Keluaran 3

Allah en Musa yo’go pesi wene

1Eria hegit e, at Musa wam iemal Yitro eiye o Midian a’ge ano uam domba emin, kambing emin, o’gonise laga. Asogo o’goniselat, wam ebano wogonoboluk e, o leimu aphwami erlakma abel yema akhit wagarik, Allah u’gwarek odom Sinai pam waga. 2#Per. 7:30-34Eba malaikat ’gain Onuk Logo a’ge en yo’go ’belagonobou wago a’ge ebano mesik, e houtak a’ge pam odouk magale ’gwialise laga a’ge ano eragam ineigoluk waga. Wagarik, e houtak a’ge ano odouk magale ’gwialise laga a’geat de, e ebe odouk en nasu erlakhwe, at Musa il yethesi. 3Asogo tagokhwe il yethesirik, at Musa en e,

“Eige! E houtak a’ge ai odouk en nasu erlak ai re, elalin hwi a. An nebe horokho en de, nil hai laik o,” oluk epesi.

4Asogo epesirik, yethaigoluk lasuam, at Nenaik ’gain Onuk Logo a’ge e houtak a’ge ano ogola en il hesirik disogo mo’gulesi,

“Musa, Musa,” oluk mo’gulesi. Mo’gulesimu, at Musa en e,

“An nebe yu welegi o,” oluk mo’gulesi.

5Asogo mo’gulesimu, at Allah en e,

“Hat hebe an nu’gwarek no’gwiang pam edik welegen ai en, hat hebe horoksogo wom erlakma en eria welat hoyuk owi sandal no’gorlogo eba pemen o. 6Hat he’balak Abraham emin, Ishak emin, Yakub emin, enaik Allah anat o,” oluk mo’gulesi. Asogo mo’gulesimu, at Musa il Allah yetho ogorlok agama, orogole orlomu tegei.

7Asogo orlomu tegeimu, at Nenaik ’gain Onuk Logo a’ge en e, disogo mo’gulesi,

“An neiyagai Israel a’ge aphwami Mesir a’ge en eneragam a’ge ’gela’ge tenentarok welat, e’gin-pe’gin tagonobogwiam delonobuagoluk yo’go nobogwi modok welagai ai, An arat nil entasulat, nesa’go hweliselat, tegis o. Is di e’gin yu e’gin hogwi ai An ’berlegat naluk o. 8Ai en, An en is aphwami Mesir a’ge en tenentarok oruak ai delogo wogonoboluk o eba en o mesik modok lok opma eba laigoluk ’bu egi o. O eba re, ’gwiang modok esei a’bik en di a’ge yu a’ge no’gwi a’ge modok a’bikmu re, yogodak aphwami ena’gul onuk Kanaan a’ge emin, Het a’ge emin, Amori a’ge emin, Feris a’ge emin, Hewi a’ge emin, Yebus a’ge emin, oruak o. 9Aphwami Israel a’ge Mesir a’ge en sebelogo tenentarok oruakhwe nge togwi a’ge ai An nil entasulat, eniak nesa’go hweliselat, tegis o. 10Hat en An neiyagai Israel a’ge o eba en wogonoboluk liplau worogun en e, yogodak ap Firaun ano e’bek lak o,” oluk yo’go pesi.

11Asogo yo’go pesimu, at Musa en e, disogo mo’gulesi,

“An nebe yu mia a’ge welegi yu re, ap ’gain Mesir a’ge ano e’bek loluk, aphwami Israel a’ge elit wogonoboluk liplau wom a’ge paget en mo’gulnigen a? Mia o,” oluk mo’gulesi.

12Asogo mo’gulesimu, at Allah en e,

“An en lethiaik o. Aphwami en e, Musa Allah en demat yo’go pesirik perakpou wagama, oluk enagat pobirak hobouagoluk, hat en aphwami Israel a’ge o Mesir en wogonoboluk worogun holuk e, dom yu pam en An erliknobua ani o,” oluk mo’gulesi.

13 # Kel. 6:2,3 Asogo mo’gulesimu, at Musa en e,

“Asogo e’gen a’geat de, an aphwami Israel a’ge ene’bek laiktik an en e,

Nene’balak enaik Allah en e, yo’go nebesirik hene’bek peraknobou waga o, oluk mo’gulentasuam, is en e, wene disogo modok demat hin wokniouwa epegi o,

At ai onuk sa, oluk hin wokniogwiam e, An en honuk no’gosogo mo’gulonto epegen?” oluk mo’gulesi.

