Kejadian 34
34
Ap Sikhem en e, hwele Dina wiagapsogo pesi wene
1Agauwa mesik pam e, Yakub agalogo hwe Lea agalogo hwele Dina ano is hwami o Kanaan a’ge oruakma entai lagrik enemin oruakma, 2ap Hewi a’ge onuk logo a’ge Hemor omlogo Sikhem ano en e, hwele Dina ano il yethesirik woluk lagarik wiagap pesi. 3Asogo wiagap pesirik e,
“Yakub agalogo Dina yu hwerlele logwe, eige,” ede epesirik, hwele ai, ede yamukwapsogo poluk 4at Sikhem en e, ai Hemor ano mo’guleselat e,
“Naik o. An nugwe aiat hwerlaik epegirikmu re, hwele aiat woknoum o,” oluk mo’gulesi.
5At ap Sikhem en hwele Dina wiagap pesimu ai Yakub esa’go hwelegei a’geat de, eiyagai ’berleksogo o leimu uam kambing domba degelenebil no’gwi a’ge ano wagai erlak en e, at Yakub ano ede sebelak poluk iak logon u erlakma en mosogo welaga.
6Wagai erlak en oruakhwe, at Sikhem aik Hemor ano en,
“Neneiyagai onowene no’gosogo ’balul o,” oluk e, Yakub eragam hau wagarik e, 7e’birek wene owan ’balogumu, at Yakub eiyagai ebano enebe ’berlegat o leimu ebano en wagaiam e,
“Erlak o. Henagalogo honot Dina ano ap Hemor omlogo Sikhem ano en wiagapsogo pesi o,” oluk mo’guloso a’ge enesa’go hwelegisarik,
“Asogo tu erlakhweat de, nonot wiagapsogo pesimu re, nis ap Israel a’ge ’berlegat nononuk wiagapsogo pesi o,” oluk onolot het ogulat, enanni a’bigat aga.
8Asogo enanni agokhwe, at Hemor en e, is mo’gulentasulat,
“An nomlogo Sikhem en e, hinagalogo Dina ano horlo a’ge paget agai modok hesimu re, horlo obat oluk, mo’gulnemis o. 9His en e, nis nonogolani wogonobogulat, ye, nis ogo his honogolani wogonobogulat, togu lomok o. 10His nenemin nene’gerlakma o yema wolom ap etma re, his en nak o mesik mik hwerlaguptik, o ebano ’belakpoluk welemis o. O yema nenemin welat, henede yogunat lagalat, ’gwiang eiyetak pagathorlogulat, tugulom obat o.”
11-12Asogo mo’gulentesimu, at Sikhem en e, Dina uelak enemin, aik emin mo’gulentasulat e,
“His en henedeap noboluk hwele yu woknogulat, ye, yu a’ge woknentemin o, oluk mo’gulnogwi holuk e, wokhentaigatma re, henagalogo uang emin, aik ai enede sebelogo eren ’gela’ge woknonto oluk enede opogwi a’ge emin, ’berlegat nebam pogwi holuk e, hegit-hegit wokhentaik en e, honot ai nak woknemis o,” oluk mo’gulentesi.
13Wene ano ogulentasuam e, at Dina uelak ebano en e, is onot Dena ano wiagap pesi a’ge ano onot het en eniak eseiat at Sikhem aik e’birek lalogo mo’gulontogulat,
14“Nis nonot ap enagap ’belak erlak a’ge wogonobu obat ogwi holuk nononuk wiak omma re, nonot hwerlemin o, oluk mo’gulhoum mia a’geat de, 15mesik togwi holuk e, i o, uano re,
Nis nenagap ’belak a’ge ’gela’geat his ap ’berlegat henagap ’balogwi holuk nak e, nis en e,
I o, oluk u obat o. 16His asogo togwi holuk e, neneiyagai his en wogonobogulat, his heneiyagai nis en wogonobogulat, sogo tugulat, nenemin nena’gulonuk mesigarat wolomul a’geat de, 17henagap ’balu oluk mo’gulhentige a’ge yu, henebit hogwi holuk nak e, nonot Dina wokho woluk womul o,” oluk mo’gulentegisa.
