Matewu 20

Gipimaniso nya valimi

1“Kholu Mufumo wa Ndzadzini wu ngu fanana ni mune ndranga a nga vindrugelago gu gimbila a vbweta vathu nya guta lime thembweni gwaye nya miuvha. 2Na pwane navo gu va livba tsapawu mweyo khu litshigu, a di va rumela thembweni gwaye nya miuvha. 3Na dugide gambe ni mihani a di ya mana vambe va nga bani varomo tendrelani nyamba thuma gilo; 4a di va embela, khuye: ‘Indrani nenu muya lima thembweni gwangu, nyi na mi hakhisani tengo wu enelago.’ Avo va di hongola. 5A di duga nyaluphye khu gikhati nya livbandre nigyo nya livbandre na gimwegyo, a diya vbweta vambe. 6Na dugide gambe khu gikhati nya likhumi na gimwegyo, a di mana vambe na va emide, a va embela, khuye: ‘Khu ginani mu khalago avba litshigu rumba nyamba thuma gilo?’ 7Va di mu hakha, khavo: ‘Ha gu hamuga muthu nya gu mu thumele.’ A di khuye: ‘Indrani nenu thembweni gwangu mu na hakha iso si vbwetegago.’ 8#Wona gambe: Levh 19:13; Dhet 24:15. Na li hwide, mune lithembwe nya miuvha a di ruma ghadhi, khuye: ‘Rana sithumi u si hakhisa; phela khavo va nga hegisela gu vboha, u hegisela khavo va nga phela.’ 9Na va vbohide avo va nga belago ni silambo, muthu ni muthu a di hakhiswa tsapawu mweyo. 10Va di vboha navo vale va nga phelago khavo gu bela, na va gu alakanya gukhavo mwendro va na hakhiswa guvbindra avo va nga belago hwane gwawe, aholu moyo ni moyo wawe a di hakhiswa nuye tsapawu mweyo. 11Na va hakhide, va di phela gu bhongela mune gipeto, khavo: 12‘Ava va nya guhegisela va thumide wora mweyo basi; aholu u va hakhiside idzosaye ni ethu hi nga thumago litshigu rumba na hi dahulekelana khu lihani.’ 13Mune gipeto a di phindrula moyo wawe, khuye: ‘Kha nyi gu kalaveli gilo, wandruye. Gasi khandri hi di pwana gu gu livba tsapawu mweyo? 14Ina ka, dzega tsapawu yago u hongole. Nyi gode gu ninga nuye oyu nya mahegisela tengo nya gufanane ni owu nyi nga gu ningago. 15Ina nyi mwalo fanelo nya gugire iso nyi sinago khu silo sangu, gani? Ina khandri wa gu khala lidiwo khu silo sangu, kholu eni nyi gu wadi, gani?’ 16#Wona gambe: Mat 19:30; Mark 10:31; Luk 13:30. Kharati, va nya guhegisela va na bani vari va nya guphela; va nya guphela va na bani vari mahegisela. Kholu vangi va ranwago, aholu sihathwa si dugwana.”

Gitiviso nya wuraru nya sisaniseko saye

(Marko 10:32-34; Luka 18:31-34)

17Jesu na gu gwela gu hongola Jerusalema, a di rana vale nya likhumi na vavili, a va embela, khuye: 18“Olu nya gu hongola Jerusalema, iyo Mwamana wa Muthu a naya ningedwago ga vaphasi nya vakhongolo ni ga vahevbudzi nya Nayo, avo va na lamulago gukhavo a songwe, 19va na mu ningela ga mahedheni va mu vala, va mu kwamula ni gu mu khokhothela vbagihambanotunu. Aholu khu litshigu nya wuraru a na wuga khu ga vafudego.”

Mayi wa sanana sa Zebhedhewu

(Marko 10:35-45)

20A di hidzimela ga Jesu mayi wa sanana sa Zebhedhewu gumogo ni sanana saye, aya khidzima migondroni gwaye, gasi guya mu lomba gilo nya gukari. 21Jesu a di mu wudzisa, khuye: “Wa guvbweta ginani?” Uye a di mu hakha, khuye: “Dzumela gukhuwe, mufumoni gwago, sanana sesi sangu sa sivili, si khale gimwegyo khu nyamudye, gimbe khu nyambade gwago.” 22Jesu a di mu phindrula, khuye: “Nigyo mu lombago kha mu giti. Ina enu mu ngu dzi kodza gu sela gikombe nya gusaniseke nyi vbwetago gu sela, gani?” Va di khavo: “Ina, hi ngu dzi kodza.” 23Jesu a di khuye: “Ina khu lisine mu na selani gikombe gyangu; aholu gu khala nyamudye gwangu mwendro nyambade gwangu, kha si tidwi kheni; isoso sa gu lumba vale va dongisedwego khu Babe wangu.” 24Na va pwide esi, vambe vale nya likhumi, va di wugela vandruye vale va vavili. 25Jesu a di va rana, a va embela, khuye: “Kha nga mu dzitigo, vafumeli nya mayigo va gu ma fuma khu tshivba; ni dzindruna dzakone dza gu gola gu tidwa nya gupwani khidzo dzi rumago. 26Gu nga giregi kharato vbakari gwanu. Aholu oyu a golago gu khala khongolo vbakari gwanu, a na khale githumi gyanu. 27Oyu a golago gu khala nari nya guhegule vbakari gwanu, a na khale khumbi yanu. 28Kholu Mwamana wa Muthu nuye kha tela guta thumedwa, aholu guta thumela ni gu ningela womi waye gasi gu dzegisa va nya gutala.”

Sikhumu sa sivili sa Jeriko

(Marko 10:46-52; Luka 18:35-43)

29Na va gu khuga khu Jeriko, Jesu a di landrwa khu gidzemo nya gingi. 30Avbovbo, sikhumu sivili si nga bani si khade bambe nya ndzila, na si pwide nya gupwani khu Jesu a vbindrago, si di khusedza lito, si gulumela, na si gu lomba, khiso: “Pfhumu, Mwamana wa Dhavhidhe, hi pwele wuhindzi!” 31Gidzemo gi di va kawuka, gasi gu va degudza, aholu avo va di mu rana khu tshivba, khavo: “Pfhumu, Mwamana wa Dhavhidhe, hi pwele wuhindzi!” 32Jesu a di ema a va ranisa. Na va vbohide, a di va wudzisa, khuye: “Mwa guvbweta khenu nyi mi rini?” 33Va di hakha, khavo: “Pfhumu, ha guvbweta gukhethu maho yathu ma tulege!” 34Na pwide gisiro, Jesu a di va kuha maho. Ma di dzegela gu tulega, va gu mu landra.

Currently Selected:

Matewu 20: BGE2014

Highlight

Copy