Yohanes 9
9
At Yesus en ap mesik il hopnik a’ge
dektak pesi wene
1At Yesus ebe o eba ukpoluk ebela pam lasulat, il yethesi ’gal e, ap mesik ia ogola en modok il hopnik dagaga a’ge il hesi. 2Asogo hesimu, at osi iak wogu legesa a’ge ebano en e, disogo mo’gulegisa,
“Nue. Ap il hopnik a’ge ai re, edip at u’gwarek en wiak tegei pam en a? At e, edip aik ia wiak tigisa pam en ebe asogo dagaga ya,” oluk mo’gulogu legesema, 3at Yesus en e, disogo mo’gulentesi,
“Edip ap yu emin, aik ia emin, wiak tigisa pam il hopnik a’ge dagaga puk. At e, Allah en ap yu obap tagoam aphwami en enil holuk, at Allah en tago a’ge enaluk emagoluk dagagama o,” oluk mo’gulentesirik e, 4mesik disogo mo’gulentesi,
“Pobuk o hik ua o. Asogo hik uema re, aphwami pema en di a’ge yu a’ge tu mia ema ai en e, at peraknobou waga a’ge en tago a’ge ai, o yogodak o dakharak oruakhwe ya pamat togu lomok o. 5#Mat. 5:14; Yoh. 8:12An ’gwiangma yema welat, nebe o dakharak ’gela’ge no oluk e, aphwami o dakharak enebasu legi o,” 6oluk asogo arat mo’gulentesirik e, was topuksogo ’gwiangma pesirik en, e’gik en ’gwiang emin sip-sip ’gela’ge takpoluk en ap ano il pam egilhesi. 7Asogo egilhesirik e, ap ano disogo mo’gulesi,
“Horogole ik Siloam omugwe etle emethai lak o,” oluk mo’gulesi. Ik ai nis neniak pam e, perakpesi u ’gela’ge onuk Siloam oruakma mo’gulesi. Asogo perakpesimu, at ano lagarik, orogole emethesi ’gal e, il op agama togolik waga. 8Asogo op otluk wagoma, is aphwami at arilak a’ge emin, is logon ap ano naduk emde ’gonu wiak osokhwe enil hogu legesa a’ge emin, enil hegesarik e, disogo egesa,
“Eige! Nogorlok e. Ap yu re, ebe hweriogo nak welat, o’gonu wiak oso a’ge erlak no? Ap anoat o,” oluk egesema, 9is aphwami ebano pema en e, disogo egesa,
“Ebe arat o,” ogulat, is nin pema en e,
“At puk. Mu a’ge de, at orogole ’gela’ge o,” ogulat, egesema at u’gwarek en e,
“An nebe demat o,” oluk mo’gulentesimu, 10is en at ebam hin wokhogulat e,
“Hil ai no’gosogo op aga,” oluk mo’gulegisema, 11at ap ano en disogo mo’gulentesi,
“Ap onuk Yesus ogwi a’ge ano en ’gwiang a’ge e’gik en sip-sip ’gela’ge takpoluk nil pam egelik nebesirik disogo mo’gulnesi,
Horogole ik Siloam omugwema etle emesi lu o, oluk, mo’gulnesimu, at en mo’gulnesi ’gela’geat legirik, arat emethegi ’gal e, nil ano op aga o,” oluk mo’gulentesimu, 12is en e, at mo’gulugulat e,
“Ap ai ebe ’geba oruak?” oluk egesema, at en e,
“An neperlak o,” oluk mo’gulentesi.