14 # Wah. 1:4,8 Asogo mo’gulesimu, at Allah en e,

“An e, An Nebe Notok Modok Welago A’ge at o.

Aphwami Israel a’ge disogo mo’gulontomup o,

At en e,

An Allah Nebe Notok Modok Welago A’ge, oluk oso a’ge ano en hene’bek peraknobou wagama wegi o, oluk mo’gulontomup o. 15Ye, mesik e, yu mo’gulentagun ene mo’gulheik ai o,

An e, his hene’balak Abraham emin, Ishak emin, Yakub emin, Enaik ’gain Nonuk Logo a’ge Allah ano en hat yo’go hebegirik is ene’bek perakhebegi o. An nonuk e, Nenaik ’gain Onuk Logo a’ge, oluk ogwi modok wolorogup a’ge anoat o. An nonuk ai re, aphwami pobuk dagetil laga lema a’ge ’berlek en ogwi modogat welema ani o. 16Aphwami Israel a’ge onuelak ’berlegat odogenebi lak o. Asogo laguntik e,

His hene’balak Abraham emin, Ishak emin, Yakub emin, enaik Allah ano an arat norogolema inaga o. Inagarik e disogo mo’gulnesi,

An his aphwami Israel a’ge is aphwami Mesir a’ge en takhonobogwi ai, An arat nil henta’bu egi o. 17Nil arat hentegistik, aphwami Mesir a’ge en e’gin-pe’gin takhonobogwi a ’ge ai delogo wokhonoboluk o ’gwiang esei opma di a’ge yu a’ge no’gwi a’ge modok a’bikmu aphwami ena’gul onuk Kanaan a’ge emin, Het a’ge emin, Amori a’ge emin, Feris a’ge emin, Hewi a’ge emin, Yebus a’ge emin, welagaimu eba wokhonoboluk laigoluk wene arat egimu o, oluk egei oluk e, mo’gulontomup o. 18Asogo mo’gulentagunmu, is neiyagai en hat hiak enesa’go holua o. Holuama re, hat aphwami Israel a’ge onuelak enemin at Firaun ano e’bek laguptik e, disogo mo’gulomup o,

Nis aphwami Ibrani a’ge Nenaik ’gain Onuk Logo a’ge Allah nonorogolema inaga o. Holuk e, o leimu aphwami erlakma ebela we, agauwa henagan pam nak lagalat arat ’gwi lagaimu eba loluk Nenaik ’gain Onuk Logo a’ge Allah paget wam di a’ge yu a’ge wusogo odouk narlesi louwogoluk en e, hat en,

Lit o, oluk mo’gulnentagun en wege o, oluk mo’gulesi lu o,” oluk mo’gulesi. 19Asogo mo’gulesirik, pobuk ogo disogoat mo’gulesi,

“At ap Firaun ai en,

Obat. Lu o, oluk mo’gulhontouwa re erlak ani o. We, An enat nannisogo mo’gulummu nak e,

Elit, lit, oluk u ai re An nalugat o. 20Holuk e, An nanni pam aphwami Mesir a’ge di wene yu wene onogorlok a’ge enebam pasulat wiagap enebaik ani o. Asogo tagenebasuam en nak e,

Lit o, oluk mo’gulhontouwa o. 21#Kel. 12:35,36An en, aphwami Mesir a’ge en his hau do’goksogo wathonobuagoluk takhenebaik ani o. Asogo takhenebaikmu, neiyagai wema ai erlige hene’gikmu erlak a’ge mesik worogup erlak o. We, woluk nagat worogup ani o. 22Hwami Israel a’ge enebe lo’bok en aphwami Mesir a’ge enemin o seli mesikmu welagai a’ge emin, hwami Mesir a’ge onowi pam emin mesikmu welagai a’ge emin, onosum ’buktogwi a’ge emin, enalli a’ge perak emas a’ge emin, ’gonu mo’gulentagupmu wokhontouwa o. Asogo wokhontogwi holuk, henemalik ’buktak onobogulat, wantak onobogulat, tip o. Asogo togup ai pam di a’ge yu a’ge aphwami Mesir en a’ge his modogat hwerlagup ani o,” oluk mo’gulesi.

Currently Selected:

Keluaran 3: Wul

Highlight

Copy