MATIYUT 21

”Ninowe endagembogut yi aret o,” agan nogwe iigak, o Yerutalem unggwi nagagerak wone

(Mrk 11:1-11, Luk 19:28-40, Ya 12:12-19)

1It Yetut inom nogogwaarak nogo, o Yerutalem panggo yi nogo logonet, o Mbetapage puurom Tayitun paga ari nogo nogogwaarik, nogome logonet, Yetut nen at oone waganggwi mbere nappiige logonet, 2”O tini irikuna time nanip o. O time awo mbo unggwi nogo logonet, wam keledai keeluwi mbarenak aagaluk imbirak wonogwe iigo logomonggotik, piinogo wogoret wa'nu o. 3Ndi, aap ambi nen mbekkirage kenok, kit nen yogo logonet, Ninogoba wam keledai lek me, Wa nanip o, yo'nirage mbaki, wa wogo o, yogwi kenok, at nen, Ti kenok, mbet-mbet wonok nanip o, yokkirage kenok, wonok woraamunggup o,” yinuk, eerogo nappiyareegerak.

4Ti eerogo nappiyareegerak nogo ti, at Ala nen wone yorage nagagerak nabi ambi yoge kagak, 5at nen ari logonet,

”Kit kinogoba endagembogut wam keledai amborowak paga

kwi'ndak kinowagam wage o.

At iniki yanggonak me, wam keledai aagaluk amborowak

paga kwi'na'nuk, Wage ti kaanip o, yinuk,

it aakumi Tiyon mendek yoraanip o,”

yereegerak nogo a'me lik yuwak nduk, at Yetut nen eerogo nappiyareegerak.

6Eerogo nappiige mbareegi, it Yetut oone waganggwi nogo, nogo nogogwaarik, Yetut yoragagerak nogo ndak-ndak aret eeko logonet, 7wam keledai aagaluk imbirak wogoret wogo nogogwaarik, inayum wam keledai amborowak paga ndoombogo mbareegwa, Yetut ti paga kwi'nagagerak. 8It aakumi kuwak aago ando nggwok nen inayum tu nggwok paga mbiganogo ndoombit nogwe, ndi, it ando nen eyo engga kalenogo tu nggwok paga ndoombit nogwe, 9eeppogo mbareegwa, nogo paga nage kagak, it ando inaa'nduk nogwe, it ando ambo'me nogwe, eeko logonet, ”Ndawut ombooluk yi, Otana yuwok o. Ninogoba endage paga wagaarak yi, wogoppuwok o. It mbogut irimbaga menggaarak kunduk, Otana, yuwak o,” yinuk, keeko agan nogogwaarak.

10Agan nogwe iigak, at Yetut o Yerutalem unggwage mbareegi, it time mendek abok aret noone-koone yogo logonet, ”Ie! Wologwe! Aap yi ta mbakop?”

11Yogo mbareegwa, it aakumi kuwak aago nogo nen, ”Aap yi, Ala wone yorage menggerak nabi ambi o Nggalileya awi Nataret mendek Yetut nogo aret o,” yinuk, yorogogwaarak.

Yetut nen Ala awi wurik me ndegeneegerak wone

(Mrk 11:15-19, Luk 19:45-48, Ya 2:13-22)

12At Yetut nogo nen Ala awi wurik me unggwage nagagirik, it Ala awi wurik me time at ambi ageerok at ambi onggo kunggolagak eekwi nogo mugogo wumbiige, it wu onggo-onggo eeko menggaarak inagayo ndoonak inom, it towe puume negen onggo mbanggo menggaarak inagayo kwi'ndak menggaarak inom, a'nggan nggininogo wuppege, eeke nagagirik, 13it yorage logonet, ”Ala nen, An nawi wurik yi, tamban eeko menggam aret yogo logorak o, yinuk, liiru mbaneegerak kwe, kit perak, o yi aap yogoot wappunuk, kumaa'nari nogo menggam negen eekwi kiigi o,” yoragagerak.

14Yorage nagagirik, it inigen mbuk mendek inom, inendop maluk mendek inom, Ala awi wurik me Yetut owagam wogo mbareegwa, at nen obeelom eeginabeegerak. 15Obeelom eeginake mbareegi, it Ala unde inoweewi inom, it Ala wone liiru mbanak unde inom, nogo nen at Yetut yi iya tit, ndi iya tit, eeke inom, ndi, it wologwe mbuulogwe ina'mit yogo logonet, ”Ndawut ombooluk Otana yuwok o,” yogwe wonogwe nogo inom, inigen iigo nogogwaarik, inanini agaket yogo logonet, 16”It wologwe yi yogwe karuk konengge agandik a?”

Yogo mbareegwa, at Yetut nen, ”E o. Naruk konengge agarik o. It elege ngget ndarak inom, elege awo yilak nunggwi inom, inoone abe paga kendage alut eeko logowak nduk, mamuniragagindak o, yinuk, yereegerak Ala wone liiru mbanak nogo kit pekkaga'lek ogotik ya? Yereegerak nogo yi aret ee'nako agaarik o.”

