Johani 3

Nikodemusi.

1Ku wa hi kona a munwe wa vaFarisi, a vito gakwe hi Nikodemusi, a nga hi nghanakana ya vaJuda.

2Yena i lota ka Jesu ni wusiku, aku ngalo: Rabi, ha zi tiva lezaku u mugonzisi loyi a tileko hi ka Nungungulu; hakuva a ku na munhu a zi kotako ku maha a ziwoniso lezi u zi mahako, loku Nungungulu a nga hi naye. Xip. 7:50; 19:39; Miti. 2:22; 10:38

3Jesu i lo hlamula aku ngalo kakwe: Hakunene loku munhu a nga belekiwi luswa, a nga na ku wona mufumo wa Nungungulu. Xip. 1:13; Gal. 6:15; Tit. 3:5

4Nikodemusi aku ngalo kakwe: A munhu i ta belekiswa kuyini na hi wa kale ke? I ta tlhela a enghena ga wumbiri rumbyini ga nyine, a wuya a belekiwa ke?

5Jesu i lo hlamula, aku: Kunenenene nziku ka wena: Loku munhu a nga belekiwi hi mati ni Moya, a nga na ku enghena mufunweni wa Nungungulu. Mar. 16:16; Miti. 2:38

6Lezi zi belekilweko hi nyama zi hi nyama; ni lezi zi belekilweko hi Moya zi hi moya.

7U nga hlamali hi lezi nzi ngaku ngalo ka wena: Mu fanele hi ku belekiwa luswa.

8A mheho yi pupuxa laha yi ranzako kona, u gizwa lungu ga yona, kanilezi a ku tivi laha yi tako ha kona, ni lomo yi yako kona; hizalezo vontlhe lava va belekilweko hi Moya. Mutsa. 11:5; 1 Kor. 2:11

9Nikodemusi i lo hlamula, aku kakwe: Lezi zilo zi nga mahekisa kuyini ke?

10Jesu i lo hlamula, aku kakwe: Wena u mugonzisi wa Israeli, na u nga pimi a timhaka leti ke?

11Hizinene nziku ka wena: Hi wula lezi hi zi tivako, hi maha wukustumunyu ga lezi hi zi wonileko, kanilezi a mu amukeli a wukustumunyu ga hina. Mat. 11:27; Xip. 12:49

12Lezi mu nga kholwiko loku nzi mu byela hi zilo za misava, mu ta kholwisa kuyini loku nzi mu byela hi zilo za le tilweni ke?

13A ku na munhu a kanzihileko le tilweni, sine loyi a releleko hi le tilweni, a nga Nʼwana wa munhu, loyi a nga hi le tilweni. Mat. 30:4; Miti. 2:34; Efe. 4:9

14Kukotisa lezi Mosi a nga tlakusa a nyoka xiwuleni, hizalezo Nʼwana wa munhu i fanelwe ku tlakuswa; Mitse. 21:9

15aku kasi ni wihi a kholwako, ka yena ave ni wutomi ga pinzukelwa.

16Hakuva Nungungulu i lo ranza tiko kota lezi, a kala a nyikela a Nʼwana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa. Rom. 5:8; 1 Joh. 4:9

17Hakuva Nungungulu a nga rumelangi a Nʼwana wakwe tikweni a kuta lamula tiko; kanilezi aku kasi a tiko gi fela ku hanyiswa hi yena. Lu. 9:56; Xip. 5:45; 8:15

18Loyi a kholwako kakwe a nga lamulwi; kanilezi loyi a nga kholwiko i lamulwe ni zalezi, hakuva a nga kholwangi vitweni ga Nʼwana a belekilweko yece wa Nungungulu. Xip. 5:24; 6:40, 47; 20:31

19A kulamula hi kwaloku, lezaku a kuwonekela ku tile misaveni, kanilezi vanhu va ranzile munyama ku hunza kuwonekela; hakuva mitiro yabye yi wa bihile. Joba 24:13, 17; Efe. 5:13

20Hakuva ni wihi a mahako kubiha wa venga kuwonekela, zonake a ngati kuwonekeleni, ku nga taku a mitiro yakwe yi tsetsulwa.

21Kanilezi loyi a mahako zinene, wata kuwonekeleni, kasi a mitiro yakwe yi fela ku woneka yiku dlunya, lezaku yi tisilwe ka Nungungulu.

A wukustumunyu ga Johani Mubapatizi.

22Anzhako ka lezo, Jesu i loya tikweni ga Judia zinwe ni vapizani vakwe; a tshama navo laho, a bapatiza. Xip. 4:2

23Johani kambe i wa bapatiza le Enoni, kusuhi ni Salimi, hakuva hi kona ku nga hi ni mati manyingi; a vanhu va waya kona va ya bapatizwa.

24Hakuva Johani i wa nga se ku khotselwa paxweni. Mat. 14:3

25Ku lo vuka a kukanetisana hi mhaka ya kuhlazeka, xikari ka vapizani va Johani ni muJuda wo kari.

26Va lota ka Johani, vaku ngalo kakwe: Rabi, loyi a nga hi na wena le tlhatuko wa Jordani, loyi u nga kustumunya ha yena, yena wa bapatiza, ni vanhu vontlhe vaya ka yena. Xip. 1:4, 7

27Johani i lo hlamula, aku: A munhu a nga na ku amukela nchumu, loku a nga nyikiwi zona hi le tilweni. 1 Kor. 4:6; Maheb. 5:4; Jak. 1:17

28Nwina mu vakustumunyu va mina, lezaku nzi te ngalo: A hi mina Kristu, kanilezi nzi rumilwe a ku mu rangela. Mat. 3:1; Mar. 1:2; Lu. 1:17

29Loyi a nga ni mutekiwa hi yena muteki; kanilezi a nyatsumi wa muteki, loyi a yimako kona a muzwa, wa tsaka nguvu hi kota ya gezu ga muteki; hi kona kutsaka loku ku tatisekileko ka mina. Mat. 22:2; Efe. 5:25; Kuv. 21:9

30Yena i fanele ku anza, kanilezi mina nzi bohla.

31Loyi a tako hi le hehla i hehla ka vontlhe; loyi a nga wa misava ngwa misava, i wulawula hi za misava; loyi a tako hi le hehla i hehla ka vontlhe. Xip. 8:23; Rom. 9:5; Fil. 2:9

32I maha wukustumunyu hi lezi a zi wonileko ni lezi a zi zwileko; kanilezi a ku na munhu a amukelako a wukustumunyu gakwe.

33Loyi a amukelako a wukustumunyu gakwe, wa tiyisa lezaku Nungungulu i tsumbekile. Rom. 3:4; 1 Joh. 5:10

34Hakuva loyi Nungungulu a mu rumileko, i wulawula timhaka ta Nungungulu; hakuva Nungungulu a nga nyiki Moya hi lipimo. Lu. 7:16; 24:19; Xip. 1:16

35A Dadani wa ranza Nʼwana, i vekile zilo zontlhe canjeni gakwe. Mat. 11:27; Lu. 10:22; Maheb. 2:8

36Loyi a kholwako ka Nʼwana i na ni wutomi ga pinzukelwa; kanilezi loyi a nga ingisiko Nʼwana a nga ta wona wutomi, hakuva a khulo ga Nungungulu gi tshamile hehla kakwe. Mal. 2:4; Xip. 1:12; Rom. 1:17

Currently Selected:

Johani 3: TSC72

Highlight

Copy