Keluaran 14
14
Aphwami Israel a’ge en ik Laut Merah ye’gelak a’ge ’balogo liplau wegesa wene
1Pobuk Nenaik ’gain Onuk Logo a’ge en Musa disogo mo’gulesi,
2“Aphwami Israel a’ge pobuk togolik loluk o tabo sum a’ge o kota Baal-Zefon eragam o kota Migdol ho’gorlakma, ik Laut Merah ye’gelak ho’gorlakma o kota onuk Pi-Hahirot orogole hegit eba wesi louwagoluk mo’gulontomup o. 3At Firaun ede en e,
Aphwami Israel a’ge ebano o leimu aphwami erlakma ebela nal egesarik horok yema no’gwi, oluk opouwa o. 4Asogo epasu holuk, An en, at ede modok helep ’gela’ge takpaikmu re, his mukhonoboluk wema ani o. Asogo a’geat de, An en at ’gain osi tentara enemin an nanni onugentaikmu re, is en e,
At Allah ’gain Onuk Logo a’ge ebe arat o, oluk pobirak noboluk enaluk ema ani o,” oluk mo’gulesimu, is aphwami Israel a’ge en e, at Nenaik ’gain Onuk Logo a’ge en mo’gulentesi hegitsogoat tigisa.
5Asogo tigisema, is aphwami Mesir a’ge logon en e,
Aphwami Israel a’ge arat ’bok legesa, oluk egesema at ’gain ano esa’go hwelegeirik e, at osi enemin en e,
No’gosogo tige lo’gwe, nebit e, oluk enede epegesarik e, disogo egesa,
“Nis e, no’gosogo tul epegep. Nis neneragam a’ge modok erlak emagoluk, is aphwami Israel a’ge ai,
Lit o, oluk mo’gulentige ai re, nopaget,” oluk egesa. 6Asogo egesarik at ’gain osi weim obu a’ge pulogo enebasulat, kereta ’gela’ge weim obogwi a’ge pulogo pasulat, tegei. 7Asogo pesirik, at ebe emin, ye, kereta ebe 600 modok op a’ge at osi tentara ’gain a’ge en woluk emin, is logon kereta woluk lagai a’ge ’berlek emin, enemin wegesa. 8At Nenaik ’gain Onuk Logo a’ge en at ’gain ede modok helep ’gela’ge takpesimu no oluk e, aphwami Israel a’ge Nenaik ’gain Onuk Logo a’ge en wogonoboluk o Mesir en liplau wegesarik wagaimu mugonoboluk waga ai o. 9Wagalat, tentara Mesir a’ge wam kuda woluk ’berlegat emin, aphwami kereta woluk no’gwi a’ge emin, enemin en aphwami Israel a’ge mugonoboluk ik ye’gelak ano esa’goma o Pi-Hahirot eba o Baal Zefon hegit eba wegesarik, o tabo sum owi a’ge werigisarik oruakma eneberl wegesa.
10Asogo wagaimu, aphwami Israel a’ge en at ’gain Mesir a’ge osi tentara enemin wagaimu enil entigisarik e, onogorlok a’bik agama,
“Nenaik ’gain Onuk Logo a’ge, delnenebin o,” oluk eniak loksogoat mo’guligisa. 11Asogo mo’guligisarik, Musa disogo mo’guligisa,
“O Mesir aphwami ’gwiang ’balogo salonobogumu ebale erlak en yema woknonoboluk wegen a? Hat tigen pam en, yu ema yu yethemin. 12Nis en wene ema a’ge yu paget nadugat o Mesir en mo’gulhogulat e,
Nis aphwami Mesir a’ge eneragam a’ge nak wolomma re, asogo mo’gulnentagun o, oluk arat mo’gulheige epegi. Asogo mo’gulheige a’geat de, aphwami Mesir a’ge eneragam a’ge ebayat wolom a’ge, o leimu aphwami erlakma yema woknonoboluk wegenma re, waromul yema re, op epegen a?” oluk mo’guligisa.
13Asogo mo’gulegisema, at Musa en e,
“Honogorlok hagup o. Henede ha’buksogo welemis o. Nenaik ’gain Onuk Logo a’ge en delnenebigoluk mesik tisoma henil hagup ani o. Aphwami Mesir a’ge henil entigep a’ge ai re, pobuk henil entagup modok erlak o. 14His en logon modok togup erlak o. We, Nenaik ’gain Onuk Logo a’ge en ebe nis nenakhit emarik is warenebigoluk tua a’ge oruak o, his en mesik disogo yusogo togup no yo,” oluk mo’gulentesi.
15Asogo mo’gulentesimu, at Nenaik ’gain Onuk Logo a’ge en e, Musa disogo mo’gulesi,
“Delhonobuagoluk hiak loksogo ese legen ai nopaget. Aphwami Israel a’ge ’bekhirat louwagoluk mo’gulontomup o. 16Hat en, ho’bouwa’gun ai lekholuk ik ye’gelak a’ge ai ogum hegitsogo ’bilhasuam e, ik ’balogo legeik lasulat, ’belak wagalat, tisoam e, aphwami Israel a’ge ik deng osoam ik’berlik petne toluk ’balogo loborogup en tip o. 17An en aphwami Mesir a’ge enede helep ’gela’ge takpegimu re, mukhonoboluk modok wagaimu An nanni pam at ’gain Mesir a’ge ebe emin, osi emin, tentara esan logolak ebano emin, onuam kuda emin, ap ’gwiangso woluk wema a’ge emin, onugentasulat mesik tagenebaikmu An erliknobua a’ge oruak o. 18Asogo tagenebasukhwe aphwami Mesir a’ge onue at Firaun emin, kereta pam weim togwi enaluk a’ge emin, onuam kuda pam weim togwi enaluk a’ge ebano emin en, An nebaget e,
At ’gain Onuk Logo a’ge Allah ai demat o, oluk pobirak nobouwarik enaluk ema ani o,” oluk mo’gulesi.
