Peragenebesi 10
10
At Kornelius en Petrus yo’go pesimu, e’bek wagarik tegei wene
1O Kaisarea eba ap esan lok mesik tentara Roma a’ge onuk ap Italia esan oluk ogu legesa a’ge ap mesik onue ’gain a’ge onuk Kornelius welaga. 2At Allah ogorloksogo welat eiyagai enemin en erliktogu legesa. Erliktogulat e, is aphwami Yahudi a’ge ebano logon ene’gikmu erlak enerlagaik a’ge loksogo lerontogulat, se’ban mo u erlakma en oso modok welaga. 3Asogo oso modok welat e, agauwa mesik erlige re, mo hweya lai lasukhwe jam 3 ’gela’ge pam, abi ’gela’ge disogo hesi. Malaikat Allah en yo’go ’belabonobou wago a’ge ebano mesik ’bu agarik Kornelius e’bek ’gwegeitik e,
“Kornelius,” oluk mo’gulesi. 4Mo’gulesimu, at Kornelius il at ebam putsogo yethasulat, ogorlok agarik e,
“I, nue. Nopaget,” oluk egeimu, at en e,
“Hat se’ban eselat, aphwami ene’gigem erlak enerlagaik a’ge lerentasulat, taga legen ai re, Allah aluk agarik e, hebam ede eberak oruak o. 5O yogodak o Yope eba ap mesik onuk naduk a’ge Simon. Pobuk a’ge Petrus, ogwi a’ge ano wemagoluk, ap mesik at yo’go perakpomup o. 6At ebe ap ’bok ’gela’ge wagarik e, ap Simon wam sapi agap domba agap no’gorlak ere’giso a’ge ano owi ik laut lok ye’gelak eragam eba oruak o,” oluk mo’gulesi. 7Arat mo’gulotluk e, malaikat Allah en yo’go ’belagonobou wago a’ge ano libagarik ligagama re, at Kornelius en, eragam a’ge owi pam welagai a’ge enebe ’biren emin, ap mesik ebe tentara, e’garagun a’ge Allah ebe erliktagalat Kornelius emin modok denaga laga a’ge ai emin, worlentesi. 8Worlentesirik peragenebaigoluk tagalat, wene abi hesi a’ge wene ano mo’gulentesirik, o Yope peragenebesi.
9Peragenebesimu, is ebano laga legesarik loruk o’gwe o Yope horoksogo ’guogoluk lagaihwe, at Petrus ano erlige jam 12 se’ban igoluk o dum ebak a’ge duelakma ligagaimu eba ligaga. 10Ligagarik se’ban oso oruakma so’boru nele aga. Nele agarik oruakhwe, aphwami logon en so’boru nouwagoluk o pam owan werarugukhwe re, abi ’gela’ge pam hesi. 11’Bogorl hialogo re, sum kain ’gela’ge lok a’ge o’gut ugan egeik a’ge pam erlelik a’ge ’gwiangma ’belakpou wagoam il hesi. 12Sum ai ogola re, di wam yu wam, di ina’ge yu ina’ge ’gwiangma welago a’ge eba emin, di tue yu tue ’bogorl o’gwe darak noso a’ge eba emin, ’berlegat yagarak welaga. 13Oruakma re, Allah en sa iak ’gela’geat mo’guleselat e,
“Petrus. Hebe inoroguntik e, eba wusogo men o,” oluk mo’gulesi. 14Asogo mo’gulesimu, at Petrus en e,
“Erlak o. Nue. An asua a’ge emin, yuelak erlak a’ge emin, wei nak ogo nasu erlagat welago yo,” oluk mo’gulesi. 15Asogo mo’gulesimu, iak ano en mesik mo’guleselat e,
“Allah en,
No re, op o, oluk egei holuk e, hat en,
Asua a’ge, no mia, oluk hogola epagun o,” oluk mo’gulesi. 16E’gik ’birenam asogo mo’gulesirik, mesik mo’gulotluk e, sum ’gela’ge ano ’bogorl pam en lisogo wesimu ’goboksogo ligaga. 17Ligagama, at Petrus en e,
“Nabi ’gela’ge hegi ai ebe ’gesogo ’gela’geat o,” oluk wongsogo mo egeitik ede eberisoma re, is ap Kornelius en peragenebesi a’ge ebano legesarik, aphwami logon mo’gulontogulat e,
“Simon owi re, ’ge o,” oluk hin wegesema, is en e,
“Owi re, ai o,” oluk egesema, arat ’godukmu ’gwigisa. 18’Gwigisarik eniak olema ’gwelakpegesema, enebe liplau wegesema re, disogo mo’gulentigisa,
“Ap ’bok a’ge mesik onuk naduk a’ge Simon, pobuk a’ge Petrus, ano ebe yema henemin welegep a? Erlak a,” oluk hin wegesa. 19Hin wogukhwe re, at Petrus ano abi ’gela’ge hesi a’ge ano,
