Luka 9
9
Jesu a ruma vapostoli va khume ni vambiri.
1Jesu i lo tsombanyisa a vakhume ni vambiri, a va nyika ntamu hehla ka madimoni wontihe, ni ntamu wa ku chuma tinghumbe. Mat. 10:1; Mar. 3:15; 6:7
2I lo va ruma a ku ya kanela a mufumo wa Nungungulu, ni ku hanyisa a vababyako. Mat. 10:7; Mar. 6:12; Xip. 10:1, 9
3Aku ngalo kabye: Mu nga teki nchumu lwenzweni la nwina, ge ni nhonga, hambu ni nkwama, hambu timbuva, kutani mali; hambu a kuva ni mabhaji mambiri.
4Kani hi yihi yindlu mu enghenako ka yona, tshamani kona, mu kala mu suka laho. Mat. 10:11; Mar. 6:10
5Kanilezi lava va nga mu amukeliko, laha mu sukako ka lowo muti, phuhunhani a ntshuri wa mikonzo ya nwina, kasi kuva wukustumunyu ka vona.
6Va lo suka, va ya tsemakanya mitini, na va kanela ivangeli, ni ku hanyisa vababyi wutshanwini gontlhe, Herodi a kanganyiseka.
7Hosi Herodi i lozwa hi zontlhe lezi zi nga mahiwa; i lo kanganyiseka nguvu, hakuva a vanwani va waku: Johani i vukile hi ka vafileko. Mat. 14:1; Mar. 6:14
8Vanwani vaku: Hi Elija a wonekileko; vanwani vaku: Munwe wa vaprofeti va kale a vukileko.
9Herodi i te ngalo: Johani nzi mu tsemile hloko; kanilezi himani loyi nzi zwako ha yena a za kunghahi? I wa lava a ku mu wona, Xip. 23:8
5,000 wa vanhu vo xuriswa.
10Laha a vapostoli va nga wuyile va lo mu hlawutela hi lezi va nga wa zi mahile; zonake i lo va yisa xihundleni, aya navo mutini wu tibyako Betsaida. Mat. 14:13; Mar. 6:30
11Kanilezi na zi zi tivile a zidlemo zi lo mu lanzela; i lo va amukela a kanela kabye hi mufumo wa Nungungulu, a hanyisa lava va lavako ku hanyiswa.
12Laha gi ngaya kupeleni, a vakhume ni vambiri va lo tshinela, vaku ngalo kakwe: Tlhelisa zidlemo, kasi zi fela kuya mitini ni tikweni gi hi ranzeleko, va ya etlela ni ku ti kumela zakuga; hakuva hi lomu xiwuleni. Mat. 14:15; Mar. 6:35; Joh. 6:1, 5
13Kanilezi yena i te ngalo kabye: Va heni zakuga nwina. Vaku ngalo: A hi na nchumu, sine ntlhanu wa zibaba ni zidluwani zimbiri ntsena; loku hi nga fambi hi ya va xavela zakuga vontlhe lava vanhu.
14Hakuva va wa hi kona a 5,000 wa vavanuna. Yena aku ngalo ka vapizani vakwe: Va tshamiseni hi mitlawa ya ntlhanu wa makume.
15Va lo maha lezo, va va tshamisa vontlhe.
16I lo teka a ntlhanu wa zibaba ni zidluwani zimbiri, a cuwuka tilweni a zi katekisa, a zi khema; i lo nyika ka vapizani ku zi avela ka zidlemo.
17Va loga, va xura vontlhe: zonake ku lo rolelwa a matlhatlha ma seleko, a khume ga zirunzu ni zimbiri.
A wukustumunyu ga Pedro.