17Yorage nagagirik, it aap nogo teppiinok, o tini nggwok time nen wundi nage nagagirik, o Mbayitani aret nogo yi nagagerak.

Yetut nen eyo ara pulunogo pereegerak wone

(Mrk 11:12-14,20-24)

18Nogo yinuk, o wege mbareegi, ti'nuk, at Yetut iyok paga o tini nggwok Yerutalem nogome wage logonet, mbi abu eeke mbareegi, 19eyo ara ambi tu paga wonage enegen kage nagagirik, alome panggo yi nanuk, eyo nogo anggen yugu lek we engga mban wonage kage nagagirik, eyo eebe nogo yoge logonet, ”Kat eyo yi, kanggen abu yega'lek aret logomunggun o.” Yoge mbareegi, eyo ara nogo, o ti eyom aret mbuk agagerak.

20Mbuk age it Yetut oone waganggwi nogo inigen kogo nogogwaarik, ”Wi,” yinuk, pi wako logonet, ”Eyo ara yi, nonggop togon mbet-mbet mbuk aga?”

21Yogo mbareegwa, at Yetut nen, ”Kit kiniki mbere lek ambit aret logonet, Ala abet ombakwi kiinok, an eyo ara yi eekirak yogobi mban eeko logomunggup lek o. Ata, kit nen puurom yi kunduk, yogo logonet, Aan wogonogo yi yenggenak me lebengge keyaagin o, yogwi kiinok, ndak-ndak aret eeke kaamunggup o. 22Ndi, kit tamban eeko logonet, yi mendek ndi mendek kiniki abet mba'nuk Ala nggino yogwi kiinok ti, kolaamunggup aret o, yinuk, abet aret yokkiragi o,” yoragagerak.

”Ta oone paga eeke menggendak?” yoreegwaarak wone

(Mrk 11:27-33, Luk 20:1-8)

23At Yetut Ala awi wurik me unggwage nagagirik, aakumi mamunirage kagak, it Ala unde unoweewi inom, aakumi inogobamini inom, Yetut owagam wogo nogogwaarik, yogo logonet, ”Kat yi eekak ndi eekak eeke yi ti, ta oone paga eeke menggendak? Ta nen yokkereegerak paga eeke menggendak?”

24Yogo mbareegwa, Yetut nen, ”An kunduk, wone ambi kin wokkiyaminggirak onggo yo'nugwi kiinok, an nen ta oone paga eeke minggirak nogo ti, paganogo yokkiraagin o.” 25Yorage nagagirik, ”At Yaya yiime wuppiige nagagerak nogo ti, mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Kit yinip nda!”

Yorage mbareegi, it-it wone mbanggo logonet, ”Nit nen, Mbogut paga nen yoreegerak paga eeke nagagerak o, yogwi niinok, at nen, Ndi, ti kenok, kit kiniki at abet mbaka'lek nonggop nduk wonogogutak, yo'niraagin o. 26Ndi, nit nen, Aakumi nen yoreegwaarak paga eeke nagagerak o, yogwi niinok, it aakumi abok aret, At Yaya Ala wone yorage menggerak nabi mendek aret o, yogwe me, ninagabiti o,” yinuk, 27Yetut yogo logonet, ”Nit nineenggo'lek o,” yoreegwaarak.

Yogo mbareegwa, at nen, ”Ndi, ti kenok, an kunduk, an eeke yi, ta nen yo'nereegerak paga eeke minggirak ti, yokkiraagin lek o,” yinuk, yoragagerak.

Aap apuri mbere ndarak wone eegu laarogo yoragagerak wone

28Yorage nagagirik, ”Aap ambi apuri wologwe mbere me, ogoba nen manggu ndarak nogo owagam nage nagagirik, Wulaga wae. Kat yogondak neyabu eeppanege logot o. 29Yoge mbareegi, aput nogo nen, E o, nogoba, yoreegerak kwe, eeri noolik puk agagerak. 30Puk age mbareegi, ogoba nogo nen awot ambo'me mendek nogo owagam nage nagagirik, togop aret yoge mbareegi, at nen, Neebi o, yoreegerak kwe, ti'nuk, iniki yunggu yinuk, eeri nagagerak.” 31-32Yorage nagagirik, ”It eereegwaarak nogo ti, kit kiniki ngge mbakop? Ogoba eeriyak iniki mbareegerak nogo ti, ta nen eereegerak mbakop?”

Yorage mbareegi, it nen, ”Lek o. At peebi mendek nogo nen aret eereegerak kogo o.”

