Keluaran 4

Allah en Musa elalin a’ge taga lemagoluk anni wogesi wene

1Asogo mo’gulesimu, at Musa en e, Nenaik ’gain Onuk Logo a’ge disogo mo’gulesi,

“Asogo e’gen a’geat de, an en wene asogo mo’gulentasuam e, aphwami Israel a’ge en,

Demat oso, oluk pobitu enebit en e, wene an en mo’gulentaik a’ge ai ukpogwi holuk no’gosogo tu o. Is en e,

Nenaik ’gain Onuk Logo a’ge hat horogolema inom erlak a’geat de, hiak esei ese legen, oluk ogwi holuk e, an en no’gosogo u o,” oluk mo’gulesi.

2Asogo mo’gulesimu, at Nenaik ’gain Onuk Logo a’ge en e, Musa disogo mo’gulesi,

“Hat he’gikmu tenak welegen ai no’gweat no?” oluk hin wesimu at Musa en e,

“Yu ’bouwa’gun tenak welegi o,” oluk mo’gulesi. 3Asogo mo’gulesimu, at Nenaik ’gain Onuk Logo a’ge en e,

“’Bouwa’gun ai ’gwiangma hwikhemin o,” oluk mo’gulesimu, at Musa en e, ’bouwa’gun ano ’gwiangma hwikhesi ’gal e, ’gosu de, agama ogorlok en ogoiyesogo perleneat libaga. 4Hweiye libagama, at Nenaik ’gain Onuk Logo a’ge en e, Musa disogo mo’gulesi,

“Hat hebe ’gosu eragam horoksogo woroguntik e, he’gik en agea’gum tenhemin o,” oluk mo’gulesimu, Musa ebe horoksogo wagarik e, ’gosu ano tenak pasuam e, pobuk e’gik pam eriano en perleneat togolik ’bouwa’gun aga. 5Asogo agama, at Nenaik ’gain Onuk Logo a’ge en e, Musa disogo mo’gulesi,

“Aphwami Israel a’ge en e,

Nene’balak Abraham emin, Ishak emin, Yakub emin, enaik ’gain Onuk Logo a’ge Allah ano demat Musa orogolema inaga hegi, oluk opou wagoluk is enil pam asogoat ti lu o,” oluk mo’gulesi.

6Nenaik ’gain Onuk Logo a’ge en Musa asogo mo’gulesirik, mesik disogo mo’gulesi,

“Hat he’gik mesik hosum ha’gul akhit a’ge ogola ’gwelabin o,” oluk mo’gulesimu, iak hologoat ’gwelabegeitik lebikpu otluk il ’gwelakhesi ’gal e, e’gik petne yebil hwena’go ’gela’ge onogorlok a’ge edip ebam agarik e, e’gik modok ’gut nak agama hesi. 7Asogo agama, at Nenaik ’gain Onuk Logo a’ge en e,

“He’gik togolik hosum ogola ’gwelabin o,” oluk mo’gulesimu, at Musa en e, asogo ’gwelakpesirik, lis holuk ’gwelakhesi ’gal e, e’gik petne yebil ebano modok erlak agama il hesi.

8Asogo aga lagama, at Nenaik ’gain Onuk Logo a’ge en e,

“Is en e, hat en mo’gulentagun a’ge ai demat oluk pobitu modok enebit holuk de a, at e, pobi tuagoluk elalin a’ge naduk togun a’ge ’bouwa’gun ’gosu a’ga a’ge ai enil holugat de, pobirak erlakma en togwi holuk de a, pobi tuagoluk elalin a’ge he’gik yebil en ’guraga a’ge ai pobuk togun ai pam en pobitu a’ge ema ani o. 9A’geat de, hat en, is en demat oluk pobi tuagoluk, elalin a’ge agauwa ’birenam togun a’ge enil holugat de, pobirak hobo enebit welat, hat en mo’gulentagun a’ge ano ukpogwi holuk, ik Nil a’ge weiyat holuk na’gogo wa’guntik en, ik ai ’gwiangma herlelip o. Asogo herlelisoam e, ik ano il mep nak ema ani o,” oluk mo’gulesi.

10Asogo mo’gulesi a’geat de, at Musa en e,

“Eige, naik o. An e, o naduk hwerli en, yogodak hwerli niak hegitsogo aphwami pobitu a’ge niak modok eselegi erlak o. Holuk e, pobuk hat en mo’gulnorogunmu en de, niak hegitsogo u miayat o. An niak modok dopnorak, holuk e, niak perleneat u modok mia ebi wiak eselegi o,” oluk mo’gulesi.

11Asogo mo’gulesimu, at Nenaik ’gain Onuk Logo a’ge en e,

“Sa en aphwami enemde heli’gogo pasu no. Ye, sa en eniak o’gut mennik pasulat, enesa’go lerak pasulat, tago no. Ye, sa en enil hepnik pasulat, dektak pasulat, tiso no. An henaik ’gain Nonuk Logo a’ge enat tagenebasu erlak no? 12Hat o yogodak yayat lu o. An en hat hiak u a’ge lethiasulat, mo’gulonto a’ge hegitsogoat mo’gulheselat, tik ani o,” oluk mo’gulesi.

13Asogo mo’gulesi a’geat de, at Musa en e, disogo mo’gulesi,

“Eige, naik o. Hat en yo’go noboluk peraknebagun no yo. We, is muon yo’go onoboluk peragonobomup o,” oluk mo’gulesi.