Is ap Farisi a’ge en ap il hopnik a’ge Yesus en dektak pesi a’ge ano emdema wegesa wene
13Asogo egeimu, is en e, ap il hopnik a’ge ano ap Farisi a’ge ene’bek woluk legesa. 14Ai erlige re, agauwa sabit a’ge pam Allah paget weat oruakhwe, at Yesus en ’gwiang a’ge sip-sip ’gela’ge takpoluk ap il hopnik a’ge ano dektak pesi. 15Asogo obaptegei ai en, is ap Farisi a’ge en ap il hopnik a’ge ano ebam hin wokhogulat e,
“Hil ai no’gosogo op aga,” oluk egesema, at en e,
“At ano en ’gwiang a’ge sip-sip ’gela’ge takpoluk nil pam egilniesimu, emesi legimu re, op aga o,” oluk mo’gulentesimu, 16is ap Farisi a’ge pema en e, disogo egesa,
“Agauwa sabit a’ge pam Allah paget weat wolom o, oluk, wene ’belak a’ge ai sagalogo ukpesirik tegei ai en e, at ebe Allah oruakma en waga a’ge puk. Erlak o,” oluk egesa a’geat de, is ap pema en e,
“At ebe wiak tiso a’ge wellepma re, wene pobi tuagoluk elalin a’ge disogo tu no? Erlak o,” oluk, is onogola asogo hundomok epegesarik eniak sagalugulat enebe me’gerigisa o. 17Asogo me’gerigisarik e, ap il hopnik a’ge ano ebam hin pobuk wokhogulat e,
“Hat en e,
At en nil obapnebesi oluk e’gen ani o. Holuk e, ap ai obok hat en no’gosogo ogun,” oluk mo’gulegisema, at en e,
“At ebe ap Allah iak mo’gulontogwi a’ge anoat o,” oluk mo’gulentesi. 18Asogo mo’gulentesi a’geat de, is ap ’gaindek Yahudi a’ge en naduk ap yu il hopnik welaga a’geat de, yogodak arat op agama o, oluk pobitu enebit en e, ap ano aik ia worlontogwiam wegesema re, enebam hin wogontugulat e,
19“His en e, malik il hopnik a’ge dagagama egep ano re, ebe yuat a? Holuk e, yogodak il no’gosogo op aga,” oluk mo’gulentigisema, 20is en mo’gulontogulat e,
“Malik yu re, ebe nis en derige a’ge il hopnik a’geat dagaga, ogu lege ano a’geat de, 21no’gosogo op aga hwe, nis neneperlak o. Ye, ap sa en obaptegei hwe, nis neneperlagat o. Holuk e, at ebe malik wei a’ge puk. Ebe arlueatma re, at u’gwarek ebaget mo’gulhontouwagoluk ebam hin wokhemit o,” oluk mo’gulentigisa. 22Asogo mo’gulentigisa ai re, is ap ’gaindek Yahudi a’ge en, ogulat e,
“Is aphwami enebe lo’bok en,
Ap yu re, Allah en nis aphwami delnonobuagoluk perakpou weik egei ano Kristus ebe yuat o, oluk ’baksogo oso holuk e, se’ban ogumu o ogola en de, lisogo lebikpouwok o,” oluk wene ’baligisa a’ge oruak ai en e, ap ai aik ia is ap ’gaindek Yahudi a’ge onogorlok en e, 23disogo egesa,
“At ebe re, malik wei a’ge puk. Ebe arlueatma re. At u’gwarek en mo’gulhontouwagoluk ebam hin wokhemit o,” oluk mo’gulentigisa ai o. 24Asogo egesema, is en e, ap nadugat il hopnik a’ge dagagarik welaga a’ge ano pobuk,
“Suk,” oluk worlhogwiam wagama re, disogo mo’gulegisa,
“Ap ai ebe wiak tago a’ge nis nenaluk welat e, hat hu’gwarek en hiak demat Allah onuk ho’buk ’balogo mo’gulnentemen o,” oluk mo’gulegisema, 25at en e, disogo mo’gulentesi,
“Ap ai ebe wiak tago a’ge hwi a? Erlak a. An neperlak a’geat de, an nadugat nil hopnik welegi a’ge re, yogodak ya op egirik welegi ai nak e, naluk o,” oluk mo’gulentesimu, 26is en e, disogo mo’gulegisa,
“At en no’gosogo obaphebegei? Hil no’gosogo obaphebegei,” oluk mo’gulegisema, 27at en e, disogo mo’gulentesi,
“Wene arat naduk mo’gulhentegis a’geat de, henesa’go holu henebit en tugularat de, pobuk henesa’go holuogoluk en de, ogu legep ai nopaget. His ogo at osi om henagai en ogu legep hwi a? I a,” oluk mo’gulentesimu, 28is en eniak esegen yagogulat e,
“Hat at ot egentik ese legen hegi. Nis e, ap Musa osi welege o. 29Ye, ap Musa paget e, wene Allah enat mo’gulesi, oluk, nis nenaluk a’geat de, ap ai paget nak e, ebe o ’geba en waga a’ge hwe, nis neneperlak o,” oluk ogu legesema, 30at en e, disogo mo’gulentesi.
