Luka 11

Nombelo wa Pfhumu

(Matewu 6:9-13; 7:7-11)

1Tshigu mwedo, Jesu a di romo wulanga nya gukari a lombelela. Na vbedzide, moyo nya vapizane vaye a di mu lomba, khuye: “Pfhumu, hi hevbudze gu lomba, kha nga Johane a nga hevbudzago vapizane vaye.” 2A di va embela, khuye: “Mwa guvbweta gu lomba, indrani, khenu:

‘Baba, lina lago li na rungudzwe;

mufumo wago wu nate gwathu.

3Hi ninge guhodza gwathu nya litshigu ni litshigu.

4Hi tsetselele sihoso sathu,

kha nga ethu hi tsetselago avo va hi hoselago.

U nga hi digi hi thega mu gusengwani.’ ”

5A di va embela gambe, khuye: “Moyo wanu a gu bani ari ni pari, yi mu yela vbakari nya wutshigu, yi ya mu lomba, khiyo: ‘Pari yangu, nga nyi lomba sibaba siraru, 6kholu nyi hakhide pfhumba, nya pari yangu, aholu nyi mwalo gilo nya gu mu ninge.’ 7Pari yile, ya gu mu hakha khu nyumbani, khiyo: ‘U nga nyi garadzi, kholu nyi segide lidimba, sanana si lade. Kha nyi dzi kodzi gu wuga nyi gu ninga.’ 8Dzitini nya gukhenu, ambari na si dzini gu wuga a mu ninga sibaba khu kotani nya wupari wawe, a na kala a wuga khu kotani nya gupwe gugoroswa khuye, a mu ninga satshavbo a si nago.

9“Khu kharato, nyi ngu mi embelani, kheni: Lombani, mu na ningwa; vbwetani, mu na si mana; khokhothani, mu na tuledwa. 10Kholu watshavbo muthu a lombago a ngu ningwa; uye a vbwetago a ngu si mana, ni uye a khokhothago a ngu tuledwa. 11Khu wevbini melegi, vbakari gwanu, a ningago nyoga gyanana gyaye gya gu mu lomba ndzandzi? 12Mwendro saye gu gi ninga hume gya gu lomba litandra? 13Nga wonani: Ambari enu nya gukhenu mu vivbedwe khu myonyo mu kodzago gu ninga silo nya sadi sanana sanu, ahati Babe wanu a guromo Ndzadzini a na gira kharini? A na ninga Liphuvbo nya Guage ga vale va mu lombago!”

Vafarisi va ngu vala Jesu

(Matewu 12:22-30; Marko 3:20-27)

14Jesu a di tutumisa liphuvbo nya guvivbe nya gidudu. Na li dugide, gidudu gi di ganela. Gidzemo gi di liwuga. 15Aholu vambe va di khavo: “Uye a gu tutumisa maphuvbo nya guvivbe khu tshivba ya Bhelizebhu, khongolo nya maphuvbo nya guvivbe.”

16Gasi vambe, na va vbweta gu mu linga, va di mu lomba giyeyedzo gya Ndzadzini. 17Aholu Jesu, na tugude mapimo yawe, a di va embela, khuye: “Mufumo watshavbo wu dzi kabanisago khu mitsawa yi wugelanago khu lisine wu na pfhungumuga gule nyamba tshala gilo; ni ndranga yi dzi kabanisago yi dzi dwanisa yi na thega. 18Sathane nuye a gu dzi kasa khu sipandre si wugelanago, wu na pindrugisa kharini mufumo waye, olu mu gukhenu nya gu tutumisa maphuvbo nya guvivbe khu tshivba ya Bhelizebhu? 19Nya gu bani nyi tutumisa maphuvbo nya guvivbe khu tshivba ya Bhelizebhu, ahati sanana sanu sa gu ma tutumisa khu tshivba ya mani? Khu kharato, sanana sanu si na khala valamuli vanu. 20Gani olu, nya gu bani nyi tutumisa maphuvbo nya guvivbe khu tshivba ya Nungungulu, khigyo giyeyedzo nya gupwani Mufumo wa Nungungulu wu vbohide vbakari gwanu. 21Mwama nya ndrena a dongidego matshari a gu ghadha ndranga yaye, sombo saye sa gu sayisega. 22Aholu ya gu manega yimbe ndrena nya gu mu pale, ya gu mu dzegela matshari a nga bani a gu ma themba, yi gu mu phanga silo saye, yi kabanisela vathu. 23Uye a si emigo ni eni a ngu nyi wugela, ni uye a si hengeledzeligo ni eni a ngu phalalegisa.

