Kejadian 35

Yakub eiyagai enemin o Betel legesa wene

1 # Kej. 28:11-17 Agauwa mesik erlige re, at ’gain Onuk Logo a’ge Allah en mo’guleselat e, disogo egei,

“Nadugat hat hue Esau e’bek en hweiye lasukhwe an haik Allah at horogolema edik welegi ani o. Holuk e, perleneat hat o Betel lak o. Eba laguntik welat, hat en an nebaget di a’ge yu a’ge wusogo an narlik nebasu lomma ebale hele’gip o,” oluk mo’gulesi.

2-3Asogo mo’gulesimu, at Yakub en at eiyagai enemin, is ado legesa a’ge ebano enemin, disogo mo’gulentesi,

“Nis yema ukpoluk o Betel louwok o. Eba lultik welat, an nebam di e’gin yu e’gin nebam oruakhwe naik ’gain Onuk Logo a’ge Allah en letniasulat, an di owi yu owi lasukhwe ’gwelakniarok welat, tago a’ge ano ebaget narloso lomma ebale mesik heli’gogo edikpaik o. Asogo lulmu re, his aphwami o’borloma a’ge en dogwi asua hene’gikmu tenak welegep a’ge ai modogat ukpemit o. Ukpoluk e, his henebam emesogo poluk e, henebe ebelogo welat, honosum il op a’geat ’buktogu lomup o,” oluk mo’gulentesi. 4Asogo mo’gulentasuam, is aphwami ebano en e, is ene’gikmu di asua yu asua tenak welegesa a’ge ebano emin, enesa’goma a’ge ebano emin, ’berlegat enaik Yakub nak odoksogo wogigisa. Asogo wogegisema, at Yakub en o Sikhem kota horoksogo ebano e pei lok a’ge edipmu ’gwiang ’balogo sebelegei. 5Agauwa ai erlige, is Yakub lak eiyagai enemin louwogoluk togumu, Allah en aphwami o kota ebano a’ge onogorlogap pesi. Onogorlogap pesimu is en Yakub mukho a’ge onogorlok agama mo egesa.

6Mo egesema, at Yakub lak ebano o Kanaan legesarik o Betel ’gwi legesa. O Betel ai nadugat onuk Lus welaga. 7O ebano en e, at Yakub en Allah paget narlogulomma ebale mesik hele’gegeirik onuk El-Betel tualegei. Ai en e, nadugat ue e’bek en hweiye lasukhwe Nenaik ’gain Onuk Logo a’ge orogolema inaga laga ai en onuk El-Betel tualegei.

8O ebano en e, hwe Rahel lethasu a’ge onuk Debora arat waraga. Waragama, ebe werak ano o Betel abel orogobu akhit e lok a’ge pei ’gela’ge ano edipmu ’gwiang ’balogo saligisa. Asogo saligisa ai en e lok a’ge ano onuk Lo’gu Marogumu oluk tualigisa.

Allah en Yakub o Betel eba oruakhwe luane egeik ebesi wene

9At Yakub o Mesopotamia en togolik wagoam Nenaik ’gain Onuk Logo a’ge Allah en orogolema inagarik luane egeik pesi. 10#Kej. 32:28Asogo egeik pasulat e,

“Honuk pobuk Yakub ogu lema erlak a’ge de, yogodak e, honuk Israel ogu lema o,” oluk onuk ’get tuelak pesi.

11 # Kej. 17:4-8 Asogo tuelak pesirik, at Allah en eselat e,

“Henaik ’gain Allah en di a’ge yu a’ge elit tu nak anat o. Holuk e, hat he’balak en dagenebil lagaihwe wiyaletil laga lema o! Asogo wiyaletil lagalat o eli’go sebelil lagalat, ena’gul onuk hundomok agalat, pema ’gain ononuk logo a’ge agalat, togu lema a’ge ai onue ’gain e, harat wolorogun o,” oluk mo’gulesi. 12Asogo mo’guleselat,

“An en heba Abraham emin haik Ishak emin, ’gwiang wogentegis a’ge ai, hat wokheselat, hat en dogo’gwe a’ge logon wokhentasularat tik o,” oluk mo’gulesi. 13Asogo mo’gulesirik, at Allah en Yakub ukpoluk laga.

14 # Kej. 28:18,19 Asogo Yakub ukpoluk lasuam, at Yakub en ebale ya Allah emin wene ’balogumu, oluk aphwami enaluk welemagoluk helep lok a’ge mesik edikpoluk, anggur a’bosu emin, minyak e zaitun e’gen a’bosu emin helep o’borl pam a’bosu herlelik pesi. 15Asogo pesirik at Allah emin weneane ogumu ebale ai onuk Betel tuelak pesi.

Hwe Rahel waraga wene

16Asogo tuelak poluk Yakub eiyagai enemin ebano o Betel ukpoluk legesa. Asogo legesarik, o Efrata ebela ’burlmu welat, at hwe Rahel ano emalik doru horok aga a’geat de, malik ebe dagom mia aga. 17Asogo mia agama, at hwe mesik dagonobogwi aluk a’ge en e, at hwe Rahel ano disogo mo’gulesi,

“Hede perik togun o, hemalik logomalik a’ge mesik derigen o,” oluk mo’gulesimu, 18at hwe Rahel ano arat warom hegit agarik, set ologun ’goboksogo ede wathasulat, omlogo dagom a’ge ano onuk Ben-Oni tualegei a’geat de, at aik Yakub en e, onuk Benyamin tuelak pesi.

19Asogo tuelak pesirik, hwe Rahel ano arat waraga. Asogo waragama, at hwe Rahel werak a’ge ano, o Efrata lagaimu ebela esa’goma ’gwiang ’balogo sebeligisa. O ai onuk yogodak en e, Betlehem ogwi ai o. 20Hwe Rahel waragama ’gwiang ’balogo saligisema eriano, at Yakub en helep mesik edikpesimu is aphwami en enil holuk e,

“I, at hwe Rahel uak yema pelak oruak o,” oluk enaluk aga laga. 21Asogo takpoluk, at Yakub lak ebano o Eder etle akhit o yat werik oruakma o sum owi da werik laga legesa. 22#Kej. 49:4Asogo louwogoluk eriano welat, at omlogo Ruben ano hwe eragam a’ge Bilha emin nogosimu, at Yakub en olot modok het aga.

Yakub eiyagai enebe ap nak e, enebe 12 dagenebegei.

At Yakub eiyagai dagegesa wene

23Hwe Lea eiyagai omlogo naduk a’ge Ruben, pobuk e’berlik Simeon emin, Lewi emin, Yehuda emin, Isakhar emin, Zebulon emin, dagenebegei. 24At hwe Rahel eiyagai e, Yusuf emin, Benyamin emin, dagenebegei. 25Hwe Bilha Rahel eragam a’ge ano, eiyagai e, Dan o, Naftali o, dagenebegei. 26Hwe Zilpa, Lea eragam a’ge Gad emin, Asyer emin, dagenebegei. Malik ai ’berlek o Mesopotamia en dagenebigisa a’ge.

Ishak waraga wene

27 # Kej. 13:18 Pobuk e, at Yakub aik Ishak oruakma o kota Hebron horoksogo o Mamre ebayat laga. Naduk ogo eba Abraham emin, Ishak emin, welegesayat laga. 28Eba lagarik oruakhwe aik Ishak ano umur 180 tahun yatsogoat welagarik enat, waraga. 29Ishak asogo waragoam eiyagai Esau Yakub emin en ’gwiang ’balogo pegesa.

Currently Selected:

Kejadian 35: Wul

Highlight

Copy