Kejadian 11

O Babel helep louk-louk wetil ligegesa wene

1O pageat aphwami ena’gul onuk lo’bok o ’gwiangma di owi yu owi welagai a’ge ai, eniak mesigat welat, di a’ge yu a’ge onuk mesigat a’ge nagat ogu legesa. 2Asogo welat, o mo orlu ago hegit o do’go liok-layoktakma onuk Babilonia eba legesarik welegesa. 3Asogo welat, is-is logon en logon mo’gulontogulat til lagalat e, disogo egesa,

“Nis ’gwiang a’ge helep ’gela’ge anni emagoluk odouk pam weraruok o,” oluk egesa. Asogo egesarik, helep ’gela’ge emagoluk ’gwiang weraru a’ge emin, a’bosu ebi wiak a’ge ’gwiang werakho lo’bok tu a’ge logon emin, hwiarigisa. 4Asogo hwiarigisarik e, disogo egesa,

“Nis nenebe o di owi yu owi ’bogolu erlakma en nononuk logo wolomogoluk e, o kota mesik ’balultik, o mesik yat a’ge dip-dip wetil ’bogorl pam ligomok o,” oluk egesa.

5Asogo egesarik, worogwiam, Nenaik ’gain Onuk Logo a’ge en o kota ’baligisarik worogu legesa a’ge ano emin, o diphegeik yat wiak wetil ligaga legesa a’ge ano emin il ’gogolil ’bu eigoluk tegei. 6’Bu eigoluk tegeirik e, disogo egei,

“Is ai ena’gul onuk mesigarat. Ye, eniak ogo mesigarat welat e,

Disogo tuok, oluk, wene naduk le’geligisa aiyat hegi o. Pobuk, is en,

Nis disogo tu nenagai, oluk opogwiam elit nak togu lema hegi. 7Holuk, is-is logon en e, eniak enesa’go holu pukmu en tu ebelerak en e, nis en eniak o’gut menenensa ’buok o,” oluk ’bu egesarik, 8Nenaik ’gain Onuk Logo a’ge en is ano ’bogulogo o di owi yu owi peragenebesimu, o kota ’balul egesa a’ge ano ado ukpoluk ’bogolik pegesa.

9At Nenaik ’gain Onuk Logo a’ge en is aphwami ena’gul onuk lo’bok ’berlegat eniak o’gut menenogo poluk, o di owi yu owi ’bogulogo peragenebesi ai en, o eba onuk Babel tualigisa ai o.

10At Sem eiyagai wiyalak ano ononuk yu o.

Di a’ge yu a’ge ’berlegat ik pam warenebegeimu, tahun ’biren takpoluk, ap Sem dagagama 100 tahun lai lasuam e, omlogo Arpakhsad at deregei. 11Asogo deregeirik e, 500 tahun hwerli lai lasukhwe, eiyagai pema ap emin, hwami emin, dagenbegei.

12Ye, at Arpakhsad 35 tahun arat takpoluk, omlogo Selah yat deregei. 13At Selah arat deregeirik, 403 tahun lai lasukhwe, eiyagai ado pema ap emin, hwami emin, dagenebegei.

14At Selah ano 30 tahun arat takpoluk, omlogo Eber deregei. 15Asogo deregeirik, 403 tahun lai lasukhwe eiyagai ado pema ap emin, hwami eminat dagenebegei.

16At Eber ano 34 tahun arat takpoluk, omlogo Peleg at deregei. 17Asogo arat deregeimu, 430 tahun lai lasukhwe, eiyagai ado pema ap emin, hwami eminat dagenebegei.

18Ye, at Peleg 30 tahun arat takpoluk, omlogo Rehu at deregei. 19Deregeirik 209 tahun lai lasukhwe, eiyagai pema ap emin, hwami eminat dagenebegei.

20At Rehu ano 32 tahun arat takpoluk omlogo Serug at deregei. 21Deregeirik 207 tahun lai lasukhwe, eiyagai ado pema ap emin, hwami eminat dagenebegei.

22At Serug ano 30 tahun arat takpoluk omlogo Nahor at deregei. 23Arat deregeirik, 200 tahun lai lasukhwe, eiyagai ado pema ap emin, hwami eminat dagenebegei.

24At Nahor 29 tahun arat takpoluk, omlogo Terah at deregei. 25Deregeirik, 119 tahun arat lai lasukhwe, eiyagai ap emin, hwami eminat dagenebegei. 26At Terah 70 tahun takpoluk, eiyagai ap Abram emin, Nahor emin, Haran emin dagenebegei.

At Terah eiyagai enemin en tigisa wene

27Ap Terah en eiyagai dagenebegei a’ge ononuk yu: Abram emin, Nahor emin, Haran emin, dagenebegei. Ye, at Haran en omlogo mesik onuk Lot deregei. 28At Haran e, aik ebe elaluk oruakhweat de, owi onuk o Babilonia kota onuk Ur eba ebe waraga. 29Ye, Abram ugwe Sarai hwerlasulat, Nahor ugwe Haran agalogo Milka hwerlasulat, tigisa. At Haran omlogo ap mesik onuk Yiska welaga. 30Asogo a’geat de, at hwe Sarai ebe abeli welaga.

31Oruakma, ap Terah o Kanaan weigoluk, o Babilonia kota Ur ukpoluk omlogo Abram emin, eba Lot emin, agalogo Sarai Abram ugwe ano emin, enemin wegesa. Asogo a’geat de, womogoluk o Haran wegesarik, ebayat mo egesarik welegesa. 32Eba welat, at Terah ebe umur 205 tahun agarik, o ebayat ebe waraga.

Currently Selected:

Kejadian 11: Wul

Highlight

Copy