Malaki 2
2
A kutsayiswa ka vapristi.
1Makunu a xileletelo lexi xa nwina vapristi.
2Loku mu nga xi ingisi, ni loku mu nga xi veki timbilwini ta nwina, lezaku mu dzunza vito ga mina, ku wula Jehova wa tiyimpi, zoriake nzi ta rumela a nzhukano hehla ka nwina, nzi rukatela a makatekwa ya nwina. Ina, nzi sina nzi ma rukatele, hakuva a mu xi khataleli. Deut. 28:15
3Nzi ta goha a woko ga nwina, nzi xwanya koho tinghoheni ta nwina, wu nga koho wa miphahlo ya nwina, mu hoxiwa handle nawo.
4Zonake mu ta zi tiva lezaku hi mina nzi mu rumeleko a xileletelo lexi, kasi a xivumelwano xa mina na Levi xi fela ku tiya, ku wula Jehova wa tiyimpi. Mitse. 25:12
5A xivumelwano xa mina na yena xi wa hi xa kuhanya ni kurula; nzi mu nyikile xona kasi a fela ku nzi chava; i nzi chavile, a rurumela hi kota ya vito ga mina.
6A nayo wa zinene wu wa hi nonwini wakwe, a kubiha ku wa nga hi kona milonwini yakwe. I wa famba zinwe na mina hi kurula ni kululama, a hunzulukisa votala kugoheni.
7Hakuva a milomu ya mupristi yi fanele ku hlayisa a wutivi, a nayo wu ta labyiwa nonwini wakwe, hakuva hi yena ntsumi wa Jehova wa tiyimpi: Hag. 1:13; 1 Kor. 5:20
8Kanilezi nwina mu hambukile; hi kugonzisa ka nwina mu khunguvanyisile vanyingi; mu wonhile a xivumelwano xa Levi, ku wula Jehova wa tiyimpi.
9Hikwalaho nzi mu mahile mu soleka ni kuva vo biha mahlweni ka vanhu vontlhe, hakuva a mu hlayisi a tindlela ta mina, kanilezi mu cuwuka a nghohe ya munhu loku mu tlhamusela a nayo. 1 Sam. 2:30
To vukela lava va tekako varasati ca matiko.
10A hi vana va dadani munwe ke? A hi Nungungulu munwe a hi vangileko ke? Hikuyini munwe ni munwani wa hina a khohlisako nakulobye, hi tshova a xivumelwano xa vadadani va hina? Ekso. 19:5; Mat. 23:9; Efe. 3:15
11Juda a nga tsumbekangi, ku mahiwa manyalataniso lomu tikweni ga ka Israeli ni le Jerusalema. Hakuva Juda i hanahanisile a wutshamu gi basileko ga Jehova, legi a gi ranzako, a tlhela a teka vanhanyana va nungungulu mumbe.
12A munhu loyi a mahako lezo, Jehova i ta fuvisa vontlhe lava va ka kabye, a mu humesa tendeni ga Jakobe, zinwe ni loyi a nehako munyikelo ka Jehova wa tiyimpi.
13A xinwani lezi mu zi mahako hi lezi; Mu tata a alati ga Jehova hi mihloti, ni kurila ni kutsikwila, laha kaku a nga ha khatali hi minyikelo ya nwina, hambu ku amukela hi litsako lezi zi humako mandleni ya nwina.
14Makunu muku; Hikuyini? Nziku: Hakuva Jehova i kustumunyu xikari ka wena ni sati ga wuswa ga wena loyi u nga tsumbekangiko kakwe, kasilezo munghana wa wena, a sati wa xivumelwano xa wena. Gen. 31:49
15A hi na muvangi munwe loyi a ranzako ku hlayisa a moya wa hina ke? Ni loyi wa munwe i xuva yini? I wa lava a lixaka ti basileko, hikwalaho ti woneleni mimoyeni ya nwina, ngha a nga hi kona ni munwe a to kala a nga tsumbeki ka sati wa wuswa gakwe.
16Hakuva nza venga a kuhlongola, ku wula Jehova, a Nungungulu wa Israeli, ni loyi a hlayisako a sati wakwe hi tihanyi, ku wula Jehova wa tiyimpi. Hikwalaho ti woneleni mimoyeni ya nwina, lezaku mu nga mahi za kukhohlisa. Mat. 19:3
17Mu rerile Jehova hi kuwulawula ka nwina. Kasike mu ngalo: Hi mu rerile hi yini? Hi lezi mu nge: Munwe ni munwani loyi a mahako kubiha i lulamile kuwoneni ka Jehova, niku, wa xalaliswa hi vakunghahi. Ni loku muku: I kwihi a Nungungulu wa nongameto?
Currently Selected:
Malaki 2: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
