Lukas 12

“Ap Farisi a’ge enede ’biren ai en wiagaphonobuano oluk e, henebabut heberlogo welemis o,” oluk mo’gulentesi wene

(Matius 10:26-27)

1 # Mat. 16:6; Mrk. 8:15 Wene asogo ogukhwe, aphwami modok a’bigat eneragam odoktu egesema re, enebe modok ’bi-’beterakma oluk e, is pema en is nin pema onoyuk en sobut-sebat ontoluk laga legesa. Asogo legesema, at Yesus en e, osi iak wogu legesa a’ge ebano wene disogo naduk mo’gulentesi,

“Ap Farisi a’ge enebabut e, e’gen so’boru roti a’ge poruagoluk, ogola ’gwelabogwi a’ge ai ’gela’ge welat e, enagap pam nak op ’gela’ge a’ge re, enede ’biren ai en, wiagaphonobuano oluk, henebabut heberlogo welemis o. 2#Mrk. 4:22; Luk. 8:17A’ge re, di a’ge yu a’ge sebelak a’ge ai ’baktagalat, hisogo oruak a’ge ai enalugapsogo selakma pasulat, tua nak o. 3Asogo tua ai en e, his o hiktakma welat ogu legep a’ge ai, o dakharakma en osokhwe ’berlegat enesa’go holua o. Ye, o pam welat heniak ngorluksogo enesa’go ele’gwe ogu legep a’ge ai re, o dum pam ligemarik eniak loksogo mo’gulontogukhwe holuayat o,” oluk mo’gulentesi.

“Allah honogorloksogo wolom o,”

oluk mo’gulentesi wene

(Matius 10:28-31)

4Asogo mo’gulentesirik e, mesik disogo mo’gulentesi,

“Narilak norokhwi o! An wene yu his henebaget mo’gulhentaik o. Aphwami en henebe wathonobua ai honogorlok hagup o. Henagap o’borl petne nak wathonobuarik e, is en pobuk mesik wiagaphonobo puk ai en, honogorlok hagup o. 5A’geat de, his sa honogorloksogo wolom no. An en mo’gulhentaik. At Allah en henagap o’borl petne wathonoboluk e, pobuk odouk orloukmu elit perakhonobo a’ge oruak aiat honogorloksogo wolomup o, oluk mo’gulhentasu legi ai o. 6A’ge re, sue wulue ai o’go meren pam ’balogwi no. Ebe huaben a’ge o’go uang sen modok weiyat ’biren a’ge pam wogwi ani. Asogo togwi a’geat de, at Allah sue ai mesik nak holuk memerak pasu erlak eberak modok welago yo. 7Ye, his henasu hena’gul pam oruak a’ge ’berlegat, at Allah en e’gik modok wonogo welago yo. At Allah en e, sue wulue a’bik ai logo ’gela’ge epasu erlak o. Henebeat logo modok epasu o. Ai en e, honogorlok erlaksogo welemis o,” oluk mo’gulentesi.

Aphwami enilem, “Yesus an nue o,”

oluk eniak ’baksogo u wene

(Matius 10:19-20; 10:32-33; 12:32)

8Asogo mo’gulentesirik, mesik disogo mo’gulentesi,

“Ap sa en,

Yesus ai an nue o, oluk aphwami enilem, ’baksogo oso holuk e, an abat daklau wegi ano en ogo re,

At yu an not o, oluk, is malaikat Allah en yo’go peragonobou wago a’ge ebano enilem niak ’baksogoat mo’gulentaik o. 9A’geat de, ap sa en,

Yesus ai an neperlak o, oluk, aphwami enilem, elabe tago holuk e, an en ogo re,

At ai an neperlagat o, oluk, is malaikat ’bogorl pam a’ge Allah en yo’go peragonobou ago a’ge ebano enilem niak ’baksogo mo’gulentaik o. 10#Mat. 12:32; Mrk. 3:29An abat daklau wegi ano re, nobok wiak ’balogwi holuk e, wiak tua a’ge ai enebe lo’bok Allah en erlagapsogo ukpouwa a’geat de, Allah Arogun ai obok wiak ’balogwi holuk e, wiak tua a’ge ai Allah en erlagap pouwa modok erlak o. 11#Mat. 10:19,20; Mrk. 13:11; Luk. 21:14,15His henemdema wouwagoluk, aphwami en is aphwami Yahudi a’ge se’ban ogumu eba emin, is ap pemerintah a’ge onlogotma eba emin, is ap ’gain ononuk logo a’ge onlogotma emin, wokhonoboluk henebei lagai holuk e, honogola en e,