18Ku te laha a nga khongela xihundleni, a vapizani va wa hi zinwe naye; yena i lo va wutisa, aku: A zidlemo zi ngalo hi mina mani ke? Mat. 16:13; Mar. 8:27
19Va lo hlamula, vaku: Ve u Johani Mubapatizi; kanilezi vanwani vaku u Elija; ni vanwani vaku: Munwe wa vaprofeti va kale a vukileko kufeni. Mat. 14:2; mavesi 7, 8
20I te ngalo kabye: Nwinake, mu ngalo hi mina mani? Pedro i lo hlamula, aku: U Kristu wa Nungungulu. Mat. 16:16; Joh. 6:69
21Yena i lo va laya nguvu lezaku va nga byeli munhu a mhaka leyi;
22aku: Nʼwana wa munhu i yimelwe hi ku xaniseka nguvu, ni ku aliwa hi masingalakati, ni vapristi, va hombe, ni vatsali; a dawa, a tlhela a vuka hi siku ga manharu. Mat. 16:21; 17:22
Tifanelo ta valanzeli va Jesu,
23I te ngalo ka vona vontlhe: Loku munhu a xuva ku nzi lanzela, a ti tsike, a ti rwexa xihambano xakwe masiku ni masiku, a nzi lanza. Mat. 10:38; 16:24; Mar. 8:34
24Hakuva loyi a ranzako ku hlayisa a kuhanya kakwe, i ta lahlekelwa ha kona; kanilezi loyi a lahlekelwako hi kuhanya kakwe hi kota ya mina, i ta ku lonzowota.
25Hakuva zi ta mu vuna yini munhu, loku a bhinzula a tiko gontlhe, a lahlekelwa kutani a onhakalelwa hi wutsumbu gakwe ke? Mat. 16:26; Mar. 8:36
26Hakuva kani hi wihi a ta ngava ni tingana ha mina ni timhaka ta mina, a Nʼwana wa munhu i tava ni tingana ha yena, laha a ta nga wuya kungangameleni kakwe, ni ka Dadani ni ka tingelosi to basa. Mat. 10:33; Mar. 8:38; 2 Tim. 2:12
27Kanilezi nza mu byela ziku dlunya, ku ngalo: Va kona vanwani va yimileko laha, Va ta nga kala kuzwa kufa, va kala va wona a mufumo wa Nungungulu. Mat. 16:28; Mar. 9:1
A kungangamela ka Jesu xitsungeni.
28Ku te laha na ku hunzile a ntlhanu wa masiku ni manharu anzhako ka leti timhaka, Jesu i lo teka Pedro na Johani na Jakobe, a kanziha navo xitsungeni a ku ya khongela. Mat. 17:1; Mar. 9:2
29Kota lezi a nga kari a khongela, a xiyimo xa nghohe yakwe xi lo hunzuka, a tinguwo takwe ti basa ti ngangamela.
30Zonake ku wa hi ni madota mambiri, ma nga wa wulawula naye, ma nga hi Mosi na Elija;
31lava va nga woneka hi kungangamela, va wulawula hi kusuka kakwe, loku a ta nga suka ha kona le Jerusalema.
32Kanilezi Pedro ni lava a nga hi navo va wa binzilwe hi wurongo; laha va nga vukile va lo wona a kungangamela kakwe, ni madota mambiri ma nga yimile naye. Dan. 8:18; 10:9
33Ku te laha ma nga onekana naye, Pedro aku ngalo ka Jesu: Hosi, zi hi sasekele a kuva hi tshama laha; hi vumele ku aka mixaxa minharu: munwe ngwa wena, ni munwe ngwa Mosi, ni munwe ngwa Elija; i wa nga zi tivi lezi a zi wulako.
34Laha na a ha wulawula lezo, ku lota a refu, gi ta va khubhunyeta; ku te loku va ha enghena refini va chava.
35Ni gezu gi lo huma refini, giku: Loyi hi Nʼwana wa mina, a xihlawulwa xa mina; mu ingiseni. Mat. 3:17; Miti. 3:22
36Laha na ga ha zwakala a gezu legi, va lo wona Jesu yece. A ka lawo masiku a vapizani va lo miyela, va nga byeli munhu hi lezi va nga wa zi wonile. Mat. 17:9
Ku hanyiswa mufana a nga hi ni moya wa kubiha.
37Ku te hi siku gi gamelako, laha va nga relela hi le xitsungeni, a xidlemo xa hombe xi lo mu khinga. Mat. 17:14; Mar. 9:14, 17
38Zonake a munhu wa le xidlenwini i lo vitana, aku: Mugonzisi, nza ku khongotela a kuva u cuwuka a nwananga, hakuva hi yena a nʼwana wa mina yece.
39A moya wu mu khoma, lokuloku aba huwa; wu mu tsekatsekisa lezaku a pupuma kuvi; a wu vumeli ku mu tsika ni loku wu mu xanisile nguvu.
40Nzi kombelile a vapizani va wena a kuva va wu hlongola, kanilezi a va zi kotangi.
