Marko 16

Guwuga ga Jesu

(Matewu 28:1-8; Luka 24:1-12; Johane 20:1-10)

1Na yi vbindride Sabhadho, Mariya wa Madhalene, ni Mariya mayi wa Jakobe, ni Salome, va di renga mafura gasi guya mu todza. 2Ni dzimindru, na li gu khuga lidambo, litshigu nya guhegule nya semana, va di hongola thowotunu. 3Va di gimbila na va gu wudzisana khu gyawe, khavo: “Khu mani a na gu hi rindrividzelago giwindri gi segago liphala?” 4Na va khusedzide maho, va di wona gukhavo giwindri gile nya gikhongolo gi rindrividzidwe gi vegwa phuvbo. 5Na va bede thowoni, va di wona lidzaha na li khade khu nyamudye, na li ambade dzingandzu nya guage. Va di thuruga va samala ngudzu.

6Aholu Lidzaha li di va embela, khilo: “Mu nga thavi, khandri mwa guvbweta Jesu wa Nazareta, oyu a nga khokhothedwago. Wugide, mwalo avba. Wonani wulanga va nga bani va mu vegide avbo. 7#Wona gambe: Mat 26:32; Mark 14:28. Indrani muya tivisa vapizane vaye gumogo ni Pedro, khenu a na mi hegudzani gu vboha Galileya. Iyoyo mu na ya mu wona kha nga edzi a nga mi embelani khidzo.” 8Avbo vanyamayi va nga dugago khu thowoni, va di tutuma na va gu ndrendremela khu gusamala, aholu kha va embela muthu khu hwanga.

Jesu a ngu dzi wonegisa ga Mariya Madhalene

(Matewu 28:9-10; Johane 20:11-18)

9Na wugide khu gufani ni dzimindru nya litshigu nya guhegule nya semana, Jesu a di hegula khu gu dzi wonegisa ga Mariya Madhalene, wule a nga mu dusa livbandre na mavili maphuvbo nya guvivbe. 10Uye a di khuga aya tivisa ga vambe vapizane va Jesu va nga bani vari gutshanisekani va gu lila. 11Na va pwide gupwani a ngu vbanya ni gupwani wonidwe khu Mariya Madhalene, kha va nga khodwa.

Jesu a ngu dzi wonegisa ga vapizane vavili

(Luka 24:13-35)

12Hwane nya isoso, Jesu a di dzi wonegisa khu gimbe giemo ga vapizane vavili va nga bani va gu duga va hongola vbavbandze nya lidhoropa. 13Avo va di bwelela vaya embela vambe avo va nga bani va tshade, aholu avo kha va nga khodwa.

Jesu a ngu rumela vapizane vaye

(Matewu 28:16-20; Luka 24:36-49; Johane 20:19-23; Mithumo 1:6-8)

14Khu guhegisa a di dzi wonegisa ga vale nya likhumi na moyo na va khade vbamezatunu va hodza. A di va kawuka khu gumba khodwa gwawe, ni olu va nga ganedza vale va nga mu wona na wugide. 15Khavbo avbo, a di va embela, khuye: “Indrani tigoni gwatshavbo, mu gimbila mu hevbudza Mahungu nya Yadi nya maphya ga vathu vatshavbo. 16Oyu a khodwago a bhapatiswa, a na vbanyiswa; gasi oyu a si khodwigo a na mbemba. 17Siliwugiso va na gu girago ava va na khodwago khesi: Khu lina langu va na tutumisa maphuvbo nya guvivbe, va na ganela malimi nya maphya, 18va na mola dzinyoga khu mandza; ambari va sela rendre nya gusonge, kha wu na va gira gilo; va na handzega mandza va nya gudwala, va gu va vbanyisa.”

Jesu a ngu khusedzedwa Ndzadzini

(Luka 24:50-53; Mithumo 1:9-11)

19Hwane nya gu bani na ganede navo, Pfhumu Jesu, a di khusedzedwa Ndzadzini, aya khala nyamudye ga Nungungulu. 20Vapizane va di khuga khu vbale va gimbila va tivisa Ivhangeli malangani yatshavbo. Pfhumu a di thumisana navo, a tiyisa magana yawe khu siliwugiso va nga bani va gu gira. Amen.

Currently Selected:

Marko 16: BGE2014

Highlight

Copy