Nis nenagap delogo wene o’go ’ge a’ge ul, oluk henede porogup o. 12Ai erlige re, his en wene o’go uagoluk Allah Arogun en,

Disogo it o, oluk, honogola ’gagalua a’ge oruak o,” oluk mo’gulentesi.

“Ap mesik ’gain ilmu oruak a’geat de, ebabut e,

uo ’gela’ge tegei,” oluk ebam elitsogo

mo’gulentesi wene

13At Yesus en asogo mo’gulentasukhwe, is aphwami a’bik odoktak welegesa a’ge ebano mesik en e, disogo mo’gulesi,

“Nue. An nue en nis nenaik waragalat, at emening a’ge nis ne’birek nenebaget poluk laga a’geat de, nare omu nak hwerlesirik oruak ai, logon me’gisogo woknemagoluk, mo’gulomup o,” oluk mo’gulesimu, 14at Yesus en e, disogo mo’gulesi.

“Henebe degelogo honoboluk hena’ge lo’bok so’buronto ai, an ediknebegesema epegen?” oluk mo’gulesirik e, 15aphwami a’bik ebano disogo mo’gulentesi,

“Aphwami ena’ge a’bik welagai ai pam enelaluk welagai erlak o. Di a’ge yu a’ge an na’ge nak wellep, oluk enede opogu lema no oluk henebabut heberlogo wolomup o,” oluk asogo mo’gulentesirik e, 16wene mesik ebam elitsogo disogo mo’gulentesi,

“Ap ’gain a’ge mesik en iabuk ’gwiang eseimu owi yeregeimu re, ebe e’gen a’bik egeimu, 17at ap ano ogola en e,

Owi yeregis a’ge ebe e’gen a’bik egesegei ai, ebe ’balogo paikmu ebale erlak yema re, no’gosogo tik, oluk, ede eberise laga. 18Ede eberise lagarik e,

Disogo tik, oluk, ede epesi,

O werik naduk pasu legimu eba yu moluksogo re, pobuk lok a’ge mesik werik poluk, na’ge emin, di a’ge yu a’ge owi yeregis a’ge e’gen ’belak a’ge emin, o eba modogat pasu leik o. 19Asogo poluk oruakhwe, nu’gwarek en nesa’go weriselat e,

Yogo. Mo ligagalat, ’bu agalat, tisokhwe di tahun yu tahun paget na’ge a’bik elitsogo pagathwerlegirikmu re, op o. Yogodak set hwalogo welat, so’boru nasulat, anggur e’gen a’bosu nasulat, tagalat e, nogola nagai hasu leik o, oluk, nu’gwarek nesa’go werise leik, oluk ede epasu lagama, 20at Allah en e,

Ap yu, hede modok erlak yema re! Yogo hup nogogumu yayat harogun ’gegilogo lebikpou wema ani o. Lebikpou wagoam, ha’ge modok a’bik odoksogo pagathwerlegen eba sa eiye ema epegen, oluk asogo mo’gulesi. 21Ai ’gela’ge re, is aphwami Allah ilem ebe a’ge wo erlak welat, is onu’gwarek en a’ge nak odoksogo pagathorlogwi ai, ai emin hegirat o,” oluk mo’gulentesi.

