Kejadian 23

Hwe Sara waragoam Abraham ’gwiang o’go ’balogo sebeligisa wene

1At hwe Sara elaluk oruakhwe 127 tahun arat takpoluk, 2o Kanaan mesik onuk Kiryat-Araba, onuk mesik Hebron ebano enat ebe arat waraga. Asogo waragama, at Abraham ano,

“Nugwe waraga o,” oluk, ede perik-parik welat nge tegei.

3Nge tegeirik, at ugwe waraga a’ge uak wusogo poluk ’gwelakharok oruakhwe, at Abraham ano en e, is aphwami Het a’ge disogo mo’gulentesi,

4 # Ibr. 11:9,13; Per. 7:16 “An ap muat ’bok a’ge ’gela’ge wegirikmu henemin hene’gerlakma oruakhwe, an nugwe waragama re, an nugwe pasulat, ye, an nakhit o’gwe a’ge waragai holuk pogulat, togulomma re, hono’gwiang mesik o’go ’balik en mo’gulnemin o,” oluk 5mo’gulentesimu, is aphwami Het a’ge en e, at mo’gulogulat,

6“Nenaik o. Nis wene mesik mo’gulhogukhwe hat hesa’go hwelise lomup o. Hat ai re, ononuk oruak a’ge ene’gerlakma welegenma re, huge waragama owikmu po ano re, nis nenede opogwi a’ge mesik op a’ge holuk lisogo womup o. Hat huge ’gwiangma sebelogumu a’ge ano e, nis ado pema en e, nonogola nenagai en eli ul erlagat o, naik.”

7Mo’gulegisema, at Abraham en inagarik, is aphwami Het a’ge o eba welagai a’ge ebano eneragam ’gonu oluk, 8mo’gulentasulat,

“An ngwe waraga ai, o yema henede yen ’gwiang ’balogo ’belabu op epegep holuk e, osokhwe henesa’go hwologu lemis o. Ap Efron Zohar omlogo ano 9at yabuk tagoma ologunmu esa’goma owikmu onuk Makhpela ano at an o’go woknomogoluk en at mo’gulemis o. His hene’gerlakma en is an nakhit a’ge waragai holuk e, pogukhwe an eiye eriogoluk woknogwi holuk, o’go hegit-hegirat wogeik en mo’gulnemis o,” oluk mo’gulentesi.

10At ap Het a’ge onuk Efron ano arilak enemin hweriogo oruakma, Abraham mo’gulesi a’ge ano esa’go hwelegeirik, is aphwami Het a’ge o selimu ’gebela ’goduk ’gwi lagaimu odoktigisa a’ge ano ’berlegat enesa’go hwologukhwe, Abraham mo’guleselat, 11“Erlak o, naik. An niak mesik mo’gulheselegi a’ge yu hesa’go hwelise lemin o. Nue nari yu odoktigisa a’ge enebe ’berlegat enil pam en huge waraga a’ge owikmu ’gwiang ’balogo sebelinogoluk, niabuk taga legimu ologunmu e’gen ano emin, ’berlegat wokhegis o,” 12mo’gulesimu, at Abraham en is aphwami o eba welagai a’ge odoktigisa a’ge ano eneragam ’gonu oluk, hau weragenebesirik, 13enesa’go hwelak oruakhwe, ap Efron ano mo’guleselat,

“Nare o. Woknoum epegen a’ge holuk e, an wene mesik mo’gulheikmu re, hesa’go hwelin o. ’Gwiang o’go poluk en nugwe waraga a’ge ’gwiang ’balogo sebelik epegimu re, o’go wokheselegi a’ge yu hwerlemin o,” oluk mo’gulesi.

14Mo’gulesimu, at Efron en e, Abraham mo’guleselat,

15“Naik o. An mo’gulheselegi a’ge yu hat halugat o. ’Gwiang yu o’go re, uang perak a’ge 400 ’gela’ge pogwi a’geat de, ai pam en nis mesik tak pagathorlo erlakma re, huge waraga a’ge ai re, we, arat ’gwiang ’balogo pomup o,” oluk mo’gulesi. 16Mo’gulesimu, at Abraham en, o’go po egei a’ge ano re, op at epesirik uang perak a’ge 400 egei a’ge ano, di a’ge yu a’ge o’go ’balu a’ge paget e’gin walhogwi ’gela’ge, e’gin opsogo walhesirik, aphwami a’bigat odoktigisa a’ge ano enil pamat ap Efron ano wogesi.

17At Efron yabuk tagoma ebano o Makhpela o Mamre o mo porlu ago hegit eba oruak a’ge ano ’gwiang emin, owik emin, e yabuk tagoma hwerlisogo welago a’ge ano emin, ’berlegat 18at Abraham eiye welemagoluk, is aphwami Het a’ge en wene ’balogumu odoktigisa a’ge ano enil pam o’go ’balegeimu re, ’gwiang ano ’berleksogoat wogegisa. 19Asogo wogegisema ’gwiang Kanaan o Hebron mo il liplau wago hegit o Mamre hegit eba hwerli, owikmu onuk Makhpela ebanoat Abraham en ugwe Sara ano ’gwiang ’balogo sebelegei. 20Is aphwami Het a’ge ebano en yabuk yogo a’ge emin hwerli, owikmu yabuk yogo a’ge emin hwerli, owikmu welago a’ge ebano emin, Abraham wogegisema, aphwami at akhit a’ge waraga holuk e, pogu lemagoluk Abraham eiyerak pagathwerlesi wene ano re, aiat o.

Currently Selected:

Kejadian 23: Wul

Highlight

Copy