Guwuya nya liphuvbo nya guvivbe

(Matewu 12:43-45)

24“Liphuvbo nya guvivbe la gu duga khu ga muthu, la gu legalega ni giwula na li gimbila li vbweta wulanga nya guhefemule. Lamba wu mana, la gu, khilo: ‘Nyi ngu bwelela nyumbani gwangu, mule nyi nga dugago khumo.’ 25La gu wuya li ta yi mana na yi vbiyedwe, yi tshambisedwa gwadi, 26la guya dzega livbandre na mavili maphuvbo nya guvivbe guvbindra ilo, mata vbanya yatshavbo ga muthu wule. Khu kharato, makhalelo nya muthu yoyu ma guta nyenyeza guvbindra idzo a nga bani a romo khidzo guphelani.”

Makategwa nya lisine

27Na gu ganela, nyamayi moyo a di khusa lito vbakari nya gidzemo, khuye: “Gi kategide girumbu gi nga gu velegago ni mavele ma nga gu mamisago!” 28Aholu Jesu a di hakha, khuye: “Indra, khuwe: Va kategide avo va pwago magana ya Nungungulu, va ma landrisa.”

Giyeyedzo gya Jona

(Matewu 12:38-42)

29 # Wona gambe: Mat 16:4; Mark 8:12. Kha nga ulo a nga bani na gu tedwa khu vathu nya vangi khu gipitipiti, Jesu a di khuye: “Mela yoyu, mela nya vathu nya guvivbedwe khu myonyo. Va gu lomba giyeyedzo, aholu kha va na ningwa gimbe giyeyedzo vbavbandze nya giyeyedzo gya Jona. 30#Wona gambe: Jon 3:4. Kha nga Jona a nga bani ari giyeyedzo vbakari nya vathu va Ninivha, Mwamana wa Muthu nuye giyeyedzo vbakari nya mela yoyu. 31#Wona gambe: 1 Dzipf 10:1-10; 2 Dzik 9:1-12. Litshigu nya gulamudwe, pfhumugadzi ya Marandzi yi na wugela mela yoyu yi wu ninga nandru, kholu yi dzude khu mahegiso nya litigo, gasi guta pwa guti ga Solomoni. Avba womo uye a gu khongolo guvbindra Solomoni! 32#Wona gambe: Jon 3:5. Litshigu lolo vathu va Ninivha va na wugela mela yoyu, va wu ninga nandru, kholu va dzi sodziside gikhati va nga tshumayedwago khu Jona. Avba womo uye a gu khongolo guvbindra Jona.

Gipimaniso nya kandriya

(Matewu 5:15; 6:22-23)

33 # Wona gambe: Mat 5:15; Mark 4:21; Luk 8:16. “Mwalo a rothago kandriya a yi vega wulangani nya gusihale, mwendro saye gu yi fenengedza khu gitundru. Aholu a gu yi vega avbo yi dzi kodzago gu wenengedza khavbo nyumbani gwatshavbo. 34Mwenge nya givili gyago khu liso lago. Liso lago la gu bani li wona gwadi, givili gyago gyatshavbo gi na wenengedzwa. Aholu la gu bani li dwala, givili gyago gyatshavbo gi na khala mugidemani. 35Khu kharato, dzi wonele, u nga dzegi mwenge u gu nawo u wu gira gidema. 36Khu lisine, mili wago watshavbo wa gu bani wu wenengedzwa, nyamba tshala ni gipandryana gidugwana, wu na ngangamela, wu fanana ni idzo wu wenengedzago khidzo mwenge nya gukhondre gwadi.”