41Jesu i lo hlamula, aku ngalo: Xizukulwana xi nga kholwiko, xo biha, ku ta kala rini nzi hi na nwina, ni ku timisela ha nwina ke? Neha a nʼwana wa wena laha.
42Kota lezi a nga hata, a dimoni gi lo mu puluwunzisa lahasi, gi mu tsekatsekisa hi ku bayisisako. Kanilezi Jesu i lo kawuka a moya wa kubiha, a hanyisa mufana, a mu nyikela ka raru wakwe.
43Vontlhe va lo hlamala hi ntamu wa Nungungulu. Kanilezi laha vontlhe va nga ha hlamala hi lezi a nga kari a zi maha, i te ngalo ka vapizani vakwe:
44Ngha timhaka leti ti tikirela tindleveni ta nwina lezaku, Nʼwana wa munhu i ta nyikelwa mandleni ya vanhu. Mat. 17:22
45Kanilezi a va pimangi a mhaka leyi, yi wa fihlakele kabye, kasi va fela ku kala va nga yi pimi; va lo chava a ku mu wutisa ha yona. Mar. 9:32; Xip. 2:50; 18:34
A wahombe himani?
46Ku lo vuka kukanetisana xikari ka vona, lezaku hi mani wa vona a nga wa hombe. Mat. 18:1; Mar. 9:34
47Kanilezi laha Jesu a nga tiva a maalakanyo ya timbilu tabye, i lo teka a nwanana tsongwani, a mu yimisa laha reveni gakwe,
48aku ngalo kabye: Kani hi wihi a ta nga amukela a nwanana loyi tsongwanyani hi vito ga mina i amukela mina; ni loyi a nzi amukelako, i amukela yena loyi a nzi rumileko; hakuva loyi a nga tsongwani xikari ka nwina nwentlhe, hi yena a nga wa hombe, Mat. 10:40; Mar. 9:37; Joh. 12:44
49Johani aku ngalo ka yena: Mugonzisi, hi lo wona munhu na a humesa madimoni hi vito ga wena; hi lo mu tsimbeta, hakuva a nga hi lanzeli. Mar. 9:38
50Kanilezi Jesu i te ngalo: Mu nga mu tsimbeteli; hakuva loyi a nga mu vukeliko i yima na nwina.
Jesu ni vapizani va aliwa mutini wa vaSamaria.
51Ku te laha masiku ma nga wa tshinele ya kuva a tlakuselwa tilweni, i lo tiyisa a nghohe yakwe yi kongoma a kuya le Jerusalema; Mar. 16:19; Miti. 1:2
52a ruma mitsumi lezaku yi mu rangela; yi lo famba yi ya enghena mutini wa vaSamaria, ku ya mu longisela kona.
53Kanilezi a va mu amukelangi, hakuva a nghohe yakwe yi wa kongoma a kuya. Jerusalema. Joh. 4:4, 9
54A vapizani vakwe Jakobe na Johani, laha na va zi wonile, va te ngalo: Hosi, wa zi ranza lezaku hi laya nzilo wu relela hi te tilweni, wu ta va mbhetisa ke? 2 Tih. 1:10, 12
55Kanilezi i lo hunzuluka, a va kawuka.
56Zonake va loya ka munwani muti.
Jesu a hlola vapizani vaswa.
57Na va kari va famba ndleleni, a munhu wo kari aku ngalo ka yena: Nzi ta ku lanza ni kwihi laha u yako kona. Mat. 8:19
58Jesu i te ngalo kakwe: A vahlati va na ni minkele, ni tinyanyani ta tilo ti na ni zisaka; kanilezi Nʼwana wa munhu a nga na wutshamu go khigela koha hloko yakwe.
59I te ngalo ka munwani: Nzi lanzele. Kanilezi i lo hlamula, aku: Hosi, nzi vumele nzi ya lahla dadani kusangula. Mat. 8:21
60Jesu aku ka yena: Tsika a vafileko va lahla a vafileko vabye; kanilezi wena famba u yaba hungu hi mufumo wa Nungungulu.
61A munwani aku: Nzi ta ku lanzela, Hosi; kanilezi nzi vumele nzi ranga hi ku ya salisa a va le ndlwini ka hina.
62Jesu aku ngalo kakwe: A munhu loyi a khomako xikomu a kuya kurimeni, a tlhela a cuwuka lenzhako, a nga fanelwi hi mufumo wa Nungungulu.
Currently Selected:
Luka 9: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
