Genesisi 28

1Isaka i lo vitana Jakobe i lo mu katekisa, a mu laya aku ka yena: U nga teki sati xikari ka vanhwana va maKanani.

2Suka uya le Padanaramu, le ndlwini ka Betueli, a raru wa nyine wa wena; u ya teka kona sati ka vanhwana va Labani, makabye wa nyine wa wena. Hos. 12:12

3Nungungulu wa Ntamu-wontlhe a ku katekise, a ku maha u pswala, a ku anzisa, u maha lixaka la hombe;

4a ku nyika xikatekiso xa Abrahama, wena ni pswalo wa wena; kasi wena wa fela kuga a tshomba ya tiko lego u luvelako ka gona, legi Nungungulu a nga gi nyika ka Abrahama.

5Isaka i lo mu fambisa Jakobe; i loya le Padanaramu ka Labani a nʼwana wa Betueli, a muAramea, makabye wa Rebeka, a nyine wa Jakobe na Esau.

6Laha Esau na a wonile lezaku Isaka i katekisile Jakobe a mu rumela le Padaranamu, ku ya teka kona sati, ni lezaku loku a mu katekisile i mu layile lezaku: U nga teki sati ka vanhwana va maKanani;

7ni lezaku Jakobe i ingisile a raru wakwe ni nyine wakwe a famba le Padanaramu;

8Esau i lo wona kambe lezaku a vanhwana va maKanani va bihile mahlweni ka raru wakwe Isaka;

9zonake Esau i loya ka Ixmaeli, i lo ya teka Mahalati, a nhanyana wa Ixmaeli, a nʼwana Abrahama, makabye wa Nebaioti, a maha sati wakwe zinwe ni lava a nga sina a hi navo.

Nungungulu a woneka ka Jakobe.

10Jakobe i lo suka le Berexeba aya le Harani.

11I lo chikela ka wutshamu go kari, i lo tshama laho lego wusiku, hakuva a gambo gi wa pelile; i lo teka ginwani ribye ka wutshamu lego, a khigela ka gona, i lo etlela ka lego wutshamu.

12I lo lora, a wona mayingo na ma yimisilwe laha misaveni, na magumo ka wona ku chikele tilweni; languta, a tingelosi ta Nungungulu na ti kanziha, ti relela ha wona.

13Languta, Jehova i wa yimile hi le magumeso ya wona, aku: Hi mina Jehova Nungungulu wa Abrahama a raru wa wena, ni Nungungulu wa Isaka; legi tiko u etleleko ka gona, nzi ta ku nyika gona, ni pswalo wa wena;

14a pswalo wa wena wu ta kota a tshuri wa misava; wena u ta hangalaka le Mupela-gambo, ni Muhuma-gambo, ni Nwalungu, ni le Dzongeni; hi ka wena ni ka pswalo wa wena a matiko wontihe ma ta katekiswa.

15Languta, nzi na wena, nzi ta ku hlayisa a ndleleni yontlhe ni laho u yako kona, nzi ta ku wuyisa kambe ka legi tiko; hakuva nzi nga ta ku tsika na nzi nga se maha lezi nzi ku byelileko zona.

16Jakobe na vukile hi le wurongweni gakwe i te ngalo: Hakunene Jehova i ka legi wutshamu, nzi wa nga zi tivi.

17I lo chava, aku: Legi wutshamu gi chavekisa lezi! Hakunene yindlu ya Nungungulu, i nyangwa ya tilo.

18Jakobe i lo vuka ni mixo, i lo teka a ribye legi a nga wa khigela ka gona, i lo gi yimisa gi maha mhanze, a chela mafura hehla ka gona.

19I lo chula a vito ga lego wutshamu ku Beteli; kanilezi kusanguleni a vito ga lowo muti ku wa hi Luzi.

20Jakobe i lo funga xifungo, aku: Loku Nungungulu a tava zinwe na mina, a nzi hlayisa ndleleni, leyi nzi fambako ka yona, a nziha kuga ka kuva nziga, ni tinguwo ta ku ambala,

21nzi kala nzi wuya hi matsenya ndlwini ka dadani; zonake Jehova i tava Nungungulu wa mina.

22Legi ribye nzi gi yimisako laha akuva mhinga, gi ta kuva a yindlu ya Nungungulu; zonake ka zontlhe lezi u ta nga nzi nyika zona, nzi ta susa nzi nyikela za wukhume.

Currently Selected:

Genesisi 28: TSC72

Highlight

Copy