Malakiya 1
1
Nungungulu a ngu gola vathu vaye
1Magana nya gulemele ya Pfhumu Nungungulu nya gutsayise va na Israyeli ma nga tago khu ga muprofeti Malakiya.
2 Pfhumu Nungungulu a ngu ganela, khuye: “Eni nyi mi gode gikhati gyatshavbo; aholu enu mwa gu ganela, khenu: U hi gode khu magolelo muni? Pfhumu Nungungulu a ngu hakha, khuye: Gasi Esawu khandri a diri ndruye wa Jakobe, gani? Aholu eni nyi di gola Jakobe, 3#Wona gambe: Rom 9:13. aholu nyi nyenya Esawu;#1:3 Esawu guthudwa litigo la Edhomi. nyi gira sigomo saye si khala gihala gya giwulani, nyi ningela litigo lawe ga migehe ya khabini.” 4Ambari Edhomi a gukhuye: Litigo lathu li pfhungumudwe, aholu ethu hi na vbahedza marumbi; khu guralo, Pfhumu Nungungulu nya Tshivba Yatshavbo a ngu ganela kharati, khuye: Avo va na vbahedza, aholu eni nyi na ma khungumula; ambari Edhomi a gukhuye va na li rana litigo nyambana gukhodwa. Litigo lile Pfhumu Nungungulu a gorogidego khilo gikhati gyatshavbo. 5#Wona gambe: Isa 34:5-17; 63:1-6; Jer 49:7-22; Ezek 25:12-14; 35:1-15; Amos 1:11-12; Obhad 1-14. Enu mu na si wonani esi khu maho yanu, mu na ganelani, khenu: Pfhumu Nungungulu a na khusedzwe ambari ni ga mayigo ma guromo vbavbandze ga Israyeli.
Milandru ya vaphasi nya mhamba
(Levhi 22:17-25)
6 Pfhumu Nungungulu a ngu ganela ga vaphasi nya mhamba, khuye: Gyanana gi ngu gola babe waye ni githumi nigyo gi ngu ninga githawo ga mune waye; eni nya gu bani nyiri babe wanu, khu gevbini githawo mu nyi ningago? 7Enu mwa gu resani guhodza gwanu nya gunyenyeze vbagiluvelotunu gwangu gambe mu nga gu wudzisani, khenu: Hi di gi nyenyezisa khu ginani? Ina mwa gu pima gukhenu meza ya Pfhumu Nungungulu gilo nyamba phasa gilo, gani? 8#Wona gambe: Dhet 15:21. Khandri gunyenyeza gu nyi reselani sirengo nya gufe maho, nya guhase nesi nya gudwale, gani? Nga hongolani mu ya luva khiso ga mufumeli wago. Ina si na mu tsakisa? Ina a na mi hakhani gwadi, gani? A ngu ganela Pfhumu Nungungulu nya Tshivba Yatshavbo. 9Gasi olu nga lombani ga Nungungulu khu satshavbo esi mu giridego khu mandza yanu, gasi a mi tsetselela; na mu giride satshavbo sesi khu mandza yanu, ina mwa gu pimisa gukhenu uye a na mi yingisa a mi hakha khu mandza mavili, gani? A ngu ganela Pfhumu Nungungulu nya Tshivba Yatshavbo. 10Khu mani vbakari gwanu a na segago malimba nya Nyumba ya Nungungulu gasi gu si khondriswi gambe nilo nyambana fanelo vbagiluvelotunu gwangu? Kholu enu kha mu nyi salalegisi gambe, kha nyi na hakha gambe miphaselo yanu. A ngu ganela Pfhumu Nungungulu nya Tshivba Yatshavbo. 11Aholu gukhugela Khugadambo kala Muhwadambo. Lina langu likhongolo ngudzu vbakari nya mayigo; malangani gwatshavbo va ngu nyi rungudza, va vbisa libani khu lina langu, va nyi girela miphaso yi agidego, kholu lina langu likhongolo vbakari nya mayigo, a ngu ganela Pfhumu Nungungulu nya Tshivba Yatshavbo.
12Aholu enu mwa gu nyenyezisa giluvelo gyangu avbo mu ganelago, khenu: Meza ya Pfhumu Nungungulu gilo nyamba phasa gilo, silo mu phaselago khiso, guhodza nya gunyenyeze. 13Mu engedza gambe, khenu: Hi garade khu satshavbo sesi, aholu mu simama gumba nyi ningani githawo, a ngu ganela Pfhumu Nungungulu nya Tshivba Yatshavbo. Mwa gu nyi reselani sirengo nya gubidwe, nya guhase niso nya gudwale mu ta nyi girelani khiso miphaso; ina mwa gu pimisani gukhenu eni nyi na si hakha na nyi tsakide khu mandzani gwanu, gani? A ngu wudzisa Pfhumu Nungungulu nya Tshivba Yatshavbo.
14Kholu libango ga muthu nya mukanganyisi a pimisago gu nyi luva khu girengo nya gyadi gya tshambini gwaye, aholu a tumbisa guluva Pfhumu Nungungulu khu girengo nya guhase; kholu eni kheni Pfhumu nya Yikhongolo, a ngu ganela Pfhumu Nungungulu nya Tshivba Yatshavbo, lina langu li ngu ningwa githawo vbakari nya mayigo.
Currently Selected:
Malakiya 1: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
