KEJADIAN 18
18
Manetualain helu nae Ana fe Abraham anatouk esa
1 Manetualain natu'du aoinan-na neu Abraham nai mamanak fo, deka no ai manituk-la nai mamana makaluku-makatele manai Mamre. Nai lelek ndia, le'do nahaa nanseli, de Abraham nangatuuk nai uma ofun-na lelesun-na. 2#Ibr. 13:2Ana botik langan-na boema, nita hataholi telu lapadeik lai matan-na. No lai-laik, Abraham nalai neu soluk-kasa. Ana senek ma 3nafa'da nae, “Tuan-tuan, tuli dei, fo boso la'ok seli au ofung-nga; fe au loak alalau-aoono Tuan-tuan-nala. 4Mahani fo au ho'i oe, fo safe Tuan-tuan-nala ein-na. Tuan-tuan-nala hahaeaom mai ai ia huun-na. 5Fo au u sadia nana'ak, fo ela Tuan-tuan-nala hapu balakai beuk, fo besak-ka la'ok makandoo. Metema Tuan-tuan-nala, tuli atam-ma uman ia soona, tuan-tuan-nala fe ha'da-holomata neu au.”
Boema hataholi ka telu sila-la, lataa lae, “Makasi ba'uk-ka, neu o dale malolem-ma. Neukose ami tuli.” 6Abraham masok lai-lai leo uma ofu dale neu, de nafa'da Sara nae, “Lai-lai, ho'i-ma ha'desopu neulauk kalong esa, fo tao loti bobongoanak leona.” 7Basa boema, nalai leo banan-nala mamana nana'an-na neu, de ana hele sapiana maao, fo ela paan-na mangana'uk-ka, boema ana ta'tin, de ana fen leo atan-na neu, fo ana tunu-nasun no lai-laik. 8Basa ndia boema, Abraham ho'i kapaoe, ma kapaoe langak, ma paa nananasu basak ndia, de ana sadia fen neu Tuan-tuan sila-la. Lelek ndia, Abraham nde nalalau-naoonos nai ai ndia huun-na.
9Basa boema, latane lae, “O saom Sara, nai bee?”
Abraham nataa nae, “Nai uma ofu dale.”
10 #
Rm. 9:9
Hataholi sila-la, esa nafa'da nae, “Bei bulak sio seluk bai te, neukose Au fali ma'ing-nga. Ma nai lelek ndia, neukose o saom Sara, ana bongi ni'iana touanak esa.”
Ndia te, Sara nai uma ofu-a lelesun-na bafan-na, fo nai fui sila dean-na, de namanene. 11Abraham no Sara lamalasi lanseli so, de Sara ta hapu bula so'on. 12#1Ptr. 3:6Hu ndia de, Sara hika nai dalen dale, ma nae, “Au amalasi, ma balakaik ta so, de hapu nai bee, au bei ahiik sungu o au saong-nga? – Bai te, au saong-nga boeo namalasi so.”
13Boema, Manetualain natane Abraham nae, “Tao le'e de, Sara hika ma dalen-na naba'e, ade, ana bei hapu bongi anak, nai fai lasin-na dalek do? 14#Luk. 1:37Ade, hapu hata mateaina ba'eneu Manetualain do? Sama leo na'kasa, Au afa'da basan ae, bei bulak sio seluk bai te, neukose Au fali ma'ing-nga leo ia mai. Te nai lelek ndia, neukose Sara bongi ni'iana touanak esa so.”
15Hu kande bibiik-ka, de Sara nalelesi nae, “Au ta hika fa.”
Tehu Manetualain nataa nae, “Memak na'kasa o hika so.”
Abraham dokodoe do'o do ampon ba'eneu Sodom
16Basa ndia boema, fui ka telu sila-la ala la'o, de Abraham neu nafulis. Boema, ala losa mamanak esa, fo nai bee, ala hapu mete lita Sodom. 17Manetualain dodoo nai dalen dale nae, “Au ta nau afuni Abraham, hata fo neukose Au taon fa. 18Ade, neukose tititi-nonosin, ta da'di leoina matuaina ma manakoasa fa do? Ade, ta tunga ndia fa, de neukose, Au fe baba'e-papalak neu basa leoina manai daebafak-ka fa do? 19Au hele basa ndia so, fo ela ana paleta anan-nala, fo ala tunga Au, ma ala tao hata fo malole, ma tunga ndoos ma matetuk-ka. Metema ala tao tunga ndia soona, neukose Au tao atetu Au hehelu-balataang neu Abraham-ma.”