19Asogo mo’gulesirik, malaikat Allah a’ge mesik aphwami Israel a’ge esan logolak onorogolema waga laga a’ge ano hegilogo ono’borl akhit lasuam e, o hena ogola edik welaga a’ge ano hegilogo, 20aphwami Mesir a’ge esan logolak welegesa ho’gorlak, aphwami Israel a’ge esan logolak welegesa a’ge ano ho’gorlakma lagarik e, modok-modok welaga. Asogo welat, at o hena edik welaga a’ge ano en is aphwami Israel a’ge enakhit e o dakharak enebasulat, ye, is Mesir a’ge enakhit e, o hiktak pesimu re, hiktak nodog oruakhwe aphwami Israel a’ge esan logolak ebano is Mesir a’ge esan logolak enemin horoksogo mesikmu om e, modok mia aga.
21Asogo oruakhwe, at Musa e’gik ik ye’gelak a’ge ano ogum hegit ’bilhau wagama, Nenaik ’gain Onuk Logo a’ge en sogwei o mo yegelogo orlu ago hegit en annisogo perakpou wagama ik ye’gelak a’ge ano ’burl hialegei. O hup hwedik sogwei ano punhau wago modok mo egeimu, ik ye’gelak ano modok hialegei ano pam modok deng egeitik e, ’gwiang hebarligen aga. 22#1Kor. 10:1,2; Ibr. 11:29Asogo tagoam, ik ano ’biren me’giregeimu, aphwami Israel a’ge ik ye’gelak a’ge ano deng egeitik, ik omugwe ligakhit belagakhit leget ’gelage’garoksogo werik oruakhwe ik al petne liplau wegesa. 23Asogo wegesema, aphwami Mesir a’ge wam kuda emin, kereta emin, o’borl pam ligegesarik, aphwami Israel a’ge mugonoboluk ene’berlik modok ik ye’gelak a’ge ano ede ’burl ’gu egesa. 24’Gu egesema, o hirl mogolisokhwe Nenaik ’gain Onuk Logo a’ge odouk emin, o hena emin, edik welaga a’ge ogola en tentara Mesir a’ge il yerentesirik e, modok wiagap enebegei. 25Ene kereta oyuk seberlep a’bik ene ’bekhitsogo ene’bek lo a’ge modok mia aga. Asogo takpesimu, is aphwami Mesir a’ge en e, disogo egesa,
“Aphwami Israel a’ge enaik ’gain Onuk Logo a’ge is enakhit agarik nis watnenebigoluk tago hegi o. Holuk e, nis yogodak ya enat hweiye ’bok lul ene manis o,” oluk egesa.
26Asogo egesema, Nenaik ’gain Onuk Logo a’ge en Musa disogo mo’gulesi,
“Ik togolik wagalat e, aphwami Mesir a’ge enebe emin, ene kereta emin, tentara kuda o’borl pam wagai a’ge emin, sebelonobuagoluk e, he’gik ik ogum hegit ’bil ai lak o,” oluk mo’gulesi. 27Asogo mo’gulesimu, at Musa e’gik ik ye’gelak a’ge ano ogum hegit ’bilhai lagama, o hirl mogolisokhwe ik togolik naduk welaga ’gela’geat aga. Asogo agama, aphwami Mesir a’ge ebano enebe deluogoluk walhegesa a’geat de, Nenaik ’gain Onuk Logo a’ge en enebe modok ik olomu enebesi. 28Ye, asogo togolik ik ano ebis agalat aphwami enebe ene kereta ogola welegesa a’ge emin, tentara en aphwami Israel a’ge mugonoboluk ik ye’gelak a’ge ano ede ’burl ’gu egesa a’ge logon ’berlegat enemin, sebelenebegeimu waregesa.
29Asogo waregesa a’geat de, aphwami Israel a’ge ik ye’gelak a’ge ano dengsogo erabu akhit orogobu akhit mo egeimu ik alo’gwe toluk liplau wegesa a’ge ebano nak e, obat liplau wegesarikmu en, 30at Nenaik ’gain Onuk Logo a’ge en aphwami Israel a’ge ebano Mesir a’ge en waronobuogoluk wagaimu delenebegeirik aphwami Mesir a’ge warenebegei a’ge ebano enebe werak yegerlogo ik esa’goma lebigonobou waga a’ge ebano is Israel en enil hegesa. 31Asogo lebigonobou wagama aphwami Israel a’ge en enil entigisarik,
Nenaik ’gain Onuk Logo a’ge anni a’bikmu aphwami Mesir a’ge mi-miarak onoboluk warenebegei ai nonogorlok o, oluk a’bik erliktigisarik, enede Nenaik ’gain Onuk Logo a’ge Allah ebam he’berik pogulat, eragam a’ge Musa ebam he’berik pogulat, tigisa.
Currently Selected:
Keluaran 14: Wul
Highlight
Share
Copy
Want to have your highlights saved across all your devices? Sign up or sign in