14Asogo mo’gulesimu, at Nenaik ’gain Onuk Logo a’ge olot het agarik e, Musa disogo mo’gulesi,

“Hat hue onuk Harun oruak ano erlak no? At e, weneane u re, iak modok hegit ai, An naluk o. At e, ebela ’go yu wemarik hemin sarlok tuogolugat oruak ani o. Hemin sarlok toguptik e, ogola agai hiouwa o. 15Hat at e’bek loluk, emin weneane eselat, at disogo mo’gulomup o. An en e, his hemin lethontoluk, his en ogup a’ge emin, togup a’ge emin, mo’gulhentaik ani o. 16At en e, hat honuk pam is aphwami enilem mo’gulontouwak o. At en hat hendema en u ’gela’ge, hat e, Allah ’gela’ge oroguntik, at en u a’ge at mo’gulosokhwe aphwami mo’gulentasu lemak o. 17Hat en ’bouwa’gun ai pam aphwami pobi tuagoluk elalin togun a’ge ai woluk lu o,” oluk mo’gulesi.

Musa togolik o Mesir laga wene

18Asogo mo’gulesimu re, at Musa ano togolik iemal Yitro owi pam lagarik, disogo mo’gulesi,

“An togolik o Mesir laiktik, an narilak ebano enelaluk oruak a? Erlak a, oluk nil entai laigoluk en mo’gulhegis o, naik. Elit lo a? Mia ya,” oluk mo’gulesimu, at Yitro en e, disogo mo’gulesi,

“Obat o. Lak o, nomlogo,” oluk mo’gulesi.

19Asogo mo’gulesimu, at Musa o Mesir lo erlakma en owan o Midian oruakma, Nenaik ’gain Onuk Logo a’ge en disogo mo’gulesi,

“Aphwami hat wathobuogoluk togu legesa a’ge ebano arat waregesa o. Holuk e, togolik o Mesir lak o,” oluk mo’gulesi. 20Asogo mo’gulesimu, at Musa ugwe emin, eiyagai emin, enede ’gagalegeitik e, enebe wam keledai o’borl pam lagabak enebesirik enemin o Mesir legesa. Lagalat, nenaik Allah en mo’gulentesi a’ge hegitsogoat, ’bouwa’gun ano woluk laga.

21Nenaik ’gain Onuk Logo a’ge en e, Musa disogo mo’gulesi,

“Hat e aphwami en pobi tuagoluk elalin a’ge taga lorogun en, An en nanni wokhegis a’ge ai ’berlegat at Firaun ai ilem ti lu o. Asogo ti lagun a’geat de, An en at ede modok helep ’gela’ge takpaikmu re, at en pobirak poluk aphwami Israel a’ge,

Lit, oluk mo’gulontouwa erlak ani o. 22Holuk e, hat en ’gain o Mesir a’ge ai disogo mo’gulomup o,

’Nenaik ’gain Onuk Logo a’ge en e, disogo egei,

Aphwami Israel a’ge ai an neiyagai naduk a’ge o. 23#Kel. 12:29Holuk e, an neiyagai a’ge eba an erliknebi louwagoluk peragenebemin o, oluk mo’gulhemagoluk egi a’geat de, hat en,

I o. Lit, oluk ese legen erlak. Ai en pobuk An en hat heiyagai naduk a’ge ’berlegat warenebik o, oluk egei, oluk mo’gulomup o,” oluk mo’gulesi.

24Asogo mo’gulesirigat de, at Nenaik ’gain Onuk Logo a’ge en Musa ebela’gwe wagalat o sum owi a’ge da werik ya werik waga legesa a’ge mesik werikmu ebano en e’bek wagarik ebe werigoluk tegei. 25Asogo tegeimu, at Musa ugwe Zipora en e, ’bisok helep a’ge mesik wesirik, emalik agap e’gerlimu a’ge ’balegeirik e, Musa oyuk pam dungtak pasulat disogo mo’gulesi,

“Hat e, Allah en mep yu pam ne’birek hwedik taknenebesi o,” oluk mo’gulesi. 26Asogo tegei ai re, Allah en e,

“Enagap ene’gerlimu a’ge asogo ’balonobogu lomup o,” oluk egei a’ge hegitsogoat tegei. Asogo tegeimu, at Nenaik ’gain Onuk Logo a’ge en Musa ebe woru erlakma en ukpesi.

27Asogo tagalat, Nenaik ’gain Onuk Logo a’ge en e, Harun disogo mo’gulesi,

“Musa o leimu aphwami erlakma oruak a’ge ano e’bek lak o,” oluk mo’gulesimu, at Harun wagarik, at Musa Allah u’gwarek odom pam ano oruakma e’bek wagarik e, hau emde motok-motok weregei. 28Asogo hau weregeimu, at Musa en e, Nenaik ’gain Onuk Logo a’ge en o Mesir togolik louwagoluk yo’go pasulat mo’gulesi a’ge ano ’berlegat mo’guleselat, aphwami pobi tuagoluk elalin a’ge tuagoluk mo’gulesi a’ge ebano ’berlegat mo’guleselat, tegei.

29Asogo mo’gulesirik e, Musa Harun emin o Mesir legesarik, aphwami Israel a’ge onuelak ’berlegat odogenebigisa. 30Asogo odoksogo enebegesarik e, Harun en e, Nenaik ’gain Onuk Logo a’ge en wene Musa mo’gulesi a’ge ebano ’berlegat mo’gulentesimu, at Musa en is pobi tuagoluk elalin a’ge ’berlegat is enilem tegei. 31Asogo tigisema, is ap ebano en, demat, oluk pobi tigisa. Is Musa Harun e’birek en,

“Nenaik ’gain Onuk Logo a’ge en his aphwami Israel a’ge il en wokhenebiselat, di obotut yu obotut hogumu il hentasulat, tegeimu ai o,” oluk mo’gulentigisema enesa’go hweligisarik e, ondogorlu pam hweriogo welat Allah erliktigisa.

Currently Selected:

Keluaran 4: Wul

Highlight

Copy