“Henede perik togup o,” oluk mo’gulentesi wene

(Markus 6:25-34)

22Asogo mo’gulontoluk, at osi iak wogu legesa a’ge ebano disogo mo’gulentesi,

“An en asogo mo’gulhentegis ai re, his honogola en e,

Nenelaluk wolomogoluk e, nonso’boru ’ge a’ge nul. Nonosum ’ge a’ge ’buktul, oluk, henede perik welat wenemennei yat horok eberogu lorogupno oluk mo’gulhentegis o. 23No’gwi a’ge ai abel akhit a’geat de, logo re, henebe henelaluk wolom aiat o. Ye, sum ’buktogwi a’ge ai abel akhit a’geat de, logo re, henebe aiat o. 24At sue ’bo’giet tago a’ge pobi tit o. At en e, di a’ge yu a’ge owi yeriselat, e’gen ’baliselat, tago modok erlak o. Ye, pobuk no a’ge paget e’gen ’balogo o werikmu pagathwerlasumu modok erlak a’geat de, at Allah en oso’boru wogosoat o. A’ge re, at Allah en sue ai ede ningtak pasu a? Erlak o. We, his henebe aiat modok ede ningtak pasulat honso’boru wokhontouwa erlak no? Wokhontouwayat o. 25Hat ap mesik en e,

An nebe wareik eria hegit e, lebeksogo warom erlakma en, il mesik emin ogo nelaluk welle e, oluk, wenemennei yat horok eberogup ai pam logon emin helaluk wolom no? Mia o. 26Holuk e, his en di wene yu wene wei a’ge tu mia en welat e, lok a’ge ai henede porogu legep ai nopaget. 27#1Raj. 10:4-7; 2Taw. 9:3-6Owil sing lek ’gut lek oso ai pobi tit o. Owil ai owan igoluk e, set hoporak til lagalat, herle tualogo sum ’gela’ge egesogulat, togwi modok erlak a’geat de, ap ’gain Salomo welat alli a’ge wogoma erliktogu legesa ai mia epegi o. Owil ai nak e, il amolit op modok ai hemit! 28Holuk e, e’gela herle’gela o lei o’gwe welago a’ge ai re, yogodak ’gela’ge, op wolotluk e, loruk o’gwe re, odoukmu narlik pogwi a’geat de, Allah en onosum ’buktak onobo ’gela’ge op a’ge heli’gogo enebasu ai hegitsogo, his henebe henebaget opsogo ’buktak honobouwa erlak no? Henede Allah ebam he’berik po puk yu re! 29Honogola en e,

Nonso’boru emin, nenegeik emin, no’gwe nul, oluk, ai a’geat logo poluk henede perik wolorogup o. 30Asogo togwi ai ’berlegat e, is aphwami o’borl o’gwe a’ge en ai a’ge logo poluk heratil no’gwi a’geat de, his yu nak e, di a’ge yu a’ge erlak en henerlagaik ’gela’ge welegep ai, at henaik Allah ’bogorl pam a’ge aluk welago yo. 31At Allah eragam ’goluk wolomul ai a’ge logo pagup holuk e, his di a’ge yu a’ge ai ebam louksogo wokhontouwayat o.”

“Op a’ge ’bogorl pam eba honobouwagoluk, perakpogu lomup o,” oluk mo’gulentesi wene

(Matius 6:19-21)

32“Holuk e, his Allah eiyagai egeptik odoktak welegep a’ge henebe wei nak a’ge yu, narilak o! Allah en his at eragam henebaigoluk ede epesirik oruakma re, honogorlok hagup o. 33His hena’ge di a’ge yu a’ge eba o’go ’balogo saboroguptik e, o’go uang odoktogup a’ge ebano is ena’ge erlak welat enerlagaik a’ge ai so’busogo wogontomup o. So’burontoluk e, uang owi pobut ago erlak a’ge wokho poluk, yagasogo pogulom ’gela’ge, hena’ge modok op a’ge erlak ago erlak a’ge, is ap enil ’berege wiak a’ge en yogorlia wa ’gugulat, elaluk a’ge en ’baliselat, tago modok erlakma ’bogorl pam eba yagasogo honobouwagoluk pagathwerlai laga lomup o. 34Hena’ge henede hwedik a’ge eba odoksogo oruakma, henede ebayat welema o,” oluk mo’gulentesi.