20Basa boema, Manetualain nafa'da Abraham nae, “Sodom ma Gomora, hapu kalaak mabelaina, nana, memak hataholi sila-la sala-singon, ba'un-na seli so. 21Hu ndia de, Au sanga kona leo naa u, fo Au palisak, ade Au amanene basa kalaak sila-la, tete'ek-ka do ta.”
22Boema, hataholi fui ka telu sila-la, sila dua leu leo Sodom leu, tehu esak-ka, fo nde Manetualain, bei nahele no Abraham. 23Abraham neu deka no Manetualain, de natane nae, “Tete'ek-ka, Manetualain sanga tao namopo-namate hataholi sala taak-ka, sama-sama no hataholi masalak-ka do? 24Leounik-ka, nai kota ndia dalek, hapu hataholi limahulu, ta tao salak fa, na neukose Manetualain tao namopo-namate basa, hataholi manai kota ndia dalek lala'en-na do? Ade, Manetualain ta fe do'o do ampon neu hataholi ka limahulu sila-la, fo ela ala hapu so'dak do? 25Boso taomisa hataholi sala taak sila-la, sama-sama loo hataholi masalak-kala. Bosok Manetualain! Nana, metema Manetualain taon soona, tao leo bee-o, neukose hataholi sala taak-kala, nanahukuk sama-sama loo hataholi masalak-kala. Hapu nai bee, manakee-manafula lalai ma daebafak-ka, ho'i nakeketuk fo ta ndoos ma matetuk fa!”
26Boema Manetualain nafa'da nae, “Leounik-ka, Au hapu hataholi sala taak limahulu, nai Sodom soona, neukose Au fe do'o do ampon neu kota ndia lala'en-na, nanahu hataholi ka limahulu sila-la.”
27Boema Abraham nafa'da seluk nae, “Manetualain, fe ampon neu au, nana no au bafa da'ung-nga, de au tu'ti kokolak ia. Au ia, ka'da hataholi daebafak, fo ta nanuu hak, soaneu kokolak hata esa boen. 28Tehu, fafa'kama hapu hataholi sala taak haahulu lima, te ta limahulu fa. Ade, neukose Manetualain tao namopo-namate kota ndia lala'en-na, hu kande, tasala ka'da, hataholi lima mesak-kana do?”
Boema, Manetualain nae, “Leounik-ka, Au hapu hataholi sala taak haahulu lima lai naa soona, neukose Au ta tao amopo-amate kota ndia fa.”
29Boema, Abraham nafa'da seluk nae, “Tao leo bee, fo metema hapu ka'da hataholi haahulu.”
Boema, Manetualain nataa nae, “Hu kande, hataholi ka haahulu sila-la, de neukose Au dale tutu'ung ndia, ta da'di fa.”
30Boema, Abraham nae, “Manetualain, boso mamanasa, metema au kokolak seluk. Tao leo bee, fo leounik-ka, hapu ka'da hataholi teluhulu mesak-kana?”
Boema, Manetualain nataa nae, “Metema Au hapu hataholi teluhulu soona, neukose Au dale tutu'ung ndia, ta da'di fa.”
31Boema, Abraham nae, “Manetualain, fe ampon neu au, nanahu au apalani kokolak akandoo. Leounik-ka, hapu ka'da hataholi duahulu mesak-kana?”
Boema, Manetualain nataa nae, “Metema Au hapu hataholi duahulu soona, neukose Au ta tao akalulutuk kota ndia fa.”
32Mate'en-na, Abraham nae, “Manetualain, boso mamanasa, te neukose au kokolak ka'da la'iesa seluk ae. Tao leo bee, fo hapu ka'da hataholi sanahulu mesak-kana?”
Boema, Manetualain nataa nae, “Metema hapu hataholi sala taak sanahulu soona, neukose Au ta tao amopo-amate kota ndia fa.” 33Lelek Manetualain kokolak basa no Abraham boema, Ana la'o, ma Abraham fali ne'un leo uman neu.
Currently Selected:
KEJADIAN 18: twu
Highlight
Share
Copy
Want to have your highlights saved across all your devices? Sign up or sign in
