Peragenebesi 11

At Petrus en Kornelius ik olomu ’belabegei a’ge ’beli’gogo aphwami Yerusalem a’ge mo’gulentai laga wene

1Is aphwami pema en e,

“Is aphwami o’borl o’gwe a’ge Allah iak wegesa o,” oluk egesema, is ap Yesus en enebe yo’go peragenebesi a’ge ebano emin, Allah eiyagai o Yudea odoktugu legesa a’ge logon emin, enesa’go hweligisa. 2Asogo hweligisarik oruakma en, at Petrus ebe pobuk Yerusalem ’bisoma re, is aphwami enagap ene’gerlimu a’ge ’belak welat enede Yesus ebam he’berik pegesa a’ge ebano en wene yagegisa. 3Wene yagogulat e,

“Hat hebe is aphwami enagap ene’gerlimu a’ge ’belak erlak a’ge ene’bek legentik e, so’boru enemin mesikmu no’gu legeptik wegen ai nopaget,” oluk wene yagegisa. 4Asogo wene yagegisema, at Petrus en wene edipmu enat ’beli’gogo re, disogo mo’gulentesi,

5“An o Yope eba se’ban eselat e, nabi ’gela’ge pam disogo hegi. Sum kain lok a’ge o’gut ugan egeik a’ge herle erlilogo ’bogorl pam en neragam ’belakpou wagoma nabi ’gela’ge hasulat nil hegi o. 6Asogo hegirik, nil pusogo ’gwelakhegi ’gal e, sum ano ogola di wam yu wam, di ’baik yu ’baik, di ina’ge yu ina’ge, ’gwiangma welago a’ge eba emin, ye, di tue yu tue ’bogorl o’gwe darak noso a’ge eba emin, yagarak oruakma nil hegi o. 7Asogo hasumu, at Allah en, sa iak ’gela’geat mo’gulneselat e,

Petrus. Hebe inoroguntik e, eba wusogo men o, oluk mo’gulnesi. 8Asogo mo’gulnesi a’geat de, an en e,

Erlak o. Nue. Asua a’ge emin, yuelak erlak a’ge emin, weiyat ogo an nemdema mesik ’gwelabiso modok erlak o, oluk mo’gulegis. 9Asogo mo’gulegis a’geat de, at iak ano pobuk ’bogorl pam en disogo mo’gulnesi,

Allah en,

Op a’ge, no nak o, oluk egei a’ge holuk, hat e,

Asua a’ge, naik erlak, oluk hede epagun o, oluk mo’gulnesi. 10Asogo e’gik ’birenam mo’gulnesirik, henaganak a’ge mo’gulnotluk e, pobuk di a’ge yu a’ge ebano ’berlegat ’bogorl pam en togolik lisogo wesimu ’goboksogo ligaga o. 11Ai erlige, ap enebe henagan o Kaisarea en peragonobou wegesema, o an ap ’bok ’gela’ge oruakma wegesa. 12Wegesema re, Allah Arogun en an disogo mo’gulnesi,

Enemin lo mia, oluk hogola wenemennei eberu erlakma enat, enemin lu o, oluk mo’gulnesi. Asogo mo’gulnesimu re, is Allah eiyagai o Yope a’ge enebe hebarligen wegesarik yema oruakma re, eneminat o Kaisarea lege. Legerik, nis ’berlegat ap Kornelius owi pam ’gwige. 13’Gwige ’gal, at Kornelius en e,

An ya oruakma en e, malaikat Allah en yo’go ’belagonobou wago a’ge ebano mesik o pam yema ’bu agarik edik oruakma nil hegi o. At yema edik welat e, wene disogo mo’gulnesi,

Ap mesik onuk naduk Simon. Ye, pobuk Petrus, o Yope eba oruak a’ge ano o yema wemagoluk, ap mesik at yo’go perakpemen o. 14At en hat hebe emin, hue hosi emin, heiyagai emin, Allah en delhonobuagoluk, wene mo’gulhontouwa a’ge oruak o, oluk mo’gulnesi, oluk at Kornelius en egei. 15Egeimu re, an wene mo’gulentaigoluk edip owan oso oruakma, Allah Arogun naduk nis nenebam ’bu aga ai ’gela’ge, is pobuk enebam ’bu aga ai o. 16#Per. 1:5Enebam ’bu agama re, nonue ’gain Onuk Logo a’ge en wene disogo oluk egei a’ge nede eberegis,

Yohanes en ik olomu ’belabenebegei a’geat de, Allah en Arogun henebam ’belakpouma o, oluk egei ai en eberegis o. 17Nenede nonue ’gain Onuk Logo a’ge Yesus Kristus ebam he’berik pogwiam, Arogun is emin, nis emin, nenemin hegitsogoat woknentasu ai o. Holuk e, Allah enat asogo woknentasuam e, an en e,

Is wogentasu puk, oluk wene ’balu no? Mia o,” oluk mo’gulentesi.