At Yesus en, “Henebabut heberlogo wolomup o,” oluk mo’gulentesi wene

35-36 # Mat. 25:1-13 # Mrk. 13:34-36 Asogo mo’gulentesirik e, pobuk mo’gulentasulat e,

“Ap ’gain a’ge hwami wogontugumu loluk seni noluk wagaimu, osi eragam a’ge yetharok enepe heberlogo oruakma, at togolik wagalat e, ’goduk ’bak-’bakhasuam perleneat ’goduk huthogwi ’gela’ge, his ogo re, honosum opsogo ’bik-’buk e, esaga ’gwialogo poluk wolomup o. 37At ’gain ano eragam a’ge ebano onue yetharok oruakma ebe wagalloma re, onogola enagai a’bik houwa o. Asogo yetharok oruakma wemarik e, at onue ano osum is onosum ’gela’ge ’buksogo, at osi ebano seni ano nouwagoluk enebe mesikmu la’buksogo huremma re, at en so’burontouwa, oluk mo’gulhentegis.

38Asogo tua ai re, at ebe o hup ede ’burl wema ya? O ede we’gerlisokhwe wema ya. Is yetharok oruakma hentau wagoam, onogola enagai a’bik houwa o.

39 # Mat. 24:43,44 Wene yu honogola eberak wolomup o. Ap owi eiye a’ge mesik ede epasulat e,

O yogo hup e, jam ai pam an nowi pam yema ap mesik yogorlia waigoluk ’guma, oluk aluk wellepma re, at ebe owi pam ’gagalak wellepma re, o hebat posogo yogorlia wa ’gu elep erlak e, henalugat ani o. 40Ai ’gela’ge his honogola en e,

At ai erlige wema, oluk opogwi erlakma en wongat oruakma, an abat daklau wegi ano re, arat weik ai, henebe degelak welemis o,” oluk mo’gulentesi.

Ap ’gain a’ge en eragam a’ge ede he’berik a’ge holuk, ebabut erle-perlerak a’ge holuk, tago a’ge ebam elitsogo mo’gulentesi wene

(Matius 24:45-51)

41At Yesus en wene asogo mo’gulentesimu at Petrus en disogo mo’gulesi,

“Nue! Wene ebam elitsogo mo’gulnentigen ai re, nis nenebaget nak e’gen a? At e, aphwami ’berlegat enemin paget e’gen a,” oluk mo’gulesimu, 42at nonue ’gain Onuk Logo a’ge Yesus en e, disogo mo’gulesi,

“Ap ’gain a’ge mesik eiyagai ’gwelagentarok welat onso’boru no a’ge wogonto hegitsogo wogentasu lemagoluk, at eragam a’ge yo’go pasuam ogola ’gagalak welat ebabut ue iak oso a’ge hegitsogo tago ai sa ’gela’ge epegen. At ai ue ano en, edikpoluk lasu o. 43Edikpoluk lasuam, eragam a’ge ano asogo hegitsogo tagoma, at ue ano togolik il hau wago holuk, eragam a’ge ano ogola en agai a’bik houwa o. 44Asogo op tagoma, hau wemarik e, ue ano en e,

An na’ge yema perlengsogo hat he’gik pamat welemak o, oluk edikhobouwa o, oluk demat mo’gulhentegis o. 45A’geat de, at eragam a’ge ai ebabut wiak holuk e, ogola en e,

Nue ano perlene wago erlak ai, welemarik en wema hegi, oluk, at ue eragam a’ge logon ap et, hwami et, ’go’bu waronobogulat, so’boru emin, anggur e’gen a’bosu emin, emde lago wiak noluk, ologun pam, anggur e’gen a’bosu ai en ebe ede ’balagalat, tagalat e, at en e,

46Nue ano o ai erligeat, jam ai pam wema, oluk modok eperlak oruakma, ue ’gain ano hau wemarik e, eragam a’ge ano ebe ’go’bu modok wusogo re, is aphwami pema enede Allah pam he’berik pogwi erlak a’ge enebasumu eba peragonobouwa o. 47Ye, ap eragam a’ge mesik ogola en e,

An nue en,

Yabuk disogo wokho nebelep, oluk ogola epasu a’ge aluk welarat de, yabuk ano wogo ebasu erlak welema holuk e, ap ai ’go’bu obotut wiak wosuma ani o. 48A’geat de, eragam a’ge mesik ogola en e,

An nue en,

Yabuk disogo wokho nebelep e, oluk ogola epasu a’ge eperlak welat asogo wogo ebasu erlak ’go’bu obotut wiak woru hegirat wiak tiso holuk, ’go’bu weisogo ’gela’ge wosuma o. Aphwami enebe lo’bok a’bigat wogontouwa a’ge ai, u’gwarek wagalat a’bigat ’gonu ua o. Ye, di a’ge yu a’ge loksogo ene’gik pam welemagoluk edikpouwa a’ge ai, pobuk,

Loksogo woknemis, oluk ua o,” oluk mo’gulentesi.

