Keluaran 15

Weni edip Musa en egei wene

1 # Wah. 15:3 At Musa aphwami Israel a’ge enemin en Allah erliktuogoluk weni edip disogo egei,

“Nenaik ’gain Honuk Logo a’ge,

hanni erlikhobogu lege a’ge,

arat mi-miarak enebegen ai en,

an hat hebaget weni werik o.

Aphwami Mesir a’ge enebe ’berlegat,

ono kuda o’borl pam ligegesarik,

wegesa a’ge ebano,

’berlegat ik ye’gelak a’ge ano olomu hwigentigen o.

2 # Mzm. 118:14; Yes. 12:2 Nenaik ’gain Honuk Logo a’ge,

hanni a’bik a’ge en,

an nebe erlele woknebigen o.

Hat enat an delnebigen o.

An naik Allah haratma re,

an en harat erlikhebik o.

An ne’balak en,

Allah erlikhobogulat welegesa ’gela’ge,

an en hat honuk logo paik o.

3Naik ’gain Honuk Logo a’ge o,

weim hebam harowiak a’ge o.

Naik e, ’gain Honuk Logo a’geat o,

honuk ebe re aiyat o.

4Is ap tentara Mesir a’ge,

ene kereta ’berlegat emin,

ik laut ye’gelak a’ge ano olomu enebegen o.

Is ap tentara a’ge onuelak,

weim enebam harowiak a’ge,

ik Laut Merah ye’gelak a’ge ano olomu enebegen o.

5Ik olomu asogo enebegenma,

helep e’gen ik olomu ’belakpogwiam,

’bekhit orogobu dung ’biso ai ’gela’ge,

is enebe ik ye’gelak a’ge ano en haumsogo ne’gei o.

6’Gain Honuk Logo a’ge naik,

hat he’gik ’bekhit akhit en hanni pam elalin a’ge tigen o.

Hanni onogorlok a’ge ai pam,

selei a’ge ’berlek perlengsogo warenebigen o.

7Hanni a’bik erlikhobogu lege a’ge ano pam,

hat hiak sagaluogoluk togwi a’ge,

enebe ’berlegat erlagap enebegen o.

Hat holot het e, odouk magale,

lobuk-lebaksogo nasu ai ’gela’geatma re,

is ai e’gela lei nasu ’gela’ge,

is enebe odouk ne’gei o.

8Ik ye’gelak a’ge ano,

hemde a’ge pu hegenma re,

ik ano le’get ’gela’ge inaga o.

Ik ’bule ’gela’ge wusogo edik modok mo egeimu re,

nenebe ik alo’gwe elirat wege o.

9Nis neneselei a’ge en ogulat e,

An en mugonoboluk laiktik,

is enebe tenagenebaik o.

Ne’garok lisogo weiktik,

enebe modok erlagap enebaik o.

Enebe erlagap onoboluk,

ena’ge ’berlegat delogo hwerlasulat,

is logon so’busogo wogontogulat,

an nogum ningap poluk,

neling-nalongsogoat weleik o,

10oluk egei a’geat de,

Nenaik ’gain Honuk Logo a’ge en,

hemde a’ge mesik erlige lebikpasuam,

is Mesir a’ge ik olomu enebegen o.

Is enebe helep e’gen e’gin a’ge,

ik ogola ’bekhit ’biso ’gela’ge,

ik o’borlogouk onogorlok a’ge pam,

’bekhit hwikenta ’bigen o.

11Aphwami logon enasua a’ge pam,

he’berik welagai a’ge ai re,

hat ’gela’ge mesik modok erlak o.

Hat homuat degelak modok oruakma erlikhobogwi.

Hebe pobi hobuagoluk elalin a’ge,

loksogo tigen ai ’gela’ge,

sa ’gela’ge en asogo tu no. Erlak o.

12He’gik ’bekhit akhit en o,

neneselei a’ge enebaget perakpegenma,

enebe ’gwiang en arat perlengsogo ne’gei o.

13Hat en wene werak nenebegen a’ge,

hegitsogo tigen ai.

Nis nenebe delnenebigentik,

woknonoboluk waga legen.

Hat hanni a’bik ano pam,

sennentarok welegen o.

Hat hu’gwarek howi pam,

woknonoboluk laigoluk waga legen.

14Aphwami ena’gul onuk lo’bok logon,

enesa’go holuarik, enarogun a’bik louwa ani o.

Aphwami Filistin a’ge emin,

15aphwami Edom a’ge onuelak emin,

enesa’go holuarik, onuak lup ’bo pouwa o.

Ap Moab a’ge weim enanni wiak a’ge,

onogorlok en onuak omo’gok lebe ua o.

