Peragenebesi 6

Ap enebe sabiren Allah eiyagai logon lerontogu lemagoluk edigenebegesa wene

1Ai erlige re, aphwami Yesus iak wegesa a’ge enebe a’bigat egesema re, is aphwami enebe Yahudi a’geat de, eniak e, Yunani a’ge en e, disogo egesa,

“Aphwami nin hwedik nan hwedigat di a’ge yu a’ge so’burontogulat e, hwami sugwe nis en a’ge holuk hallorak onobogwi ai nopaget,” oluk, is Yahudi onowirak a’ge enemin wene sorok egesa. 2Wene asogo sorok egesema, is ap enebe 12 Yesus en yo’go onoboluk peragenebesi a’ge ebano en, aphwami Yesus iak wegesa a’ge enebe ’berlegat odoktuagoluk worlentigisa. Worlontogwiam wegesema re, enebe mesikmu odoksogo welat, is en e, disogo mo’gulentigisa,

“Nis Allah iak mo’gulontogu lege ai, ukpoluk, di a’ge yu a’ge so’burontogulom e, wiak o. 3Holuk e, his en e, ap logon Allah Arogun onogola ’beterak welat, enede modok ’gagalak tugukhwe, enebabut enagat ontogu legep a’ge holuk, enebe sabiren heraenebip o. Heraonoboguptik e, is en di a’ge yu a’ge asogo so’burontogu lemagoluk, nis en edigonobul o. 4Edigonoboma, is asogo tugukhwe, nis en e, se’ban ogulat, wene dem wene aiat mo’gulontogulat, togu lomul o,” oluk mo’gulentigisa.

5Wene asogo ogu legesema, is aphwami Allah eiyagai ebano enebe ’berlek en e,

“Asogo egep ai op,” oluk egesarik enebe herasogo enebegesa. Asogo enebegesa ai mesik e, Stefanus, ede Allah ebam modok he’berik oruakma Allah Arogun ogola ’betesogo ’goluk welaga a’ge emin, Filipus emin, Prokhorus emin, Nikanor emin, Timon emin, Parmenas emin, Nikolaus o Antiokhia ebe o’borlma a’ge Allah iak wesirik, Yahudi a’ge ’gela’ge aga a’ge ai emin, 6enebe sabiren eria herasogo onoboluk e, is ap Yesus en yo’go onoboluk peragenebesi a’ge ebano ene’bek onobou wegesa. Onobou wegesema, is en ene’gik pam ena’gul sebelogo se’ban egesa.

7Asogo togu legesema re, Allah iak lok agama welat, aphwami o Yerusalem a’ge Yesus iak wegesa a’ge enebe a’bigat egesa. Asogo egesema, is ap Allah eiye a’ge ebano enebe esan lok mesik en, wene ai wegesarik enede Yesus ebam he’berik pegesayat.

Wene Stefanus ebam pegesa wene

8At Allah ebabut op en wogentasu a’ge ano, Stefanus loksogo wogesimu anni modok a’bik welaga. Welat e, aphwami en wene pobi tuagoluk elalin tu puk a’ge loksogo tagenebil denaga laga. 9Tagenebasu lagama re, is ap Yahudi a’ge o Kirene a’ge emin, Aleksandria a’ge emin, enebe aphwami logon eneragam a’ge welegesarik pobuk onomuat egesarik se’ban mesikmu ogu legesa a’ge emin, is aphwami Yahudi a’ge logon o propinsi Kilikia a’ge emin, Asia a’ge emin, enemin en, at Stefanus iak osoam, inegesarik e, emdema hin wok han wok wegesarik wene yagegisa. 10Asogo wene yagegisa a’geat de, at Stefanus Allah Arogun ogola ’gwegeitik welat, wene hegirat ’gagalogo osoam, is eniak o’go no’gosogo mo’gulom ’gela’geat aga laga. 11O’go no’gosogo mo’gulom ’gela’geat aga lagama re, is en, ap mesik wene at ebam pou wagoluk onogola ’gagaligisa. Asogo onogola ’gagalugulat, disogo mo’gulentigisa,

“His en e, disogo ip. At yu en Musa obok wiaksogo ’baliselat, Allah obok wiaksogo ’baliselat, tisokhwe, nis nenesa’go hwelige, oluk ip o,” oluk enede ’gagaligisa. 12Asogo enede ’gagaligisema, is en aphwami pema enede edikpogulat, ap enarluedek ebano enede edikpogulat, ap Allah iak pelal wogo enaluk a’ge ebano enede edikpogulat, tigisema, is ’berlek inegesarik e, at Stefanus ebe tenak poluk, is ap wene edip ’belo’gogu legesa a’ge ebano ene’bek woluk legesa. 13Woluk legesarik e, ap logon enepenenat wene Stefanus ebam pou wagoluk edigenebegesa. Edigenebegesema, is en ogulat e,

“Ap yu en Allah u’gwarek owi werik yu obok wiak ’baliselat, wene Allah en nenesa’go weregei a’ge ano obok wiak ’baliselat, mo u erlakma en oso modok welago yo. 14Ye, at en oso a’ge mesik e, yu,

Yesus owi Nazaret a’ge ano en, Allah owi werik a’ge yu moluksogo poluk e, wene at Musa en nene’balak mo’gulentesimu, nis togu lege a’ge ano, pobuk muat tua o, oluk osoma nenesa’go hwelige o,” oluk egesa. 15Asogo ogu legesema, is ap wene edip ’belo’gogu legesa a’ge ebano enebe ’berlegat emin hweriogo welat e, enil at Stefanus ebam putsogo yethogwiam e, at orogole malaikat Allah en yo’go ’belagonobou ago a’ge ebano onorogole ’gela’ge takpesimu enil hegesa.

Currently Selected:

Peragenebesi 6: Wul

Highlight

Copy