Mitiro 22

Paule a ti hlamulela mahlweni ka vanhu.

1Vamakabye ni vadadani, ingisani makunu a kutihlamulela ka mina mahlweni ka nwina. Xip. 7:2

2Laha va ngazwa lezaku i wulawula kabye hi lirimi la xiHeberu, va la su tiwitiwi bhi. Yena aku ngalo:

3Mina nzi muJuda; nzi pswalelwe Tarsusi wa le Kilikia, kanilezi nzi wundlelwe mutini lowu milengeni ya Gamalieli, nzi gonziswa ku tiva khwatsanyana a nayo wa vakoko va hina, na nzi pangamela Nungungulu, kota lezi nwina nwentlhe mu mahako inyamutlha. Xip. 5:34; 2 Kor. 11:22; Fil. 3:5; Lu. 10:39; Gal. 1:14; Rom. 10:2

4Nzi wa hi muxanisi wa Ndlela leyi nzi lava ku yi daya, nzi boha vavanuna ni vavasati nzi va yisa paxweni. Xip. 8:3; Fil. 3:6; 1 Tim. 1:13

5A mupristi wa hombe wa zi kota ku nzi mahela wukustumunyu mhakeni leyi, zinwe ni hlengeletano yontlhe ya masingalakati; hakuva va lo nzi nyika a mapapilo ma tsalelweko a va ka hina le Damasku; zonake nzi loya kona a kuva nzi ya va boiia lava va nga hi leyo, nzi wuya navo le Jerusalema, kasi ku ta tsayiswa. Lu. 22:66; Xip. 4:5; 9:2

6Ku te laha nzi nga kari nzi famba, kusuhani ni ku chikela Damasku, hi xikhati xa hlikanhi, hi xitshuketi nzi lo ranzelwa hi kuhatima ka hombe ka le tilweni. Xip. 9:3; 26:12, 13

7Nzi lowa lahasi, nzizwa a gezu, giku ka mina: Saule, Saule, hi yini u nzi xanisako ke?

8Nzi lo hlamula nziku: Hi wena mani Hosi ke? Yena aku ngalo ka mina: Hi mina Jesu wa le Nazareta loyi u mu xanisako.

9Lava va nga hi zinwe na mina, va lo wona a kuhatima loko, kanilezi a gezu ga loyi a nga wulawula ka mina a va gi zwangi. Dan. 10:7; Xip. 9:7

10Mina nzi te ngalo: Nzi ta maha yini Hosi ke? A Hosi yiku ngalo ka mina: Suka uya le Damasku, u ta ya byeliwa kona zontlhe lezi u faneleko ku zi maha.

11Laha nzi nga tsanzeka ku wona hi kota ya kungangamela ka kuhatima loko, lava nzi nga hi navo va lo nzi koka hi canja, nzi kala nzi chikela le Damasku.

12Ananiasi loyi a nga chava Nungungulu ni ku pinyamela nayo, loyi a khesiwako hi vaJuda vontlhe lava va akileko leyo, Xip. 9:17; 10:22; 1 Tim. 3:7

13i lota ka mina, a ta yima reveni ga mina, aku ngalo: Saule makabye, tlhela u wona. Hi xikhati xwalexo nzi lo vululeka mahlo nzi mu wona.

14Yena aku: Nungungulu wa vakoko va hina i ku hlawule a kuva u tiva a kuranza kakwe, u wona loyi wa Kululama, ni kuzwa a gezu ga nomu wakwe. Xip. 3:13, 14; 5:30; 1 Kor. 9:1; 11:23

15Hakuva u tava kustumunyu wakwe mahlweni ka vanhu vontlhe, u va byela lezi u zi wonileko ni ku zizwa. Xip. 4:20; 26:16; 23:11

16Makunu wa ha hlwelela yini wena ke? Suka u bapatizwa, u hlaziwa a zionho za wena, na u kari u khongela vitweni gakwe. Xip. 2:38; Maheb. 10:22; Rom. 10:13

17Ku te laha nzi nga wuyile la Jerusalema, na nzi hi lomu tempeleni nzi khongela, nzi lo wutliwa moyeni,

18nzi lo mu wona, aku ka mina: Hatlisa, u suka Jerusalema; hakuva va nga ta amukela lezi u kustumunyako ha mina. Mat. 10:14

19Mina nzi te ngalo: Hosi, va zi tiva vona venyi, lezaku nzi wa va khotsela paxweni, nzi vaba masinagogeni wontihe lava va kholwako ka wena;

20ni laha ku nga halatwa a nkhata wa Stefani a kustumunyu wa wena, minawu nzi wa yimile kwalaho, nzi vumela a ntiro wa kona, na nzi hlayisa a tinguwo ta lava va nga mu daya. Xip. 7:53; Lu. 11:48; Rom. 1:32

21Aku ngalo ka mina; Famba, hakuva nzi ta ku rumela kule, uya ka vamatiko. Xip. 9:15; 13:2; Rom. 1:5; 1 Tim. 2:7

22Vona va lo mu ingisa a kala a wula mhaka leyi; zonake va lo tlakusa a magezu yabye, vaku ngalo: Mu suseni misaveni a munhu wa kunghahi; hakuva a nga faneli ku hanya. Xip. 21:36; 25:24

23Kota lezi va nga kanyuluka, va lo tlhatlha tinguwo tabye, va palatela ntshuri le hehla.

24A nduna yi lo laya lezaku Paule a engheniswa xikanekisweni, yiku a hlolwe hi kuxupulwa, kasi yi fela ku tiva a mhaka leyi va nga mu kanyulukela ha yona.

25Laha va nga mu bohile hi tisinga, Paule i te ngalo ka nduna ya zana leyi yi yimileko laho: Xana ma vumelwa a ku xupula a muRoma na a nga se ku koneka ke? Xip. 16:37

26Laha a nduna ya zana yi nga zi zwile, yi loya ka nduna ya hombe, yi ya yi byela yiku: Xana u lava ku maha yini ke? Hakuva munhu loyi muRoma.

27A nduna ya hombe yi lota yi taku ngalo ka Paule: Nzi byele, wena u muRoma ke? Aku ngalo: Ina, nzi yena.

28A nduna ya hombe yi lo hlamula, yiku: A wusumbulwa legi nzi gi xavile hi mali yo tala. Paule aku ngalo: Kanilezi mina nzi muRoma hi kupswalwa.

29Lava va nga lava ku mu hlola hi ku muba va lo suka hi xihatla; na yona nduna ya hombe yi lo chava laha yi nga zi tiva lezaku muRoma, ni lezi yi nga wa mu bohile.

30Kanilezi hi manziko wa kona, na yi lava ku tiva a zinene za mhaka leyi Paule a nga kecariwa ha yona hi vaJuda, yi lo mu tlhatlha, yi laya a vapristi va hombe ni hubye yontlhe a kuva va tsombana, zonake yi lo tisa Paule, yi mu yimisa mahlweni kabye.

Currently Selected:

Mitiro 22: TSC72

Highlight

Copy