Aphwami Kanaan a’ge enede erlak ema ani o.

16Naik ’gain Honuk Logo a’ge en,

hat en tigen a’ge ai,

is mu a’ge en mo’gulontoma,

onogorlok a’bik ema o.

Hat heiyagai neneselei a’ge,

onowi lo’gwe lagaihwe,

wik-wiak tagonobo mia o.

Nis heiyagai delnenebigen a’ge ai,

ebela selagat opsogo lul en e.

17O hat hebe weleigoluk egenma ebano,

wogonoboluk loma o.

Is hat hu’gwarek hodom pam eba welema o.

O hat hu’gwarek en werigenma eba welema o.

18O eba oruakhwe,

hat nis Nenaik ’Gain Honuk Logo a’ge welat,

tenentarok modok wolorogun ani o,”

oluk weni werigisa o.

Weni edip hwe Miryam en egei wene

19Aphwami Israel a’ge ik ye’gelak a’ge ano ’balogo liplau wagalat, ik dengtak o’gwe ik’berlik petne liplau wegesa. Asogo a’geat de, aphwami Mesir a’ge ene kereta ’gela’ge emin, ono kuda emin, enebe kereta pam welat woluk no’gwi a’ge emin, ik ye’gelak a’ge ano ’balogo liplau wagaimu Nenaik ’gain Onuk Logo a’ge en ik mesikmu la’bulik pasulat, sebelenebegei.

20Asogo sebelenebegeimu, at hwe Miryam Harun ebap ebe Allah iak mo’gulentasu laga a’ge ano en a’ge, erledeng hogwiam iak oso a’ge mesik wesimu re, hwami logon ’berlegat is ena’ge weni worogulat erledeng hogwiam wegesarik erledeng hogulat e, enemin weni lak-wak ogulat werigisa. 21Weni worogulat, at Miryam weni edip lebiselat disogo egei,

“Nenaik ’gain Honuk Logo,

hanni erlikhobogu lege ano pam,

arat mi-miarak enebegen ai en,

hat hebaget weni woruok o.

Aphwami Mesir a’ge ’berlegat,

ono kuda pam ligegesarik,

wegesa a’ge ebano,

’berlegat ik ye’gelak a’ge ano pam hwigentigen o,”

oluk weni werigisa.

Ik erle wiak en tigisa wene

22Pobuk at Musa en aphwami Israel a’ge ik Laut Merah ye’gelakma ebano en wogonoboluk o leimu aphwami erlakma o onuk Syur waga. Agauwa henagan pam wagalat ik modok erlakma waga legesa. 23Asogo waga legesarik, o onuk Mara eba ik modok erle wiak en no modok miama eba wegesa. Ik oduk modok erle wiak ai en, o eba onuk nis neniak pam ik oduk erle wiak u ’gela’ge, is eniak pam, Mara oluk ogumu ebano wegesa ai o. 24Ai en e, is aphwami ebano ’bou togulat Musa disogo mo’guligisa,

“Nis ik ’geba a’ge nul no?” oluk hin wokhegesa.

25Asogo mo’gulegisema, at Musa se’ban edemu en Nenaik ’gain Onuk Logo a’ge ’gonu mo’gulesimu, at en, e porloktak a’ge mesik onukhesimu, at Musa en e ano ik olomu hwikha ’begeimu re, ik ano erle erlak op agama aphwami en elit no a’ge aga.

O eba Nenaik ’gain Onuk Logo a’ge en aphwami Israel a’ge en togulom a’ge wene ’balogo wogontogulat, enebabut ’baligoluk tagenebasulat, tegei. 26Asogo tiselat, disogo mo’gulentesi,

“His en modok demat an niak hologo togulat, an en ai op oluk epasu legi a’ge aiyat togulat, an en,

Disogo togu lomup, asogo togu lomup, oluk henesa’go wusogo mo’gulhentegis a’ge aiyat hegitsogo togu lomup o. Asogo togu lorogup holuk e, an en di obotut yu obotut aphwami Mesir a’ge enebam pegi a’ge ano ’gela’ge mesik henebam paik erlak o. His henebe selang uagoluk obotut a’ge obaphenebise legi a’ge henaik ’gain Nonuk Logo a’ge re, anat o,” oluk mo’gulentesi.

27Arat asogo toluk e, is o onuk Elim eba arat wegesa. O eba ik elaruk ebe 12 pam libaga laga. Ye, eremna ’gela’ge onuk kurma edip 70 pamat welaga. Asogo oruakma is ebano o tabo sum owi a’ge pam ik esa’goma ebano horoksogo werigisa.

Currently Selected:

Keluaran 15: Wul

Highlight

Copy