“Ebe ’gesogo ’gela’ge hegi o,” oluk ede eberiso oruakma, Allah Arogun en e,
“Ap enebe henagan a’ge herahebil wegesarik oruak o. 20Holuk e, hat hebe sialogo ’boguntik, is ai an enat peragonobou wegimu wegesa ai en e,
Nenemin lo mia, oluk, hogola wenemennei eberak erlakma enat hemin lu o,” oluk mo’gulesi. 21Mo’gulesimu, at Petrus ene’bek ’begeitik e, disogo mo’gulentesi,
“Nebe heranebil wegep ai re, nebe yuat o. His no oluk en wegep,” oluk mo’gulentesi. 22Asogo mo’gulentesimu, is en e,
“Ap tentara a’ge esan pulhogwi a’ge onue ’gain onuk Kornelius, ai en peraknonobou wagama wege o. At ai ebabut hegitsogo tagalat, Allah ebe ogorloksogo welat, tisokhwe, is aphwami Yahudi a’ge ’berlek en ebabut ’baligisarik e, asogoat obok op ogwi o. At ai asogoat tisokhwe, malaikat Allah en yo’go ’belagonobou wago a’ge ebano mesik en e,
Petrus ai en wene hat hesa’go holu a’ge mo’gulheriogoluk oruak o, oluk hat yo’go perakhoboumagoluk mo’gulesimu, at en peraknonobou wagama he’bek wege o,” oluk mo’gulegisa. 23Asogo mo’gulegisema, at en e,
“Holuk e, an nemin nogouwogoluk, ’gu manis o,” oluk mo’gulentesi.
Mo’gulentesimu re, nogoluk loruk o’gwe enelaluk egesarik e, is Allah eiyagai o Yope eba a’ge eneminat wegesa. 24Wagalat, ebela pam agauwa mesik nak nogoluk e, o Kaisarea wegesa. Wagaihwe, at Kornelius onlogotma welat e, uelak osi emin, arilak orokhwi at emin ’balirak a’ge emin, yo’go enebesimu re, ’berlegat odoktigisarik oruakma wegesa. 25Wegesarik e, at Petrus ebe o pam ’gwiogoluk tisoma, at Kornelius en at ebe wesirik e, odogorlu pam huragarik Petrus eragam sakhun egeitik e, erliktegei. 26Asogo erliktegei a’geat de, at Petrus en e,
“Nue, inemen o. An nebe aphwami a’geatma re, asogo erliknobogun o,” oluk e’gik tenakho edikpesi. 27Edikpoluk e, e’biregat weneane il-il o pam ’gwigisa ’gal e, aphwami esanat odoktu egesarik oruakma at Petrus il yerentesi. 28Il yerontoluk e, disogo mo’gulentesi,
“Nis aphwami Yahudi a’ge en his aphwami o’borloma a’ge henemin hwedik togulat, nis hene’bek ’gugulat, tu puk oluk, wene ’belak welaga ai, henalugat o. Asogo a’geat de, at Allah en,
Aphwami muon eba, enemin wolom e, asua o, oluk u mia o, oluk mo’gulnesimu re, 29his en e, an nebaget yo’go peragenebegepma an nebit u erlakma en wegi o. Wegi a’ge re, wene mesik hin wokhentaik. Wene ebe no oluk an nebaget yo’go peragenebegep,” oluk mo’gulentesi. 30Asogo mo’gulentesimu, at Kornelius en e,
“O hau ua, mo hweya lai lasukhwe, o jam 3 degenik a’ge pamat, an nowi pam se’ban egi o. 31Se’ban asogo osoma re, ap mesik osum amulit a’bik ’buktak a’ge an nilem inla ’bu aga. Inla ’bu agarik e,
Kornelius. Hat se’ban ese legen ano, Allah esa’go hwelegeimu ai o. Ye, aphwami ene’gikmu erlak welat enerlagaik a’ge lerentasu legen ano, Allah en ede hebam eberak oruagat o. 32O Yope eba re, ap ebe mesigat a’ge de, onuk naduk a’ge Simon. Ye, pobuk a’ge, Petrus, ai yo’go louwagoluk ap mesik perakpemen o. At ebe re, ap ’bok ’gela’ge wagarik e, ap onuk Simon, sapi agap domba agap no’gorlak ere’giso a’ge ano owi ik laut lok ye’gelak esa’goma eba oruak ani o, oluk mo’gulnesi. 33Ai enat, an agauwa mesik wolom erlakma en e, ap mesik yo’go he’bek perakpegimu, hat hebabut op en mo u erlakma en op wegen o, nue. Nis yogodak ’berlegat Allah ilem welege yema re, nonue ’gain Onuk Logo a’ge en,
Wene mo’gulontomup, oluk mo’gulhesi a’ge, wene ano ’berlegat nenesa’go holuogoluk welege o, nue,” oluk mo’gulesi.