“Eige! Nogorlok e. Ap ai en, an nil obapnebesi a’geat de, his en,
At ebe o ’geba en waga a’ge hwe, nis neneperlak, oluk ogu legep ai, elalinsogoat ogu legep o. 31Aphwami wiak togwi a’ge Allah en eniak esa’go hweliso modok erlak ai en, nis nenaluk o. We, aphwami Allah onogorloksogo welat, at ogola epasu a’ge hegitsogo togwi a’ge holuk, eniak Allah esa’go hweliso yo. 32Ye, aphwami edipmu en til-til yogodak hwerli, aphwami logon enil hopnik a’ge dagagaiam pobuk obabenebigisa, oluk nenesa’go hologu lege modok erlak o. 33Ap ai Allah en perakpou welep erlak wellepma re, at en di tiselat, yu tiselat, tiso ai ’gela’ge tagallep erlak o,” oluk mo’gulentasu lagama, 34is en e, disogo mo’gulegisa,
“Hat hebabut wiak a’ge dagegentik, wiak modok taga legen a’geat de, hat en wene nis mo’gulnonto no? Modok mia o,” oluk mo’gulegisarik e, o se’ban ogumu ebano en e’gik lisogo leget o’borl akhit lebikpou wegesa.
At Yesus en, “Aphwami dem wene paget enil hopnik ’gela’ge oruak o,” oluk mo’gulentesi wene
35Is aphwami en,
“Is en ap ano leget o’borl akhit lebikpou wegesa,” oluk egesema, at Yesus esa’go hwelegeitikmu en, pobuk ap ano emin sarlok tigisarik e, disogo mo’gulesi,
“Ap mesik ebe abat daklauma, oluk egesa ano, ebe pobirak poluk hede ebam he’berik pagun a?” oluk mo’gulesimu, 36at en e, disogo mo’gulesi,
“Ap ai ebe sa no, nue. An en ap ai ebe pobirak poluk e, nede ebam he’berik paik en e, mo’gulnemin o,” oluk mo’gulesimu, 37at Yesus en e,
“Hat hil arat niegen a’ge ano yogodak ne’birek weneane ogu lege nebe yuat o,” oluk mo’gulesimu, 38at en e, disogo mo’gulesi,
“Yogodak arat pobirak hoboluk nede hebam he’berik pegi o, nue,” oluk odogorlu pam huragarik e, Yesus erliktegei. 39Asogo erliktegeimu, at Yesus en e, disogo mo’gulesi,
“An en e, aphwami logon enil hopnik a’ge obabenebiselat, is logon enil op a’ge hiktak enebasulat, taga leigoluk nebe ’gwiangma yema ’bu egi o,” oluk osokhwe, 40is ap Farisi a’ge logon eba welat enesa’go hweligisarik e, disogo egesa,
“Hat hogola en e,
Is enil hopnik a’ge, oluk epasulat, nis ogo mo’gulnentigen a? Erlak o,” oluk mo’gulegisema re, 41at Yesus en e, disogo mo’gulentesi,
“His henil hopnik wellepma re, his wiak oluk wene henebam pelep erlak o. A’geat de, his en e,
Nis nenil op hogu lege, oluk ogu legep ai en e, Allah en,
His wiak, oluk, wene henebam pesimu oruak o,” oluk mo’gulentesi.
Currently Selected:
Yohanes 9: Wul
Highlight
Share
Copy
Want to have your highlights saved across all your devices? Sign up or sign in
