Luka 20

A ntamu wa Jesu laha wu humako kona.

1Ku te hi ginwe ga masiku lawo, laha a nga kari a gonzisa vanhu lomo tempeleni, na a kanela ivangeli, ku lota ka yena a vapristi ni vatsali zinwe ni masingalakati; Mat. 21:23

2va wulawula ka yena, vaku: Hi byele, I ntamu muni u mahako ha wona lezi zilo ke? Kutani hi yena mani loyi a nga ku nyika lowu ntamu ke? Miti. 4:7; 7:27

3Yena i lo hlamula, aku ngalo kabye: Minawu nzi ta mu wutisa mhaka yinwe; mu wa nzi byela:

4A kubapatiza ka Johani ku wata hi le tilweni, kutani hi ka vanhu ke?

5Va lo wulawulisana xikari kabye, vaku: Loku hiku ngalo: Hi le tilweni; i taku ngalo: Hi yini mu nga kala ku kholwa ka yena ke?

6Kanilezi loku hiku: Hi ka vanhu; a vanhu vontlhe va ta hi gandla hi maribye; hakuva va kholwa nguvu lezaku Johani i wa hi muprofeti.

7Va lo hlamula lezaku, A hi zi tivi lezaku ku lota hi kwihi.

8Jesu aku ngalo kabye: Minawu nzi nga ta mu byela hi ntamu lowu nzi mahako ha wona lezi zilo.

Mufananiso wa varimi va xivini.

9Zonake i lo kanela lowu mufananiso ka vanhu, aku: A munhu wo kari i lo byala xivini, a xi nyikela mandleni ya varimi, aya matiko wundle a xikhati xa hombe. Mat. 21:33; Mar. 12:1

10Hi nguva ya mihanzu i lo rumela a nanza ka varimi, kasi va fela ku gi nyika a mihanzu ya xivini; kanilezi a varimi va lo giba, va gi fambisa na gi hi hava nchumu.

11I lo ruma ginwani nanza; gonawu va lo giba, va gi wisa tingana, va gi fambisa na gi hi hava nchumu.

12I lo engeta a ruma ga wunharu; na gonawu va lo gi lamata, va gi hlongola.

13A nwinyi wa xivini aku ngalo: Nzi ta maha yini ke? Nzi ta ruma a nʼwana wa mina loyi nzi mu ranzako, kutani va tava ni xichawo ka yena.

14Kanilezi a varimi laha va nga mu wona, va lo wulawulisana xikari kabye, vaku: Hi yena mugi wa tshomba; a hi mu dayeni, kasi a tshomba yi fela ku maha ya hina.

15Va lo mu hlongola lahandle ka xivini, va mu daya. Hikwalaho a nwinyi wa xivini i ta maha yini ka vona?

16I tata a ta lovisa lavo varimi, a nyikela xivini ka vanwani. Laha va nga zi zwile, vaku ngalo: Zi nga dzuki ziva tano!

17Kanilezi i lo va cuwuka, aku: Kasi zi wula yini lezi zi tsalilweko, ku ngalo:

A ribye legi gi nga aliwa hi vaaki,

Gi mahile a hloko ya magumo? Tis. 118:22; Mat. 21:42

18Ni wihi a ta ngawa hehla ka ribye legi i ta pswhandleka zipanzana; kanilezi loyi gi ta ngawa hehla kakwe, gi ta mu silisisa. Dan. 2:34, 35; Mat. 21:44

Ku riha nzhuvo ka Kesari.

19A vatsali ni vapristi va hombe va lo lava ku mu khoma hi xikhati lexo; hakuva va wa zi tiva lezaku i kanele a mufananiso lowu ha vona; kanilezi va lo chava vanhu.

20Va lo mu xiya, va ruma tihloli, leti ti nga ti mahisa ku khwatsi ti lulamile, lezaku ti fela a ku mu hika hi kuwulawula kakwe, kasi va fela ku mu nyikela wukosini ni ntanwini wa mufumeli. Mat. 22:15

21Va lo mu wutisa, vaku: Mugonzisi, ha zi tiva lezaku wena u wulawula u gonzisa hi kululamileko; a ku languti a dzumba ga munhu, kanilezi u gonzisa a ndlela ya Nungungulu hi zinene. Mat. 22:16; Mar. 12:14

22Xana hi fanele ku yisa nzhuvo ka Kesari, kutani hi nga yisi ke?

