Keluaran 5

Musa Harun emin en Firaun mo’gulesi legesa wene

1Pobuk e, is Musa Harun emin en Firaun e’bek legesarik e, disogo mo’guligisa,

“Nis aphwami Israel a’ge Nenaik ’gain Onuk Logo a’ge Allah en e,

An neiyagai Israel a’ge o leimu aphwami erlakma eba loluk An erliknobuagoluk peragonobouwagoluk mo’gulesi lit o, oluk mo’gulnentesimu mo’gulhosu ege o,” oluk mo’guligisa. 2Asogo mo’gulegisema, at Firaun en e,

“Henaik ’gain Onuk Logo a’ge ai sa no,” oluk hin wogentesirik e,

“An e, at ai en op egei, oluk aphwami Israel a’ge louwagoluk ai nopaget mo’gulonto epegep? His henaik Onuk Logo a’ge ai ebe neperlakma re, aphwami Israel a’ge ai,

Lit o, oluk mo’gulentaik erlak o,” oluk mo’gulentesi.

3Asogo mo’gulentesimu, is Musa Harun emin en disogo mo’guligisa,

“Allah aphwami Ibrani a’ge nenaik nis nonorogolema inagama o. Holuk e, nis o leimu aphwami erlakma eba ebela pam agauwa henagan lagalomtik arat ’gwi lagaimu eba loluk, Nenaik ’gain Onuk Logo a’ge Allah paget, wam di a’ge yu a’ge wusogo odouk narlogulom a’ge re,

Lit, oluk mo’gulnentemin o. Nis en asogo togwi erlak holuk, Allah en e, ou en waremagoluk ou nenebam poluk de a, at e, weim obogulat watnonobuagoluk, selei a’ge ene’gik pam nenebasulat, de a. Asogo tu o,” oluk mo’guligisa.

4Mo’gulegisema, at en e, Musa Harun emin disogo mo’gulentesi,

“His en aphwami Israel a’ge yabuk togwi a’ge ukpuagoluk tagonobouwogoluk togu legep ai nopaget? Is neragam a’ge ai yabuk togu lemagoluk mo’gulentai lit o. 5Aphwami his a’ge ai yarluk egesarik modok a’bik oruakma re, his en is yabuk togwi a’ge ai ado pou wagoluk ogu legep yema re!” oluk mo’gulentesi.

6O eria hegirat at Firaun en, aphwami Israel a’ge yabuk togukhwe is ’gain Mesir a’ge enebe ’gain ’gela’ge welemagoluk, edigenebegesema welegesa a’ge emin, ye, is aphwami Israel a’ge onosi ’gela’ge welat,

Disogo tuok, asogo tuok, oluk ogu lemagoluk edigenebegesa a’ge emin, wene disogo mo’gulentesi,

7“Helep annisogo op welemagoluk e’gela ’buk a’ge e’gela emin werarogwi ai, pobuk his en wogontogu lorogup no yo. We, onu’gwarek en hwiakho werarogu lemagoluk mo’gulontomup o. 8A’ge re, hwerli naduk pam werarogu legesa ai ’gela’ge weraru o. Pobuk hwerli logon ’belabuom modok mia o, oluk mo’gulontomup o. Is yabuk togulom modok enebit en, an mo’gulnogulat,

Wam di a’ge yu a’ge nenaik Allah paget wusogo odouk narlesi louwogoluk mo’gulhosu ege o, oluk mo’gulnogwi modok oruak ai o. 9Is en yabuk modok a’bik togulat, weneane we, ’burl a’ge eba enesa’go holu mia emagoluk e, yabuk modok a’bik tuagoluk ning-nangsogo mo’gulontomup o,” oluk mo’gulentesi.

10At Firaun en asogo mo’gulentesimu, aphwami Israel a’ge yabuk togukhwe, is ’gain Mesir a’ge enebe ’gwelagentarok welegesa a’ge emin, ye, is aphwami Israel a’ge logon ap ’gain ai onosi ’gela’ge welat,

Yabuk disogo tuok, asogo tuok, oluk ogu lemagoluk edigenebegesa a’ge emin, enemin wene asogo mo’gulentigisa,