At Yesus en, “Is aphwami enebe mesigat a’ge

hwerlirak enebaigolugat wegi o,”

oluk mo’gulentesi wene

(Matius 10:34-36)

49Asogo mo’gulontoluk e’berlik disogo mo’gulentesi,

“An e, o ’gwiangma yema odouk ’gwelabigoluk wegirikmu no oluk e, odouk ai perlenesogo magale dainuak, oluk nede epasu legi. 50#Mrk. 10:38Aphwami yema ik olomu ’belabonobogwi ’gela’ge, an di obotut yu obotut taknobouwa a’ge re, owan oruakhwe, nogola wiak welegi o. 51His honogola en e,

At ’gwiangma yema waga ai re, aphwami ’gwiangma yema a’ge la’bulogo enebaigoluk waga, oluk epegep a? Erlak o. An e, hwerlirak enebaigoluk wegi o, oluk mo’gulhentasu legi. 52O yogodak hwerli en e, ap mesik eiyagai enemin enebe huaben onowi mesikmu a’geat welat, is-is enemin hwerlisogo wiak agalat, enebe henagan en e, enebe ’biren onobok ’balugulat, ye, nin enebe ’biren en e, enebe henagan eriano onobok ’balugulat, tua o. 53#Mik. 7:6Enemin asogo hwerlirak welat e, aik en e, omlogo e’birek il ’balagalat, omlogo en e, aik e’birek il ’balagalat, ia en e, emalik e’birek il ’balagalat, emalik en e, ia e’birek il ’balagalat, iemalhwe en e, iemalhwe e’birek il ’balagalat, iemalhwe en e, iemalhwe e’birek il ’balagalat, asogo enemin il ’baletil louwa ani o,” oluk mo’gulentesi.

O yogodak orogole agoam pobitu wene

(Matius 16:2-3)

54Asogo mo’gulentesirik e, aphwami a’bik ebano wene mesik disogo mo’gulentesi,

“O mo obuk oso hegit etleba en o hena mesik orlu ago holuk e,

Yekha! Moru wema, oluk ogu legep ano hegitsogo re, moru arat wago yo. 55Ye, o sogwei ik obut akhit orogobu en punhau wago holuk e,

Yetha! O hebi dain ua hegi, oluk ogu legep ano hegitsogo re, arat hebi ago yo. 56His henagap pam nak op ’gela’ge henede ’biren yema re! ’Bogorl ’gwiang orogole pobirak poluk e,

Asogo ema, oluk, henede we’gerlak welat, ebabut enagat ’balugu legep a’geat de, o yogodak welege ya pam disogo ema, oluk, pobirak erlak welegep ai nopaget,” oluk mo’gulentesi.

“Wene henebam pogwi a’ge erlagapsogo ukpemit o,” oluk mo’gulentesi wene

(Matius 5:25-26)

57Asogo mo’gulentesirik e, wene mesik disogo egei,

“Wene honu’gwarek en ologun wusogo hegirap togu legep erlak ai nopaget. 58Ap mesik en wene hat hebam poluk wene edip ’belo’gogwi a’ge ene’bek wokhoboluk louwarik, is ap ebano en e, hebe polisi ene’gigem poma, is en e, ene’gik herle wusogo onobugumu ebano ’gwelakhebi louwano oluk e, owan ebela’gwe lagalat eria enat he’birek wene erlagapsogo ukpomup o. 59Ye, erlagapsogo ukpagun erlak holuk e, he’gik herle wusogo ’gwelakhoboma re, o’go daksogo modok wogoso erlak holuk e, eba en liplauma modok erlak ani o, oluk mo’gulhentegis ai o,” oluk mo’gulentesi.

Currently Selected:

Lukas 12: Wul

Highlight

Copy