Keluaran 11

Sogo a’ge pam Musa en, “Malik naduk a’ge ’berleksogo warema ani o,” oluk obok mo’gulentesi wene

1Asogo agama, pobuk at Nenaik ’gain Onuk Logo a’ge en Musa disogo mo’gulesi,

“An en at Firaun emin, aphwami at en a’ge ’berlegat emin, wene mesigarat ologun pam mesik enebam paik o. Asogo enebam pasuam, at en e,

Lit, oluk en e, henebe ’berlegat mukho lebikhonobua ani o. 2Ai en e, aphwami Israel a’ge ’berlek enemin weneane opsogo ip o. Ogulat, is en aphwami Mesir a’ge logon o enemin horoksogo welagai a’ge enalli a’ge emas a’ge emin, perak a’ge emin, ’gonu uagoluk mo’gulontomup o,” oluk mo’gulesi. 3Asogo mo’gulesirik, at Nenaik ’gain Onuk Logo a’ge en e, aphwami Mesir a’ge ena’ge is aphwami Israel a’ge enedesogo wogontouagoluk tagenebesi. Ye, at ’gain ano osi en emin, aphwami Mesir a’ge logon ’berlegat emin, Musa modok onogorlogap pogu legesa. 4Asogo togumu, at Musa en at Firaun ano disogo mo’gulesi,

“Nis Nenaik ’gain Onuk Logo a’ge en e, disogo egei,

An nebe o yogodak huba’go o Mesir di owi yu owi yema nese leik o. 5Asogo nosoma aphwami Mesir a’ge heneiyagai ap naduk a’ge enebe lo’bok ’berlegat warema ai o. Ai re, hat ’gain homlogo naduk a’ge hebalema ’gain ema hwerli en ’bekhit hwami heneragam a’ge so’boru gandum e’gen sagalogwi a’ge enemalik hwerli emin warema o. Ye, honuam ebe lo’bok ’berlegat malik naduk dogo a’ge ’berlegat warema o. 6Asogo waragaiam, aphwami o Mesir di owi yu owi ’berlegat o naduk lo’gu asogo tu erlagat, ye, pobuk lo’gu asogo tua erlagat a’ge de, we, mesik erlige aiyat, lo’gu modok a’bik tua o. 7Asogo a’geat de, aphwami Israel a’ge onowi lo’gwe nak e, aphwami enebe emin, wam emin, mene en hwelaik enebiselat, derlelenebiselat, tua modok erlak o. Asogo tisoma henil holuk, his en,

Ai aphwami Israel a’ge enaik ’gain Onuk Logo a’ge en nis aphwami Mesir a’ge watnenebiselat, aphwami Israel a’ge ugenebesimu enagat aga, oluk pobirak nebagup en asogo tik ani o, oluk egei,” oluk mo’gulesi.

8Asogo mo’gulesirik, ologun pam e, disogo mo’gulesi,

“Nue. Pobuk hat hosi ’berlegat an neragam ondogorlu pam hutlaumarik e,

Hat hebe emin, aphwami hat a’ge emin, o yema ukpoluk e, lit o, oluk mo’gulnema a’ge oruak o,” oluk mo’gulotluk e, olot het pam ’gain ano ukpoluk waga.

9Asogo mo’gulotluk wagama, at Nenaik ’gain Onuk Logo a’ge en Musa naduk disogo mo’gulesi,

“An en is aphwami Mesir a’ge pobi tuagoluk, elalin a’ge a’bigat ’gela’ge o Mesir yema di owi yu owi logon tik epegirikmu re, at ap ’gain en hat en mo’guligen a’ge ai hwelak poluk tu erlakma en ukpouwa o,” oluk mo’gulesi.

10Asogo mo’gulesi hegitsogoat, Musa Harun emin en, at ’gain Mesir a’ge pobi tuagoluk, elalin a’ge ano at ilem tigisayat. A’geat de, at Nenaik ’gain Onuk Logo a’ge en at ’gain ano ede helep ’gela’geat takpesimu re, aphwami Israel a’ge at owi pam Mesir eba ukpoluk louwagoluk mo’gulonto ebirat aga.

Currently Selected:

Keluaran 11: Wul

Highlight

Copy