18Mo’gulentegisa a’ge ano is Hemor omlogo Sikhem e’birek en e, obat, oluk, 19at Sikhem ano e, Narilak ’birlegat an en oso holuk enat enesa’go hwologumu re, is asogo tuayat oluk ede epesirik e, Yakub agalogo hwele Dina ano horlo a’ge ede ne’geimu re, mo’gulegisa a’ge ano ede perik tu erlakma en, “An ti laigat,” epesi.
20Asogo epesirik, at Hemor omlogo Sikhem e’birek onowi pam legesarik, ’gebela ’goduk ’gwi lagaimu wene ’balogumu eriano en is aphwami o ebe a’ge disogo mo’gulentegisa, 21“Is ap Israel a’ge ai, nenemin obat oruakma, o yema a’bigat selak oruak holuk, nenemin wela, enede opoluk yogunat na’gulat, ’gwiang mesik hwiogo poluk onowi ut hwerlogulat, togu lemagoluk, ugonobouwok o. Nenemin asogoat welat e, nis en e, is enogolani wogonobogulat, ye, is en e, is enogolani wogonobogula, ye, is en e, nis nonogolani wogonobogulat, asogo tugulat, 22nenemun nena’gulonuk misigarat wolomogoluk mesik tu, io u a’ga ano re, is enagap ’belak ’gela’ge nis ap ’berleksogoat nenagap ’baluok o. 23Ai asogo takpoluk neneminat welat, is onuam kambing domba emin is ena’ge di a’ge yu a’ge emin, onuam we a’ge emin, nis eiye omul ano re, erlak epegep a? Eiye omulatma re, egesa ano re, obat o, oluk togwi holuk e, neneminat wolomul o,” oluk mo’gulentigisa. 24Is ’goduk ’gwi lagaimu odoktu egesa a’ge ano re, ’berlegat at Hemor omlogo Sikhem e’biregat wene mo’gulentigisa a’ge ano enesa’go hweligisarik e,
“Tuogat o,” oluk, is ap o eba a’ge ’berlegat enagap ene’gerlimu a’ge ’balil legesa.
25Enagap ene’gerlimu a’ge ’balenebigisema nogo ’biren welegesarik tono oruakma at, Yakub eiyagai enebe ’biren hwele Dina uelak Simeon Lewi e’birek en e, ene’garok ene’gikmu wit-wok Hemor owi eba hisakho ’gwi lotluk, ap ebano ’berlegat wusogo enebegesa. 26Asogo warenebil lagalat, at Hemor omlogo Sikhem e’birek emina warenebigisarik onot hwele Dina ano owi pam ap Sikhem oruakma woluk wegesa. 27Asogo arat warenebil legesema, at Yakub eiyagai ado pema ebano en,
“Nenagalogo o yema en wiagapsogo pegesema re,” oluk enanni en ap warenebil legesa a’ge ebano, 28onuam kambing domba emin, keledai emin, ena’ge di a’ge yu a’ge leget ogola welaga a’ge emin, odipmu welaga a’ge emin, ’berlegat horlogulat, 29ena’ge di a’ge yu a’ge onowi pam welaga a’ge ano emin, logomalik hwelani emin, hwami emin, ’gerlegat hogu wogenebigisarik onowi pam onobou wegesa.
30Asogo onobou wegesema, at Yakub Simeon Lewi e’birek mo’gulentasulat,
“His en tigep ano pam e, nenede modok wusogo enebegep o. Is aphwami yema welagai a’ge o Kanaan a’ge emin, Feris a’ge emin, ’berlegat enil pam, e e’gela muk agalat e’ben tang oso ai ’gela’ge nonuk wiagapsogo nebegepma re, nobok ’belak pogulomtik la’bolik poluk watnenebil ’gu agalat, nis nenebe we weiyatma re, nenebe ’berlegat wollo’gen dagalogo nonobouwa hegi o.”
31Asogo mo’gulentesimu, is en e, wene o’go mo’gulogulat,
“Nis nonot ai danian ’gela’ge takpoluk ukpo obatma re, oluk en de, e’gen a?” oluk mo’gulegisa.
Currently Selected:
Kejadian 34: Wul
Highlight
Share
Copy
Want to have your highlights saved across all your devices? Sign up or sign in