“At ’gain en e,

Is helep opsogo ningsogo welemagoluk e’gela ’buk a’ge emin werarogwi ai, e’gela aphwami en wogontogukhwe tu modok mia, oluk egei. 11Ye, is onu’gwarek en e, e’gela ’buk a’ge etleba akhit a, yema akhit a, heratumu re, elirat weraru o. Elitsogo weraru pukmu en wei nak weraru modok mia o,” oluk egei ai o, oluk mo’gulentigisa. 12Asogo mo’gulentigisema, is aphwami Israel a’ge ebano helep weraru a’ge e’gela ’buk a’ge e’gela palo til o Mesir en di owi yu owi ’berlegat ’bogoligisa. 13’Bogoligisema, aphwami Israel a’ge yabuk togukhwe ’gwelagentarok welegesa a’ge ebano en e, is aphwami Israel a’ge ebano disogo mo’gulentigisa,

“Agauwa mesik erlige e’gela ’buk a’ge e’gela wokhentasuam helep a’bik werarogu legep ’gela’geat weraru o. Weiyat weraru puk o,” oluk eniak ningsogoat mo’gulontogu legesa. 14Asogo mo’gulontogulat, aphwami Israel a’ge yabuk togukhwe is ap ’gain Mesir a’ge ’gwelagentarok welegesa a’ge ebano en e, is aphwami Israel a’ge onosi ’gela’ge welat,

Disogo tuok, asogo tuok, oluk ogu lemagoluk edigenebegesa a’ge ebano ’go’bu waronobogulat e, disogo mo’gulentigisa,

“Honosi helep naduk a’bik werarogu legesa ebano ’gela’ge weraru erlakma en, wei nak werarogwi ai nopaget,” oluk mo’gulentigisa.

15Asogo mo’gulontoluk, ’go’bu warenebigisema, is ap ebano a’ge en ap ’gain e’bek wegesarik e, disogo mo’guligisa,

“Nue, hat en disogo taknonobogu lemagoluk hosi mo’gulentigen ai nopaget? 16Hat hosi en nis e’gela ’buk a’ge e’gela mesik woknonto erlakma enat, helep ebe disogo werarip, oluk eniak ning-nangsogo mo’gulnontogulat, is dagantil lagalarat de, nis ’go’bu modok watnenebigisa ai nopaget,” oluk mo’guligisa.

17Asogo mo’gulegisema at Firaun en e,

“His e, modok sorli enat, demat yabuk modok henebit ai en wiak ai en henaik ’gain Onuk Logo a’ge paget wam di a’ge yu a’ge wusogo odouk narlik ebi louwogoluk mo’gulnosu aga legep ai o. 18Holuk e, his togolik yabuk ti lu o. Aphwami en e’gela ’buk a’ge logon wokhonto erlak a’geat de, his en helep a’bik werarogu legep ’gela’geat, werarogu lomup o,” oluk mo’gulentesi.

19Asogo mo’gulentesimu, is ap Israel a’ge onuelak ebano en e,

“Helep a’bik werarogu lege sogoat weraruagoluk egesa ai pobuk wene e’gin a’ge nenebam pouwa hegi o,” oluk pobirak pegesa.

20Is ap ebano asogo enede eberak poluk at Firaun oruakma liplau wegesa ’gal e, Musa Harun emin is en ’gwelagentarok oruakma emin sarlok tigisa. 21Sarlok tigisarik e, disogo mo’gulentigisa,

“Edip his wiak togu legep ai pam e, ’gain osi enemin en nis nenebe modok enebirap nenebegesarik watnenebelip a’ge o. His togu legep ai Nenaik ’gain Onuk Logo a’ge aluk, holuk e, at en wene henebam pouwak o,” oluk mo’gulentigisa.

Musa en, “Asogo letnentasu legen erlak ai, nopaget,” oluk Allah mo’gulesi wene

22Is ap ebano en Musa iak asogo mo’gulentigisema, at Musa en Nenaik ’gain Onuk Logo a’ge pobuk disogo mo’gulesi,

“Hat en aphwami Israel a’ge wiak asogo tagenebasu legen ai nopaget? Ye, hat en an yo’go noboluk is ene’bek nopaget peraknobu egen? 23An at Firaun e’bek wegirik, hat honuk oluk wene mo’gulosu egi ai hwerli en, at en aphwami Israel a’ge e’gin-pe’gin tagenebasu modok oruakhweat de, hat en is delonobu erlakma en modok mo ese legen ai, nopaget?” oluk mo’gulesi.

Currently Selected:

Keluaran 5: Wul

Highlight

Copy