Jesu a ngu rwega nandru Vafarisi ni vahevbudzi nya Nayo

(Matewu 23:1-36; Marko 12:38-40; Luka 20:45-47)

37Na nga guganela, Mufarisi moyo a di mu rana guya hodza naye gaya gwaye. Jesu na vbohide, a di khala vbamezatunu. 38Mufarisi a di liwuga khu gu mu wona gu khala vbamezatunu nyamba phela khu gu hamba mandza. 39Pfhumu a di mu embela, khuye: “Enu Vafarisi mwa gu handza mbiya ni khokho khu vbavbandze basi, gasi khu ndrani gwanu mu tade khu wuvafa ni ndrwadza. 40Sipumbu nenu, ina uye a nga girago liphuvbo la vbavbandze khandruye saye wa moyo a nga girago liphuvbo la ndrani, gani? 41Phelani khu gu ningela sisiwana iso mu gu naso, khavbo satshavbo si na mi dugela gwadi.

42 # Wona gambe: Levh 27:30. “Aholu libango lanu, Vafarisi, mu hengago gikhaba nya mitongwe yatshavbo, mu si theli kota khu gululama ni lihaladzo la Nungungulu. Esi khiso mu nga vbweta gu phela khiso mu gira, nyamba divaledwa khu sile simbe. 43Libango lanu, Vafarisi, mu tutumelago malanga nya guthange mudzinyumbani nya milombelo, mu dwanelago gu loswa vbakari nya vathu. 44Libango lanu enu, mu fananago ni marowo nyamba wonega, ma gandredzedwago khu vathu nyamba dziti.”

45Moyo nya muhevbudzi nya Nayo a di khusa lito, khuye: “Muhevbudzi, maganelelo yoyo, wa gu pata ni ethu.” 46Aholu, uye a di khuye: “Libango lanu nenu, vahevbudzi nya Nayo, kholu mwa gu rwega vathu dzinyandra nya gulemele ngudzu, narigu enu kha mu dzi kwuhi, ambari khu nyala yinene. 47Libango lanu, enu mu girago siwindri marowoni ya vaprofeti, narigu khu vababe vanu va nga va songa! 48Khu kharati, mu ngu fakaza ni gu dzumela mithumo ya vababe vanu, kholu avo va di songa vaprofeti, enu mu va girela siwindri. 49Khidzo kharati Guti ga Nungungulu gu nga khugo: ‘Nyi na va rumela vaprofeti ni vapostoli. Vambe va na va songa, vambe va na va sanisa.’ 50Khu kharato, Nungungulu, a na lamula mela wa muhuno khu novba watshavbo wa vaprofeti wu vbaladzidwego gukhugela gu girwa nya mafu, 51#Wona gambe: Gen 4:8; 2 Dzik 24:20-21. gukhugela gu songwa gwa Abheli kala gu songwa gwa Zakariya, a nga songwago vbakari nya giluvelo ni makhuvi nya Nyumba ya Nungungulu. Khidzo nyi mi embelago, Nungungulu a na lamula mela yoyu khu satshavbo sesi. 52Libango lanu enu, vahevbudzi nya Nayo, kholu mu pharide dzipfhungulo nya wukhodwa, aholu kha mu beli, gambe mwa gu himbedzela ni vale va vbwetago gu bela.”

53Gikhati a nga dugago khu vbale, vahevbudzi nya Nayo ni Vafarisi va di mu hembulula nyamba mu vegedzela, gumogo ni gu mu riya khu siwudziso nya singi, 54gule nya gukhavo a na hoheta likana limwedo, gasi gu mana igyo nya gu mu mole khigyo.

Currently Selected:

Luka 11: BGE2014

Highlight

Copy