Yogo mbareegwa, at Yetut nen, ”At Yaya Ala nen obeelom eeke logorak mbake nogo, mamunggira wagagerak kwe, kit nen abet mbaka'lek kiigak, it pemerintah inake kuwak eeko menggaarak inom, kumi terak wurinako menggaarak mendek inom, nogo nen mban abet mbareegwaarak. Ndi, it aret abet mbareegwaarak kinigen iigo logomonggotik, Ao, nit kunduk abet mbaruwok o, yinuk, yuurak op aret kwe, mbo punuk, abet mbaka'lek wonogogutak me, kit awo Ala abu'me unggwi naga'lek kiigak, it pemerintah inake kuwak eeko menggaarak inom, kumi terak wurinako menggaarak mendek inom, inaa'nduk aret unggwi nagun o, yinuk, abet aret yokkiragi o,” yoragagerak.

It aap awi yarak arum wonogogwaarak eegu laarogo yoragagerak wone

(Mrk 12:1-12, Luk 20:9-19)

33Yorage nagagirik, ”Wone eegu laarak ambi yokkirage me, kinaruk liirogon konenggo logonip o. Aap ambi nggween unde nen anggur awi yappunuk, yagat wuke, amburu mburunogo wurabuurak tenggap mendaake, ndi, tum wako logorak nduk, eyo ndoongge, eeke nagagirik, at ayeloman eyabu aago me arum piinok, o alik me nagagerak. 34Nage nagagirik, time logonet, anggur anggen yugu nogo kole ariyak eyom panggo ari kagak, at eyabu yarak nogo anggen mbanogo wogori nawak nduk, at awuri at nagagim nogome mendek awi yareegerak arum wonogwe nogo, inowagam nappiya wagagerak. 35Nappiya wage mbareegi, it at awi yareegerak arum wonogwe nogo nen at awuri nogo pippiinok, ambi yawi wakwi, ambi mondok miin wakwi, ambi yugum toguurit wakwi, eeginabeegwaarak. 36Eeginako mbareegwa, aa'nduk at awuri mbereeret nappiya wagagerak kwe, ti'nuk, apit togon nappiya wagagerak nogo wogo mbareegwa, togop aret eeginabeegwaarak. 37Eeginako mbareegwa, peebi aap nogo nen, Napuluk yi perak, ayuk wuko logonet, keyage warogo waagun o, yinuk, aput lombok aret nappi wagagerak. 38Aput nappi wagagerak nogo at awi yareegerak tum wonogwe nogo nen inigen kogo nogogwaarik, inom wone mbanggo logonet, Eyate koloorak yi aret me, mondok wappunuk, eyate nit aret kolaawok o. 39Yogo nogogwaarik, eebe pigogo yabu yarak me nen yagat endekem wumbogo nogogwaarik, mondok wareegwaarak.”

40Yorage nagagirik, ”Inogoba nggween unde nogo wage kenok, it at eyabu yarak arum wonogwe nogo nonggop eeginabigin mbakop?”

41Yorage mbareegi, it nogo nen, ”Inogoba wage kenok, at ayeloman maluk eekaarak nogo mondok lek eerogo inooppiinok, inobaane'me awi yareegerak arum logonet, anggen mbaniyak eyom paga anggen mbanogo wogogo logowak nduk, aap alik mippiyaagin o,” yinuk, yoreegwaarak.

42Yogo mbareegwa, Yetut nen,

”It yugum o wuko menggaarak nogo nen o wuko logonet,

yugum ambi mbo pereegwaarak nogo ti,

yugum ogowa ndoonnaga o.

At ninogoba endagembogut eereegerak ninigen kogo nogoorik,

Wi, yinuk, pi wako ogoorik o,

yinuk, yereegerak liiru mbanak nogo kinigen pekkaga'lek ogotik ya?”

43Yorage nagagirik, ”Ti kenok, kit Ala abu'me pinagarak aret wonogogutak kwe, pinagagin lek o. Kinobaane'me it aakumi anggen mbanogo wogogo menggaarak nogo aret at abu'me piyaagin o.” 44Yorage nagagirik, ”It aakumi yugum ti paga ngginnari wogwe iinok, ineebe kalenak-pugunik eerogo wambugun o. Ndi, yugum ti nen abut loguk togon aakumi inoba ngginnari wage kenok perak, ineebe mondok yigirik-noonom eerogo piige logonet, liirubu aa'ngga pogom eerogo piyaagin o.”

45Yorage mbareegi, it Ala unde inoweewi inom, aap Pariti inom, nogo nen at Yetut wone eegu laarogo yorage nogo inaruk konenggo nogogwaarik, ”Nit niinok ari,” yinuk, yelok kogo nogogwaarik, 46pigaawok nduk, eereegwaarak mendek, aakumi ambik nen, ”Ala wone yo'nirage menggerak nabi nogo mendek aret kogo o,” yinuk, yogo mbareegwa, inagabiti nen puk ogogwaarak.

Currently Selected:

MATIYUT 21: WNO

Highlight

Copy