23Kanilezi i lo wona a mano yabye, aku ngalo kabye:

24Nzi kangeteni a denario. Ngwa mani a mufananiso lowu, ni mutsalo lowu ke? Vaku: Za Kesari.

25Aku kabye: Tlhelisani ka Kesari lezi zi nga za Kesari, ni ka Nungungulu lezi zi nga za Nungungulu.

26Va wa nga zi koti ku mu hika kuwulawuleni kakwe mahlweni ka vanhu; va hlamala hi kuhlamula kakwe, va miyela.

A mhaka ya kuvuka hi ka vafileko.

27Zonake ku lota kakwe a vaSadusi vanwani, lava va nge ngalo a ku kona kuvuka ka vafileko; va lo mu wutisa, Mat. 22:23; Mar. 12:8; Miti. 23:6

28vaku: Mugonzisi, Mosi i hi tsalele ku ngalo: Loku munhu a tekile, kanilezi afa na a nga hi na nʼwana, a nakulobye i ta hlambela a sati wakwe, kasi ku vuxela nakulobye a mbeleko. Deut. 25:5

29Ku wa hi ni ntlhanu wa vanakulobye ni vambiri; a nhonzwa yi lo teka sati, yifa na yi nga hi na nʼwana;

30a wa wumbiri a maha zalezo;

31ni wa wunharu i lo mu hlambela; zinghaho ni vontlhe va ntlhanu ni vambiri, vafa na va nga siyangi vanana.

32Anzhako ka lezo ni wasati kambe i lofa.

33Laha kuvukeni ka vafileko, i ta maha sati wa mani ka vona ke? Hakuva i wa mahile sati wa vona vontlhe.

34Jesu aku ngalo ka vona: A vanhu va misava va teka, ni ku tekiwa;

35kanilezi lava va ta nga vumelwa ku wona a xikhati xi tako, ni kuvuka hi ka vafileko, va nga ha ta teka, hambu ni ku tekiwa;

36hakuva a va ha zi koti kufa; hakuva va ecana ni tingelosi; i vanana va Nungungulu, hilezi va nga vanana va kuvuka hi ka vafileko. Rom. 8:23; 1 Kor. 15:42, 49, 52

37Kanilezi xungetano ni kuvuxiwa ka vafileko, hambu Mosi i kombisile hi wutshamu gi wulawulako hi xihlahla, laha a nga vitana a Hosi, aku: Nungungulu wa Abrahama, ni Nungungulu wa Isaka, ni Nungungulu wa Jakobe. Ekso. 3:6

38Makunu a hi Nungungulu wa lava va fileko, kanilezi ngwa vahanyako; hakuva ka yena vontlhe vahanyi. Rom. 6:10, 11

39A vatsali vo kari va lo hlamula, vaku: Mugonzisi, u wulile khwatsi.

40Hakuva va wa nga ha tiyi ku mu wutisa nchumu.

Kristu i nʼwana mani?

41Yena aku ngalo kabye: Hikuyini va wulako lezaku Kristu i Nʼwana wa Davida ke? Mat. 22:42; Mar. 12:35

42Hakuva Davida wutsumbu i wula bhukwini ga Tisimu, aku:

A Hosi yi te ngalo ka Hosi ya mina,

Tshama hi le reveni ga mina ga xinene, Tis. 110:1; Miti. 2:34

43kala nzi maha a valala va wena a kuva:

Xikhegetelo xa mikonzo ya wena.

44Loku Davida a mu vitana Hosi, i maha a nʼwana wakwe hikuyini?

45Yena i lo wula va zizwa vanhu vontlhe, aku ngalo ka vapizani vakwe: Mat. 23:1; Mar. 12:38

46Tlharihani hi vatsali, lava va ranzako ku famba: na va ambele a tinguwo to leha, ni ku loswa wutshanwini go hlengeletana, va ranza ni zitshamu za le mahlweni lomu masinagogeni, ni matshamu ya le mahlweni lomu mibuzweni; Mat. 23:5; Xip. 11:43

47kanilezi na va phanga a tiyindlu ta tinoni, a xikhati va mahako mikhongelo yo leha. Vona va ta tsayiswa hi tsayiselelo wa hombe. Mat. 23:14

Currently Selected:

Luka 20: TSC72

Highlight

Copy