Keluaran 27

’Gain Onuk Logo a’ge ebaget wusogo odouk narlogulomma ebale hele’gu wene

1Mo’gulesirik, pobuk emin mo’gulontouwak oluk, mo’guleselat,

“An ’Gain Nonuk Logo a’ge nebaget wusogo odouk narlogulomma ebale hele’guak oluk, e orlobuk a’ge pam yat akhit emin horok akhit emin 2,25 meter, hegit-hegit nak yat akhit legeik, uak edikpo a’ge ai re, 1,35 meter nak takpoluk pouwak o. 2E o’gut ugan a’ge pam edikpil louwa a’ge eriano ologun petne, sapi iak ’gela’ge hele’gik a’ge ebano petne, tembaga a’ge pam egelik poluk annisogo diptak welemagoluk, oyuk yogo pil louwak o. 3Ye, e narlogulat, yabuk togulat ul orloksogo lebikpogwi a’ge ebale emin, ul orlok togwi a’ge uong emin, ik herle logwi a’ge ik e’be emin, wam eino yegerlogwi a’ge heil emin, odouk e’gen orlok togwi a’ge emin, ’berlegat tembaga a’ge pam nak heli’gogo-heli’gogo pogulat, tuak o. 4Besi tembaga a’ge pam kawat ebale odouk e’gen ’bilasu lemagoluk delak poluk e, besieme’gen tembaga a’ge pam tigene ikho ogut-ogut 4 pam ebano takpil laga lemarik, 5kawat ebe tigene egeik a’ge ai ebe wokho mezbah ebale ai ’burl o’gwe pei lotluk e, wali’gogo honogo pogulat tuak o. 6-7Odouk mu’gwalogumu tigene egeik a’ge abel pema-pema lo’boktakma ebano ’gwelebak poluk, e yesogo woluk no’gulat togu lemagoluk, e orlobuk lologo tembaga a’ge pam lo’boktak poluk, ’gwelebak pogulat, 8ye, odouk mu’gwalogumu e a’ge pam hele’gu a’ge ogola ebano emde husogo pogulat, tuak o. Odouk mu’gulogulomma ebale, disogoat hele’gu ani o, oluk, dom pam en mo’gulhegis a’ge yu, hegitsogoat tuak oluk, ne’gik pam hele’gik poluk wokhegis a’ge emin, niak pam mo’gulegis a’ge emin hegitsogoat tuak o,” oluk mo’gulesi.

’Gain Onuk Logo a’ge owi sabo werik poluk leget wo wene

9-10Asogo mo’gulesirik, mesik emin mo’guleselat, “O sabo werik poluk legerat wouwak o. Wogulat e, tenaga’ge tiang edikpo re 20 a’ge ebano pam tembaga a’ge pam heli’gogo ebelak poluk oyuk hele’gik pogulat, perak a’ge pam herle ’bungtak emin, ye, het tilouwak oluk, owak edik a’ge ologun pam hettak po a’ge ebano emin ebelak pogulat e, 20 a’ge ologun ebano pam hettak pil lagalat takpoluk, o abel sogweik akhit o’gwe werik pil lagalat, hwerli meter 45 pam takpil laga lemarik sum ebak a’ge kain herle menya esi pok sakhorak a’ge pam modok opsogo, sepnik pil lagalat. 11Ye, o abel ligakhit e, e tiang 20 pam edikpoluk oyogut tembaga a’ge pam hele’gik pogulat, herle annisogo ’bungtak welemagoluk paku ebano emin dipsogo ningtak welemagoluk hele’gik pogulat, o leget ologunmu en e perak a’ge pam, leget ologunmu 45 meter hwerli wogo poluk, sum kain lenan il op a’ge pam ikho ’belebak pil louwak o. 12Leget mo obuk ilasu akhit o’gwe tenaga’ge tiang 10 oyuk heli’gogo-heli’gogo nak ’belabil lagalat, meter 23 hwerli nak pil laga lemarik, sum ebak egeik a’ge ano sepnik pil legesa, 13ye, o mo orlu ago akhit o’gwe re, asogo nagat meter 23 hwerli nak pil lagalat, 14’goduk hele’gu a’ge lolu’gwe re, abel pema akhit tenak a’ge tiang 3 oyuk oruak a’ge nak heli’gogo edikpoluk kain ebak yat a’ge meter 6,75 a’ge sepnogo ’belebak po’bu agalat, 15ye, ’goduk pema ’gwe re, asogoat tenaga’ge tiang 3 oyuk heli’gogo-heli’gogonagat edikpoluk, kain ebak a’ge yat meter 6,75 a’ge sepnogo ’belebak po’bu agalat tuak o. 16Asogo togu lemarik, ’goduk hele’gu ’gwe ano re, tenaga’ge tiang 4 oyuk heli’gogo-heli’gogo nak edikpoluk, herle menya esi ’gela’ge op sakho tak modok opsogo tuelak a’ge emin, herle tuelak il lalu ’gela’ge emin, ’borlu ’belak a’ge emin, herle il momi-momisogo tak a’ge emin, ap mesik sum il da’bal egesiso aluk a’ge en sum ebak yat meter 9 a’ge walhegeik egesiso holuk e, tenaga’ge tiang 4 eriano pam en sepnogo ’belebak po’bumak o. 17Leget yeling-waling tenaga’ge tiang belabua’ge ebano ’berlegat tembaga a’ge pam nak abel pema-pema hele’gogulat, tiang ebano pam ennak herle ’bungsogo re, paku perak herle tenaga’ge a’ge pam hele’gik pil louwak o. 18Leget hebat tiang e, yat akhit e, 45 meter, ye, no’gorlik horok akhit e, 22 setengah meter. Legeik akhit e, 2 seperempat meter pam hele’gogulat ’berlegat ai sum il op ’gura’ge pam nak wogo poluk e, wali’gogo pouwak o. E tiang oyogut lo’bok e tembaga a’ge pam nak wali’gogo pouwak o, oluk, mo’gulesi. 19Alat yabuk togwi a’ge an nowi ogola welema a’ge ’berlegat ai emin, nowi sum a’ge werikmu hebat e tiang edikpil louwa a’ge ai petne emin. Neleget, hebat pam en herle lisogo paku pam wosuom a’ge onuk tenaga’ge emin ano emin e, tembaga a’ge pam nak hettak pogulom a’ge ebale hundomok heli’gogo pil louwak o,” oluk mo’gulesi.

Esaga heberluok oluk togulat togulom a’ge paget mo’gulentesi wene

20Mo’gulesirik, mesik emin mo’guleselat,

“Esaga modok heberlogo atiarak nak welemagoluk, aphwami Israel a’ge en e zaitun e’gen a’bosu modok op a’ge na’gogo wokhosumak oluk mo’gulontomup o. 21An nowi sabo woru a’ge ogola wene werak ’belak a’ge yagarak wolomma peti ogola eba oruakhwe, ’burl sum sepnogo ’belabuom a’ge ano o’borlma nemin hwedik togulomma asuama ebano Harun eiyagai enemin en an nilem o hopmu en ’bekhit hwerli, esaga heberlak nak welemagoluk, eiye welemak o. Asogo tu ai re, aphwami Israel a’ge eneiyagai ene’balak weiyal etil lagai a’ge ebano enemin modok-modok togu lemagoluk wene yu hwalogo pegi ai o,” oluk at Musa mo’gulesi.

Currently Selected:

Keluaran 27: Wul

Highlight

Copy