At Petrus en wene mo’gulentesi wene
34 #
Ula. 10:17
At Petrus en wene edip pam en mo’gulentasulat e,
“At Allah ebabut e, aphwami enagap pam nak il ontoluk e, logon olukhwema enebasulat, logon o’borloma enebasulat, tiso erlak ani o, oluk e, yogodak en pobi tegis o. 35Aphwami ena’gul onuk da ya a’ge at ebe onogorlok welat enebabut hegitsogo togwi a’ge wogenebiso nak hegi o. 36Holuk e, nis aphwami ’berlegat nonue ’gain Onuk Logo a’ge Yesus Kristus en la’bulogo nonobouwagoluk, wene op wene ai, ebe nis aphwami Yahudi a’ge nene’bek perakpou waga a’ge ano henaluk o. 37-38Wene ebe aga ai re, at Yohanes en ik olomu ’belabenebiselat, wene ik olomu ’belabenebiso wene ai mo’gulentasu lagarikmu re, at Yesus owi Nazaret a’ge ano, Allah en Arogun ebam ’belakpou wagalat, anni wogeselat, tegeitik, e’birek welaga ai en, naduk-naduk o Galilea do’go eba en, o aphwami Yahudi a’ge onowi lo’gwe o da ya eba lasulat, di a’ge yu a’ge opsogo nak tagalat, is logon Iblis en ningsogo tenentarok welaga a’ge obabenebiselat, til denaga laga ai henalugat o. 39Aphwami Yahudi a’ge onowi o da ya eba emin, o kota Yerusalem werik o’gwe eba emin, denagalat, ’berlegat tise laga a’ge ai, nis nenil hege o. Asogo a’geat de, at ebe e pam edikpoluk werigisa ai. 40Asogo werigisa a’geat de, agauwa ’biren werak oruakma, agauwa henaganak a’ge, Allah en elalugaptegeitik e, ebe aphwami en enil houwagoluk selakma pesi ai o. 41Asogo selakma pesi a’geat de, aphwami ’berlegat enil ho erlak. We, nadugat at Allah en,
Is enebe eriayat enil houwak o, oluk poliknenebesi a’ge nak e, at Yesus ebe werak oruakma Allah en elalugaptegeimu, nis at emin welat so’boru emin, ik emin, neneminat ne’ge. 42Asogo welat e, nis en aphwami wene mo’gulentil lagalat e,
Aphwami ’berlegat, waregesa a’ge emin, enelaluk oruak a’ge emin, wene enebam pogulat, no’gorlogulat, tuagoluk, Allah en Yesus at edikpesi, oluk, dokhumsogo mo’gulentil laga lemagoluk yo’go nenebesi o. 43At Yesus paget, is ap Allah iak mo’gulontogu legesa a’ge ebano ’berlek en e, obok ogulat e, disogo egesa,
At ebe wagoam e, is aphwami wiak togwi a’ge enede at ebam he’berik pouwa a’ge enebe lo’bok, is wiak togwi a’ge ai, at Allah en at Yesus onuk pam erlagapsogo ukpouwa o, oluk mo’gulontogu legesa,” oluk at Petrus en mo’gulentesi.
Aphwami o’borl o’gwe a’ge Allah en Arogun wogentesi wene
44At Petrus en wene asogo owan mo’gulentasu oruakma, Allah Arogun is aphwami wene ai enesa’go hologu legesa a’ge ebano enebe ’berlegat enebam louk la’bu aga. 45-46Asogo ’bu agama, is aphwami enagap ene’gerlimu a’ge ’belak welat wene demat oluk wegesa a’ge logon Petrus emin wegesarik oruakma, Allah en Arogun asogo is o’borl o’gwe a’ge enebam ’belakpou wagama, hwerlegesarik, wene is muon eniak eneperlak a’ge pam elalinat ogulat, Allah erliktogulat, tugukhwe, enil hogulat, enesa’go hologulat, tigisarik e, disogo egesa,
“Allah en Arogun is aphwami o’borlma a’ge elirat wogentesimu hegi o. Nonogorlok o,” oluk erliktigisa. Asogo erliktigisema, at Petrus en e, disogo mo’gulentesi,
47“Yethemit. Is yu Allah Arogun nis woknentasu ai ’gela’geat, is ogo wogentesimu hwerlegesa ai o. Holuk e, sa en,
Is ik olomu ’belagonobugup no, oluk wene ’balu epegep. Elit ’belabonobuat o,” 48oluk mo’gulentesirik, Yesus Kristus onuk ’balogo ik olomu ’belabonobuagoluk, is logon mo’gulentesimu ’belabenebigisa. Asogo ’belabenebigisema, is en e, at Petrus mo’gulogulat e,
“Nue. Agauwa wei logon nenemin wolomultik en lagun o,” oluk tenak pegesema enemin welegesa.
Currently Selected:
Peragenebesi 10: Wul
Highlight
Share
Copy
Want to have your highlights saved across all your devices? Sign up or sign in
