Imamat 2

Gandum agap e’gen wokho pogulom wene

1Mo’gulesirik, is aphwami Israel a’ge mo’gulontouwak oluk, at Allah en wene mesik emin, Musa mo’guleselat, “Is logon en gandum e’gen An Allah nebaget po opogulat holuk e, gandum e’gen ano modok opsogo agap e’gen wokho pogu lemarik, a’bosu ebam herlelik pogulat, odouk narlogwiam e’ben opsogo tang oso a’ge ano o’borl petne ’bulogo pogulat, takpoluk wik-wok, 2Is ap an nebe eiye a’ge Harun eiyagai wogentau waga lemak o. Asogo wogentau wagai holuk e, nebaget pogwi a’ge opsogo e’gen wogo a’ge a’bosu emin, odouk narlogwiam e’ben opsogo tang oso a’ge ano emin, ap an nebe eiye a’ge ano en e’gik pam agauwa mesik pam wogo poluk e’gen wogo a’ge yu ’berlegat hat hebagerat o, oluk, odoksogo odouk narlogumu ebano an nebaget odouk narlogu lemak o. Asogo togulom ano re, An Allah nebaget odouk narlogwiam e’ben op hasulat, nogola nagai haik en enebaget pogulom ano re, aiat o. 3Di a’ge yu a’ge an woknomok oluk, odouk narlogulom ano re, an Allah nebaget pulogo oruak a’ge modok asua nakma re, pema dedilik a’ge ebano is Harun eiyagai enemin enebagerat ukpogu lemak o.

4Ye gandum agap e’gen wogo a’ge ebano ule’gen ebale hele’gikmu ebano en werakho nebaget po opogulat holuk e, e’gen wogo a’ge modok opsogo peruak oluk e, ragi po erlakma en a’bosu nak ebelogo roti ’gela’ge ebelogo roti ’gela’ge takpoluk, nebaget po opogulat holuk a? ragi po erlakma en we ebak a’ge werakho a’bosu o’borl pam egilogo poluk nebaget po opogulat holuk e ai re op nagat o.

5Agap e’gen wogo a’ge nebaget pogulom ano re, sogoluak pam demogo worogo poluk woknoum opogulat holuk e, e’gen wogo modok op a’ge holuk enak, wik-wok ragi po erlakma en a’bosu pam nak ebelogo sogoluak pam werakho poluk, 6wei-wei a’ge ’balogo a’bosu ebam herlilogo poluk woknogu lemak o. Asogo tugulom ano re, e’gen wogo a’ge pam werakho an nebaget poluk wokno’gulom ano re, aiat o.

7Ye, agap e’gen wogo a’ge nebaget pogulom ano re, Kuali pam werakho woknoum opogulat holuk e, e’gen wogo op a’ge holuk nagat wokho a’bosu pam ebelogo opsogo kuali pam werakho poluk an woknogu lemak o. 8E’gen wogo a’ge disogo werakho an Allah nebaget po yo, oluk, egi ai, hegitsogoat werakho woluk ap an nebe eiye a’ge wogentau waga lemak o. Wogentau wagai holuk e, is an nebe eiye a’ge ano en nebaget pogwi a’ge ano wik-wok odouk narlogumu ebano pou wotluk, 9yu ’berlek Allah hebaget a’geat o, oluk, an Allah nebaget delnasogo pema ebano odouk narlogwiam e’ben op hasulat, nogola nagai houwak oluk odouk narlogumu ebano nebaget odouk narlogu lemak o. 10Di a’ge yu a’ge an woknomok oluk odouk narlogulom ano re, an Allah nu’gwarek nebaget pulogo welago a’ge modok asua atma re, pema dedilik a’ge ebano is Harun eiyagai enemin, enebagerat ukpogu lemak o,

11an Allah nebaget odouk narlogulom ano re, pit houwak oluk ragi emin, ’gin a’bosu emin, e’gen wogo a’ge ai emin poluk an Allah nebaget odouk narlu ai asua atma re, di a’ge yu a’ge e’gen hwelik a’ge pam werakho an Allah nebaget pogulom ai re, ragi emin poluk werakho wokno’gulom mia o. 12E’gen naduk egeik a’ge ’balogo an Allah nebaget pou wagalat, e’gen hwelik ragi ano emin, ’gin a’bosu emin, emin poluk, nebaget woknosu agai holuk e, waigat a’geat de, e’ben op hasulat, nogola nagai haik en e, odouk narlogumu ebalema ebano de oluk, weat wolomtik wokno’gulom ai nak e, mia o. 13Gandum agap e’gen wogo a’ge werakho nebaget po holuk e, mayu pelogo poluk nak woknogu lemak o. Is enaik Allah an nemin wene arat daksogo ’balogo ’balegis a’ge ano eberak welemagoluk, mayu pelogo nak sorogumu re, nebaget pou wagai holuk e, mayu pelak poluk nak nebaget pou waga lemak o,

14an Allah nebaget di a’ge yu a’ge e’gen naduk ’belak a’ge pou wagalat holuk e, odoukmu werakho agap e’gen wokho poluk, 15a’bosu emin, herlilogo pasulat, odouk narlogwi holuk e’ben opsogo tang oso a’ge ano ’bulogo pasulat, takpoluk an woknogu lemak o. Asogo togulom ano re, e’gen wogo a’ge pam werakho an nebaget wokno’gulom ano re, aiat o. 16Ye, ap an nebe eiye a’ge ano en e’gen wogo a’ge a’bosu emin, e’ben op a’ge ano emin, pogwi a’ge ebano a’ge ado e’gikmu wik-wok yu re, ’berlegat hat hebaget o, oluk, an Allah nebaget delnasogo odouk narlise lemak egei o,” oluk, mo’gulontomup o.

Currently Selected:

Imamat 2: Wul

Highlight

Copy