18At Petrus en asogo mo’gulentesimu, is en wene yagogu legesa a’ge ano re, pobuk mo oluk disogo egesa,

“Holuk e, Allah ebabut op en, nis taknenebasu ’gela’geat, is aphwami o’borl o’gwe a’ge enebabut heberlagoam enelaluk modok welemagoluk elit tagonoboat hegi o,” oluk Allah erliktigisa.

Allah eiyagai o Antiokhia en togu legesa wene

19 # Per. 8:1-4 At Stefanus ano ebe werigisarik e, Allah eiyagai di obotut yu obotut tagonobogulat, muk-mak ontogu legesema, ’bogulogo o propinsi Fenisia emin, ik e’genma Siprus emin, kota Antiokhia emin, wegesarik, wene is aphwami Yahudi a’ge nak mo’gulontogu legesa. 20Is asogo togu legesa a’geat de, is pema enemin ’bogoligisa a’ge onowi re, ik e’genma Siprus a’ge emin, o Kirene a’ge emin, o kota Antiokhia wegesarik, wene op wene nonue ’gain Onuk Logo a’ge Yesus tegei a’ge ano, is aphwami ena’gul onuk Yunani a’geat mo’gulentigisa. 21Asogo mo’gulentasuam, nonue ’gain Onuk Logo a’ge eminat welat, annisogo lerentasuam e, aphwami enebe esan en,

“Wene ai demat hegi,” oluk wik-wok e, enebabut heberlegesarik, onolukhwe at wogegisa. 22Asogo tigisema, is aphwami logon en e,

“Is Yesus iak wegesarik, enebabut heberligisa o,” oluk onobok ogu legesema re, is Allah eiyagai, o Yerusalem odoktugu legesa a’ge ebano enesa’go hweligisarik e, at Barnabas yo’go poluk, ebe o Antiokhia perakpou wegesa. 23-24At Barnabas ai, ebabut op welat, ede Yesus ebam he’berik modok oruakma re, Allah Arogun ogola ’beterak welaga ai en e, perakpou wegesema, wagarik il ontoluk, ogola en e,

“Allah ebabut op en obabenebegeimu oruak hegi o,” oluk ogola agai hesi. Ogola agai holuk e,

“His ’berlegat henede nonue ’gain Onuk Logo a’ge ebam he’berik poluk, at henemin modogat hwedik welemis o,” oluk enesa’go weregei. Enesa’go werise lagama, aphwami esan en, nonue ’gain Onuk Logo a’ge oruak o’gwe la’buk otluk enebe a’bigat logetil legesa.

25Asogo logetil lagaihwe re, at Barnabas pobuk at Saulus ebe horotil o Tarsus waga. 26Wagarik, ebe e’birek sarlok tigisarik e, woluk o Antiokhia laga. O eba lagarik, o mo ligom ’bugom tagokhwe, 1 tahun welat e, Allah eiyagai emin odoktak poluk, aphwami a’bigat wene mo’gulontogu legesa. Is aphwami Yesus iak wogwiam ena’gul onuk Kristen ogwi ai re, naduk-naduk o Antiokhia eba en tualigisa.

27Ai erlige re, is ap Allah iak mo’gulontogu legesa a’ge logon o Yerusalem en o Antiokhia orlu egesa. 28#Per. 21:10Is wegesa eria a’ge, ap mesik onuk Agabus ai, Allah Arogun en ogola ’gagalegeimu, inagarik disogo mo’gulentesi,

“O di owi yu owi ’berlegat so’boru obuk hul o,” oluk mo’gulentesi. Mo’gulentesi ai, ebe ap onuk Klaudius ebe ’gain onuk logo welat tenentarok oruakma aga ai o.

29Ai so’boru ebe owan obuk om erlak oruakhwe re, is aphwami Yesus iak wegesa a’ge ebano en e,

“Holuk e, nis nenebe lo’bok uang nene’gikmu aga a’ge hegitsogo nenarilak nonorokhwi o propinsi Yudea eba odoktogwi a’ge lerontouwogoluk odoksogo perakpouwok o,” oluk wene ’baligisarik uang odoktigisa. 30Asogo odoktigisarik e, Barnabas Saulus e’birek en, ene’gikmu woluk loluk, is ap Allah eiyagai tenentarok welegesa a’ge ebano ene’gikmu pei louwagoluk peragenebegesa ai o.

Currently Selected:

Peragenebesi 11: Wul

Highlight

Copy