Kejadian 12

Allah en Abram yo’go pesi wene

1 # Per. 7:2,3; Ibr. 11:8 Asogo waragarik oruakma, Nenaik ’gain Onuk Logo a’ge en Abram disogo mo’gulesi,

“Hat e, howi werik emin, huelak hosilak emin, haik owi emin, ukpoluk e, o an en hwiakheikmu eba lu o. 2An en e, hat en dogo’gwe a’ge en a’bik yarluk uarik, is ena’gul onuk lok emagoluk takhebaik o. An en, mu’gat wusogo enebam pogwi ’gela’ge hat obap hebasulat, honuk oruagap hebasulat, tisokhwe hat pegilsogo aphwami logon obap enebasu lorogunat o.

3 # Gal. 3:8 Aphwami logon en mu’gat wusogo wogontogwi ai ’gela’geat, hat obap hobogwi holuk, an en is ai obabenebiselat, is logon en hweim hobogwi holuk e, an en ogo hweim enebasulat, tik o. Ye, hat pegilsogo aphwami ’gwiangma a’ge ena’gul onuk lo’bok, an en obap enebaik o,” oluk mo’gulesi. 4-5At Abram ebe umur 75 tahun pam, Nenaik ’gain Onuk Logo a’ge en mo’gulesi hegitsogoat o Haran ukpoluk o Kanaan waga. Asogo waga ai re, ugwe Sarai emin, ot omlogo Lot emin, eneminat, o Haran welat aphwami logon is eneragam a’ge emagoluk wogenebigisa a’ge emin, ena’ge di a’ge yu a’ge sabusogo hwerlegesa a’ge emin, woluk wegesa. O Kanaan arat wegesarik e, 6Abram o Kanaan esa’go’gwe il ’gogol-’gogol hwerli e Allah agan edipmu pobuk o Sikhem werik poluk Allah paget togulomma onuk More eba lau waga. Eria hegit e, aphwami o Kanaan a’ge eba welegesa. 7#Per. 7:5; Gal. 3:16Eba wagarik oruakma Nenaik ’gain Onuk Logo a’ge ebe Abram orogolema inagarik e, disogo mo’gulesi,

“An en o hat en dogo’gwe a’ge wogentaik e, yema o,” oluk mo’gulesimu, at Abram en Nenaik ’gain Onuk Logo a’ge orogolema inaga a’ge ano paget, di a’ge yu a’ge wusogo narlogulom a’ge paget ebale mesik helep uak wusogo hele’gegei. 8Asogo toluk e, ’bekhirat ik o’but hegit dom a’bikmu o kota Betel en abel mo orlu ago hegitsogo eba wagarik, o Betel en ho’gorlak, o Ai ho’gorlak eba o tabo sum owi mesik weregei. O weregeimu eba en e, abel mo obuk oso hegit e, o Betel aiyat o. Ye, abel mo orlu ago hegit e, o Ai aiyat o. O eba di a’ge yu a’ge Allah paget wusogo narlogulomma mesik helep a’ge wusogo ebale hele’gegeitik e, Nenaik ’gain Onuk Logo a’ge erliktegei. 9Asogo toluk e, o agaikhenma en e, agaikhenma ’gwiselat e, o Kanaan ik o’but hegit eba waga.

Abraham o Mesir lagarik tegei wene

10Asogo waga a’geat de, o eba so’boru modok obouk a’bikmu re, so’boru eseik agoam en laigoluk, o Mesir etleba hegit walekmayat laigoluk laga. 11Asogo laigoluk, o Mesir ’gwilo hegit lai lagarik ugwe Sarai disogo mo’gulesi,

“Hwe yu wa o. Hat e, hebe horogole modok opma re, 12aphwami Mesir a’ge en enil hioluk,

Ai Abram ugwe hegi, oluk opoluk, hat hebe helaluk ukhobogulat, an watnobua no yo. 13#Kej. 20:2; 26:7Holuk e, hat pegilsogo an uknoboluk, obap nobuagoluk hat en e,

Ap ai an nue, oluk mo’gulontomup o,” oluk mo’gulesi. 14Asogo mo’gulotluk, at Abram lasu lagarik, o Mesir arat ’gwi laga ’gal e, aphwami Mesir a’ge en e, hwe Sarai ano ebe orogole op modok a’ge enil yethegesa. 15Asogo yethegesema, at ’gain onuk logo a’ge Firaun osi en, hwe Sarai ano enil yethegesayat. Yethegesarik e,

“Hwe mesik ebe orogole modok op a’ge nenil hege o,” oluk at ’gain Firaun ano mo’gulesi legesa. Ai en e, hwe ano ’gain Firaun owi pam woluk legesa. 16Woluk legesema, at ap Firaun ano en, hwe Sarai pegilsogo Abram ebe obap pasulat, aphwami Abram eragam a’ge welemagoluk wogeselat, domba, kambing emin, sapi emin, keledai, unta emin, wogeselat, tegei.

17Asogo a’geat de, at ap ’gain Firaun ano en, hwe Sarai ebe wesi ano en e, Nenaik ’gain Onuk Logo a’ge en ap ’gain ano emin, osi at owi pam welegesa a’ge emin, ou edip lok onogorlok a’ge mesik enebam pesi. 18Asogo pesimu, at ap ’gain Firaun ano en, at Abram worlhesirik e, disogo mo’gulesi,

“Hat en e,

Hwe yu re, an nugwe, oluk mo’gulnum erlakma en e’gen ai nopaget en lalnebigen. 19Hat en e,

Hwe yu an ne’berlik a’ge, oluk egenma an wegi ai nopaget. Hugwe ebe yu, horloluk e, lak o,” oluk mo’gulesi. 20Asogo mo’gulesirik, at ap ’gain ano osi en Abram ebe emin, ugwe emin, a’ge di a’ge yu a’ge ’berlek emin, lebikpuagoluk mo’gulentesi.

Currently Selected:

Kejadian 12: Wul

Highlight

Copy