Genesisi 9
9
1Na Nungungulu i lo katekisa Noa ni vana vakwe, aku ka vona: Pswalani mu anza, mu tata misava.
2A zihari zontlhe za laha misaveni, ni tontlhe tinyanyani ta tilo, zi ta mu chava, zi rurumela mahlweni ka nwina; ni zontlhelele lezi zi makanyako laha misaveni, ni zidluwani zontlhelele za bimbi zi nyikilwe mandleni ya nwina.
3A zilo zontlhe lezi zi fambako, zi hanyako, zi tava kuga ka nwina; nzi mu nyika zona kukotisa lezi nzi mu nyikileko a zibyalo zontlhe zo nyuka.
4Kanilezi a nyama leyi yi nga ni wutomi, gi nga wona nkhata, mu ngagi. Levi 17:10; Miti. 15:20
5A nkhata wa nwina, wu nga kuhanya ka nwina, hakunene, nzi ta wu rihisa mandleni ya zihari zontlhe, nzi ta wu rihisa ni le mandleni ya vanhu; nzi ta rihisa wutomi ga vanhu, a ka munwe lomu canjeni ga munwani.
6Loye a halatako a nkhata wa munhu, a nkhata wakwe wu ta halatwa hi munhu; hakuva Nungungulu i lo maha vanhu hi mufananiso wakwe. Mat. 26:52; Kuv. 13:10
7Pswalani, mu anza; tatani misava mu enzeleka ka yona.
8Nungungulu i lo wulawula ka Noa ni ka vana vakwe, aku:
9Langutani, nzi ta tiyisa a xivumelwano xa mina zinwe na nwina, ni pswalo wa nwina anzhako ka nwina;
10zinwe ni zilo zontlhe lezi zi hanyako zi nga na nwina: a tinyanyani ta tilo, ni zifuyo, ni zihari zontlhe za khwati zi nga na nwina; zontlhelele lezi zi nga huma hi lomu tarwini, ku kala ka zontlhe zihari za misava.
11Nzi ta tiyisa a xivumelwano xa mina zinwe na nwina; cima ku nga ta lobyiswa a nyama yontlhe hi mati ya ntalo; cima ku nga ha tava kona kambe a ntalo wo onha a misava.
12Nungungulu i te ngalo: Lexi xi tava xiwoniso xa xivumelwano, nzi xi yimisako xikari ka mina na nwina, ni ka zivangwa zontlhe zi hanyako zi nga na nwina, ku kala kupinzuka:
13nzi ta yimisa a wura ga mina le marefini, giva xikombiso xa xivumelwano xikari ka mina ni tiko.
14Ku taku loku nzi neha marefu hehla ka misava, na wura gi woneka marefini,
15nzi ta alakanya a xivumelwano xa mina xi nga xikari ka mina na nwina ni ka zivangwa zontlhelele zi hanyako; a mati ma nga ta ha maha a ntalo wa ku lovisa a nyama yontlhe.
16A wura gi tava marefini, nzi ta gi cuwuka, nzi alakanya a xivumelwano xa pinzukelwa, xi nga xikari ka Nungungulu ni zivangwa zontlhe za tontlhe tixaka ta nyama yi nga misaveni.
17Nungungulu i te ngalo ka Noa: Lexi hi xikombiso xa xivumelwano, nzi xi yimisileko xikari ka mina ni nyama yontlhe yi nga kona laha misaveni.
Xemi a katekiswa.
18Ni vanana va Noa lava va nga huma hi lomu tarwini, hi Xemi, na Hamu, na Jafete; Hamu hi yena raru wa Kanani.
19Lava vanharu va wa hi vana va Noa, ku humile hi ka vona vontlhelele lava va hangalakileko misaveni.
20Na Noa i lo maha murimi wa misava, i lo ranga a byala xivini;
21i lonwa a vinya, a popiwa; i lo etlela na a hi ximbyiri, lomu tendeni gakwe.
22Na Hamu a raru wa Kanani i lo wona a wumbyiri ga raru wakwe, i lo ya byela vamakabye vakwe va vambiri va nga wa hi lahandle.
23Xemi na Jafete va lo teka nguwo, va yi tlhateka makatleni vona vambiri, va lo famba ha xinzhakwani, na tinghohe tabye va cuwukile le nzhako, cima a va wonangi a wumbyiri ga raru wabye.
24Laha Noa na a vukile hi le kupopiweni, i lozwa lezo zi nga wa mahilwe hi nʼwana wakwe loyi wa nzisana.
25I te ngalo:
I rukatelwe Kanani.
I ta kuva a nanza ga malanza ka vanakulobye.
26Kambe i te ngalo:
I katekisilwe Jehova Nungungulu wa Xemi;
Kanani i ta kuva nanza gabye.
27Nungungulu i ta kulisa Jafete,
A tshama matendeni ya Xemi;
Kanani i ta kuva a nanza ga bye.
28Anzhako ka ntalo Noa i lo hanya 350 wa malembe;
29ni wontihe masiku ya Noa ma wa hi 950 wa malembe, zonake i lofa.
Currently Selected:
Genesisi 9: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
