Luka 23
23
Jesu a yiswa mahlweni ka Pilatu.
1Zonake vona vontlhe va lo suka, va mu yisa ka Pilatu, Mat. 27:2; Mar. 15:1; Joh. 18:28
2va sangula ku mu kecara, vaku: Hi kumile loyi munhu na a kari a kucetela a tiko ga hina, a tsimbeta vanhu ku khupa khupo ka Kesari, na a ti wula lezaku yena i Kristu a hosi. Joh. 19:12; Miti. 17:7
3Pilatu i lo mu wutisa, aku: Wena u hosi ya vaJuda ke? Yena i lo hlamula, aku: U wula zona. Mat. 27:11; 1 Tim. 6:13
4Pilatu aku ngalo ka vapristi va hombe ni ka zidlemo: A nzi kumi nanzu ka loyi munhu. 1 Ped. 2:22
5Kanilezi va lo hlohlotela nguvu, vaku: Wa vuxa pfilupfilu vanhwini, hi ku gonzisa Judia gontlhe; i sangule hi le Galilea, a kala a chikela ka legi wutshamu.
6Kanilezi laha Pilatu a nga wa zi zwile, i lo wutisa lezaku kutani loyi munhu ngwa le Galilea.
Jesu a yiswa ka Herodi.
7Laha a nga byeliwa lezaku ngwa mufumo wa Herodi, i lo mu rumela ka Herodi, loyi kambe a nga wa hi le Jerusalema hi lawo masiku. Xip. 3:1
8Laha Herodi a nga mu wona Jesu; i lo tsaka nguvu; hakuva i wa xuvile hi kale a ku mu wona, hilezi i wa zwile ba yena; i lo tsumba ku wona xirewukiso na xi mahiwa hi yena. Mat. 14:1; Mar. 6:14; Xip. 9:9
9I lo mu wutisa timhaka to tala, kanilezi Jesu a nga mu hlamulangi nchumu.
10A vapristi va hombe ni vatsali na va yimile kwalaho, va lo mu kecara hi ntamu.
11Zonake Herodi ni masochwa yakwe va lo mu kanyisa, va mu tseketsela, na va mu ambexile a nguwo ya makanyekanye va lo mu tlhelisela ka Pilatu, Isa. 53:3
12Hi siku lego Herodi na Pilatu va lo zwanana, hakuva hi kale va wa hi nala ni nala xikari kabye. Miti. 4:27
Jesu a tlhela a yima mahlweni ka Pilatu.
13Pilatu i lo tsombanyisa a vapristi va hombe ni manghanakana ya tiko ni vanhu, Mat. 27:23; Mar. 15:14; Joh. 18:38
14aku ngalo kabye: Mu tisile loyi munhu ka mina, muku wa kucetela vanhu; kanilezi na nzi mu hlolile mahlweni ka nwina, a nzi kumangi nanzu ka yena ka zilo lezi mu mu kecarako ha zona. Mavesi 1, 2, 4
15Ge, hambu Herodi kambe, hakuva i mu tlhelisile ka hina; langutani, a nga mahangi nchumu lexi a faneleko a kufa ha xona,
16hikwalaho nzi ta muba, nzi mu tlhatlha. Mat. 27:61; Joh. 19:1
17Hakuva i wa fanele ku va tlhatlhela munwe laha mubuzweni.
18Kanilezi vontlhe va lo kanyuluka, vaku: Susa loyi munhu, u hi tlhatlhela Barabasi. Miti. 3:14
19A munhu loye i wa valelwe paxweni hi kota ya mubango wu nga mahilwe mutini, ni kota ya kudaya.
20Pilatu i lo engeta a wulawula kabye, na a ranza ku tlhatlha Jesu;
21kanilezi va lo kanyuluka, vaku: Mu belele, mu belele!
22Pilatu aku ngalo kabye hi xikhati xa wunharu: Hikuyini, kubiha muni a ku mahileko ke? A nzi kumangi ka yena xigelo xaku i fanele kufa ha xona; hikwalaho nzi ta muba, nzi mu tlhatlha.
23Kanilezi vona va lo tsimbeketa hi magezu ya hombe, va kombela lezaku a belelwa; ni kukanyuluka kabye ku lo mu hlula.
A kubelelwa ka Jesu.
24Pilatu i lo tsema a mhaka lezaku a zi maheke kota xikombelo xabye. Mat. 27:24; Mar. 15:15; Joh. 19:16
25I lo tlhatlha loye a nga khotselwe paxweni hi kota ya mubango ni kudaya, loyi va nga mu kombela; kanilezi Jesu i lo mu nyikela kuranzeni kabye.
26Laha va nga kari va famba naye, va lo khoma munwe loyi a vitwako Simoni wa le Kirene loyi a nga wata hi lahandle ka muti; va lo mu rwexa a xihambano, a kuva a xi rwala hi lenzhako ka Jesu.
27A xidlemo xa hombe xa vanhu xi lo mu lanzela, zinwe ni vavasati lava va nga maha hlomulo, va mu rilela.
