ge ’balogo naduk a’ge ai pam dopnorak poluk terleben togwi erlak o. Asogo terleben togwi holuk e, ’get a’ge derlep tua a’ge ano wiak agalat, naduk a’ge ai pam terleben tumu re, emin hegit erlakma no oluk e, wiak agalat, tua o. 37Ai ’gela’ge, aphwami en anggur e’gen ’berelogo a’bosu ’get a’ge ik e’be domba agap a’ge edam hele’gik a’ge pam na’gogwi erlak o. Asogo na’gu holuk e, a’bosu ’get a’ge ai en e, sup tagalat derlepsogo anggur e’gen a’bosu ebe herlil eselat, ik e’be ano eminat derlep tua o. 38Holuk e, anggur e’gen a’bosu ’get a’ge ai re, ik e’be ’get a’ge pamat na’gu o. 39Ye, is aphwami en e,
Anggur e’gen a’bosu naduk a’ge oduk op nasu legi, oluk ogulat e, pobuk ’get a’ge no enebit ago yo,” oluk mo’gulentesi.
Currently Selected:
Lukas 5: Wul
Highlight
Share
Copy
Want to have your highlights saved across all your devices? Sign up or sign in
