Johane 9

Jesu a ngu hawulugisa gikhumu nya mavelego

1Na gu vbindra khu ndzila, Jesu a di wona gikhumu nya mavelego. 2Vapizane vaye va di mu wudzisa, khavo: “Rabi, khu mani a nga ghoha, gasi gu uye a velegwe nari gikhumu, khuye mwendro khu vavelegi vaye?”

3Jesu a di hakha, khuye: “Uye kha ghoha, ambari vavelegi vaye navo; aholu, gu giregide esi, gasi gu wonegiswa khavbo gwaye tshivba ya Nungungulu. 4Nyi fanede gu gira mithumo ya uye a nyi rumedego na gu ngari mihani; wu nguta wutshigu, avbo muthu a si kodzigo guthuma. 5#Wona gambe: Mat 5:14; Joh 8:12. Na nyi nga romo tigoni, kheni wenengedzo nya litigo.”

6Na ganede isoso, a di hetsha vbavbatshi, a gu gira thomwa khu dzindrura, a todza mahoni nya gikhumu; 7a gu gi embela, khuye: “Indra hamba lidhamuni ga Silowe” (gutshamusago pwani “Girumwa.”) Gikhumu gi di hongola giya hamba, gi wuya na gi gu wona.

8Vaakelane vaye ni vathu va nga bani va gu muti gukhavo gikhumu, va di khavo: “Ina, khandruye oyu a nga bani a gu lomba zomola, gani?”

9Vambe va di khavo: “Khuye.” Vambe, khavo “A gufanana naye.” Gasi uye mune a di khuye: “Kheni kamwe.”

10Khavbo avbo, va di mu wudzisa, khavo: “Ma tulegide khu magirelo muni maho yago?” 11A di va hakha, khuye: “Muthu wule a ranwago pwani khu Jesu, a di gira thomwa, a gu nyi tola khiyo mahoni; a nyi ruma, khuye: ‘Indra hamba lidhamuni ga Silowe.’ Khavbo avbo, nyi diya hamba nyi gu tulega maho.” 12Va di mu wudzisa, khavo: “Uye womo hayi?” A di va hakha, khuye: “Ahati!”

Vafarisi va ngu yeyisa wufumu wa Jesu

13Va di yisa ga Vafarisi wule a nga bani ari gikhumu. 14Gulidiri Sabhadho, litshigu Jesu a nga girago thomwa a mu tula maho. 15Vafarisi va di mu wudzisa gambe, gukhavo: “Ma tulegiside kharini maho yago?” A di va hakha, khuye: “A di nyi thela thomwa mahoni, nyiya hamba, khavbo avbo, nyi di wona.”

16Na va pwide esi, vambe Vafarisi, va di khavo: “Muthu yoyu khati khu ga Nungungulu, kholu kha vegedzi Sabhadho.” Gasi vambe va di khavo: “A ngu dzi kodza kharini muthu nya gighohi gu gira siliwugiso nya nga esi?” Gu di manega guhambana vbakari gwawe.

17Va di wudzisa nyaluphye mwama a nga bani nari gikhumu, khavo: “U ngu khuwe ginani khu wule a gu tudego maho?” A di va hakha, khuye: “Muprofeti.”

18Vakhongolo nya Vajudha kha va nga khodwa gukhavo a diri gikhumu, ni gukhavo tudwe maho; va di ranisa vavelegi vaye. 19Va di va wudzisa, khavo: “Ina khuye oyu mwamana wanu mu gukhenu velegidwe nari gikhumu, gani? A gu wonisa kharini olu?”

20Vavelegi va di khavo: “Hi ngu muti gukhethu oyu mwamana wathu, ni gukhethu velegidwe nari gikhumu; 21aholu, gukhethu tulegiside kharini maho, kha hi dziti. Ni gukhethu khu mani a mu tudego, kha hi muti; muthu a dandridego; mu wudziseni a na dzi ganelela abune.” 22Vavelegi vaye va di ganela kharati khu gu thava vakhongolo nya Vajudha, kholu vakhongolo nya Vajudha va di hungide gikungo nya gukhavo: “Uye a na ganelago gukhuye Jesu khuye Kristo, a na tutumiswe nyumbani nya nombelo.” 23Khu kharato vavelegi vaye va nga, khavo: “Muthu a dandridego, mu wudziseni uye mune.”

24Va di rana nyaluphye wule a nga bani ari gikhumu, va mu embela, khavo: “Sambanya lisine mbeli gwa Nungungulu! Ethu hi ngu dziti gukhethu muthu yoyo gighohi.” 25A di va hakha, khuye: “Gani gighohi, kha nyi dziti; gilo gimwegyo nyi gitigo basi: Nyi diri gikhumu, olu nyi ngu wona.” 26Va di engedza gu mu wudzisa, khavo: “A di gu rini, gwadi? A di gu tudzisa kharini maho?” 27A di va hakha, khuye: “Nyi mi embedeni, kha mu vbweti gupwa; mwa gu nyi wudzisela ginani gambe? Mwa guvbweta gu khala nenu vapizane vaye, gani?”

28Khavbo avbo, va di mu yuyutela, khavo: “Mupizane waye khuwe; ethu hi vapizane va Mosi. 29Ga Mosi hi ngu dziti gukhethu Nungungulu ganede; gasi oyu kha hi muti a guta khu hayi.” 30Uye a di va hakha, khuye: “Giliwugiso nya gikhongolo igyogyo! Gumba mutini umo atago khumo, aholu uye a nyi tude maho. 31Hi ngu dziti nya gukhethu Nungungulu kha yingisi sighohi, aholu a gu yingisa vale va mu ningago githawo ni gu gira gugola gwaye. 32Gima ni gima gu si pwali gupwani womo a nga nga tula maho gikhumu nya mavelego. 33Nari pwani uye khandri wa Nungungulu na sa gira gilo.”

34Va di mu hakha, khavo: “Uwe muthu u velegidwe wurumba wago mu gighohoni. Olu wa guvbweta gu hi hevbudza?” Khavbo avbo, va di mu tutumisa.

Wukhumu wa Vafarisi

35Jesu, na pwide gupwani va mu tutumiside, a di mu mana a mu wudzisa, khuye: “U ngu khodwa ga Mwamana wa Muthu, gani?” 36Uye a di hakha, khuye: “Ama Pfhumu, nari mani uye, gasi nyi dzi kodza gukhodwa gwaye?”

37Jesu a di khuye: “U mu wone; khuye oyu a ganelago nago.” 38A di mu hakha, khuye: “Pfhumu, nyi ngu khodwa.” A di khidzima migondroni gwaye. 39Jesu, khuye: “Eni nyi dzude mafuni kha nga mulamuli, gasi vale va si wonigo va wone; ni gu vale va wonago va khale sikhumu.”

40Vambe Vafarisi, na va pwide magana yaya, va di khavo: “Wa guvbweta gukhuwe ethu nethu hi sikhumu, gani?” 41Jesu a di khuye: “Nari pwani mu sikhumu, mu diri mwalo nandru. Kha nga olu mu gukhenu mu ngu wona, nandru wanu wu na simamisa.”

Currently Selected:

Johane 9: BGE2014

Highlight

Copy