28Kanilezi Jesu na a hunzuluka kabye, aku ngalo: Vanhanyana va Jerusalema, mu nga nzi rileli mina, kanilezi rilelani a wutsumbu ga nwina, ni vanana va nwina;
29hakuva ma hata masiku, laha va ta ngaku ngalo: Ti katekile a tingonʼwa, ni marumbu laya ma nga belekangiko, ni mavele ma nga anwisangiko. Mat. 24:19; Xip. 21:23
30Xikhatini lexo va ta sangula ku wula ka zitsunga, vaku: Welani hehla ka hina; ni ka zitsungana: Hi khubhunyeteni. Isa. 2:19; Hos. 10:8; Kuv. 6:16
31Hakuva loku va maha lezi ka sinya yo nyuka, ku taku yini ka leyi yi womileko ke? Mav. 11:31; Jer. 25:29; 1 Ped. 4:17
32Ku wa hi ni vanwani vambiri, va nga zigohi, va fambiswa a ku ya dayiwa zinwe na Jesu. Isa. 53:12; Mat. 27:38
33Laha na va chikele wutshanwini gi vitwako, A xikodo, va lo mu belela kona, zinwe ni zigohi; xinwe hi le canjeni ga xinene ni xinwani ka ga xibhabha. Mat. 27:33; Mar. 15:22; Joh. 19:17
34Jesu aku ngalo: Dada, va tsetselele, hakuva a va zi tivi lezi va zi mahako. Zonake va lo avelana tinguwo takwe xikari kabye hi ku hlahluva. Mat. 5:44; Miti. 7:60; Mar. 15:24
35A vanhu va wa yimile va cuwuka; ni tihosi ti lo mu tseketsela, tiku: I hanyisile vanwani, a ti hanyise loku a hi Kristu wa Nungungulu, a hlawulilweko wakwe. Tis. 22:17; Zak. 12:10; Mat. 27:39
36Ni masochwa kambe va lo mu tseketsela, na vata kakwe, va mu nyika viniga,
37vaku: Loku wena u hi hosi ya vaJuda, ti hanyise.
38Kambe ku wa hi ni mutsalo hehla kakwe, wu nge ngalo: Loyi hi hosi ya vaJuda. Mat. 27:37; Mar. 15:26; Joh. 19:19
39Ni xinwe xa zigohi lezi zi nga wa hayekilwe laho xi lo mu rukatela, xiku: A hi wena Kristu ke? ti hanyise zinwe na hina.
40Kanilezi a xinwani xi lo mu kawuka, xiku: Kasi a ku chavi ni Nungungulu ke, na u wona lezaku u konekile zinwe naye?
41Hina zi hi ringene, hakuva hi amukela a nchachazelo wa mitiro ya hina; kanilezi loyi munhu a nga gohangi nchumu.
42Xi engeta xiku: Jesu, nzi alakanye loku u chikele mufunweni wa wena.
43Jesu aku ngalo kakwe: Hizinene nziku ka wena; Inyamutlha u tava na mina Paradiseni.
44Hi xikhati xa wuntlhanu ni xinwe ku lota munyama tikweni gontlhe, wuva kona kala a xikhati xa wuntlhanu ni mune, Mat. 27:45; Mar. 15:33
45hakuva a gambo gi lo maha ntima. A xisirelo xa tempeli xi lo hanzuka hi laha xikari. Mat. 27:51; Mar. 15:38
46Zonake Jesu i lo vitana hi gezu ga hombe, aku: Dada, nza nyikela moya wa mina mandleni ya wena. Na a wulile lezo i lofa. Tis. 31:5; 1 Ped. 2:23
47Laha a nduna ya zana yi nga wa wonile lezi zi mahekileko, yi lo dumisa Nungungulu, yiku: Hakunene, loyi i wa hi munhu a lulamileko. Mat. 27:54; Mar. 15:39
48Ni vanhu vontlhe lava va nga wa tsombene kasi ku ta wona, loku va wonile lezi zi mahekileko, va lo tlhelela kaya na va tiba zifuva.
49Ni vontlhe lava va nga wa tolovelene naye, ni vavasati lava va nga wa mu lanzele vata hi le Galilea, va lo yima kule, va wona lezi zilo. Tis. 38:11; Mat. 27:55; Mar. 15:40
Kulahliwa ka Jesu.
50Ku wa hi kona a nghanakana gi vitwako Josefa, a munhu wo saseka, a lulamileko,
51loyi a nga vumelangiko a khungo gabye ni ximaho xabye. I wa hi wa le Arimatea, a muti wa vaJuda, loyi a nga kari a cuwukela a mufumo wa Nungungulu. Mar. 15:43; Xip. 2:25, 38
52Yena i loya ka Pilatu, a ya kombela xirumbi xa Jesu.
53I lo xi chisa, a xi petsela hi nguwo ya wukene, a xi veka nkeleni lowu wu nga kehlilwe ribyeni, lowu cima ku nga vekwangiko munhu kona.
54Ku wa hi siku ga Kulongisela, ni sabado gi wa tshinele.
55A vavasati lava va nga tile naye hi le Galilea, va lo lanzela hi lenzhako, va ya wona a nkele, ni mavekela ya xirumbi xa Jesu. Xip. 8:2; Mar. 15:47
56Zonake va lo tlhela, va ya longisa a makha ni mafura yo nuhela. Hi siku ga sabado va lo humula kota nayo. Ekso. 20:10; Mar. 16:1
Currently Selected:
Luka 23: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
