Johane 6

Jesu a ngu hodzisa mazana nya vathu

(Matewu 14:13-21; Marko 6:30-44; Luka 9:10-17)

1Khavbo avbo, Jesu a di tshatuga yiphwa ya Galileya yi ranwago gambe pwani khya Tibheriyade. 2Gidzemo nya gingi nya vathu gi di mu landra khu gu wona siliwugiso a nga bani a gu gira ga vadwali. 3Jesu a di gwela gigomoni, aya khala ni vapizane vaye. 4Yi di gu hidzimela Phasika, buzo nya Vajudha. 5Jesu, na khuside maho a wona gidzemo nya gikhongolo gi nga bani gi mu tela, a di wudzisa Filipi, khuye: “Hi na renga hayi guhodza nya guhodzise vathu vava?” 6A di ganela kharati gasi gu mu linga, kholu a di gu giti igyo a nga bani a gu vbweta gu gira.

7Filipi a di phindrula, khuye: “Mazana mavili nya dzitsapawu dzi ranwago denari kha ma eneli gu renga dzipawu dzi ninganago gu muthu ni muthu a mane gipandrenyana.”

8Moyo nya mupizane waye nya gupwani khu Andreya, ndruye wa Simoni Pedro, a di mu embela, khuye: 9“Gyomo avba gikhwathana gi gu ni livbandre sibaba nya mala ni dzindzandzi dzimbili. Aholu, ginani gyogyo, ha guvbweta gu enedza gidzemo gegi?”

10Jesu a di khuye: “Rumani vathu vatshavbo va khale vbavbatshi.” Wu diromo mwasi nya wungi wulanga wakone. Va di khala vatshavbo. Tengo wawe wu di gu vboha umo nya livbandre magumi (5.000) mazana vama. 11Khavbo avbo, Jesu, a di dzega sibaba a si kategisa, a si kabanisela ga avo va nga bani va khade; na dzegide dzindzandzi, a di gira idzosaye. Vatshavbo va di hodza idzo va nga dzinago khidzo. 12Na va khuride, a di ruma vapizane, khuye: “Rolelani sipandre si nga tshala, gasi gumba luzega gilo.” 13Na va si rolede, va di tadza likhumi na sivili situndru khu sipandre nya livbandre sibaba nya mala si nga tandregwago khavo va nga hodzago.

14Vathu vale, khu gu wona giliwugiso a nga girago, va di khavo: “Khu lisine, khuye oyu muprofeti a emisedwego guta tigoni.” 15Jesu, na dzitide gukhuye va di vbweta guta mu gira mufumeli, a di khuga nyaluphye, enga, a gu gwela gigomoni.

Jesu a ngu gimbila vbatshani nya mati

(Matewu 14:22-33; Marko 6:45-52)

16Na li hwide, vapizane va di relela siwoni, 17vaya bela ngalavani va gu hongola kha guya Kafarinawume. Gudiri wutshigu, aholu Jesu a di hwela guya manana navo; 18kha nga yi nga bani yi romo phuvbo nya yikhongolo, mavimbi ma diya na ma gu engedzelana gu gugumuga. 19Na va dzuwide makasiya pfhuka nya livbandre (5) mwendro livbandre na mweyo (6) dzikilometro va di wona Jesu na gu hidzimela ngalavatunu, na gu gimbila khu vbatshani nya mati; va di khala hwanga. 20Aholu, Jesu a di khuye: “Kheni, mu nga thavi.” 21Va di vbweta gu mu hakha ngalavani; aholu ngalava yi di dzegela gu tshegema iyo va nga bani va gu hongola, iyo.

Jesu guhodza nya womi

22Ni dzimindru, gidzemo, gi nga bani gi tshade khisikheyi nya yiphwa, gi di wona gukhigyo siwoni yi tshade ngalava mweyo basi; va di gu dziti gukhavo Jesu kha nga bela ngalavani, ni vapizane vaye, gikhati va tshatugidego. 23Dzi di vbohide dzimbe dzingalava khu Tibheriyade vbafuvbi ni vbale va nga hodzago sibaba si nga kategiswa khu Pfhumu. 24Na va wonide gukhavo Jesu ni vapizane vaye va diri mwalo vbale, vatshavbo va di bela dzingalavani vaya Kafarinawume, va gu landra Jesu.

25Na va mu mane khisikheyi, va di mu wudzisa, khavo: “Rabi, u vbohide vbanyalini avba?” 26Jesu a di va hakha, khuye: “Khu lisine, nyi ngu mi embelani, kheni: Enu mwa gu nyi vbweta, nasiri khu kotani nya siliwugiso mu nga si wonago, aholu khu kotani mu nga hodzago sibaba mu khura. 27Mu nga thumelini guhodza, gule gu dzi kodzago guvbela, aholu thumelani gule gu ningago guvbanya nya gupindruge, ugo mu na ningwago khu Mwamana wa Muthu; kholu khuye oyu a nga ningwago gifungo khuye mune Babe Nungungulu.” 28Khavbo avbo, va di khavo: “Ginani gi vbwetegago gasi gu gira guhaladza ga Nungungulu?” 29Jesu a di va hakha, khuye: “Guhaladza ga Nungungulu khogu: Khodwani ga wule a nga mu rumelago.” 30Va di engedza, khavo: “Siyeyedzo muni u girago, gasi, hi si wone, hi khodwe gwago? Mithumo muni u yi girago uwe? 31#Wona gambe: Eks 16:4,15; Dzind 78:24. Vakokwe vathu va hodzide manaha giwulani, kha nga gu lovidwego pwani: ‘A va ningide guhodza gu nga tshiga khu Ndzadzini.’ ”

32Jesu a di va hakha, khuye: “Khu lisine, nyi ngu mi embelani, kheni: Khandri Mosi a nga mi ningani guhodza gutago khu Ndzadzini; Babe wangu khuye a mi ningago guhodza nya lisine gutago khu Ndzadzini, 33kholu guhodza ga Nungungulu khu gule gutago khu Ndzadzini, khugo gu vbanyisago litigo.”

34Khavbo avbo, va di khavo: “Pfhumu, hivbe guhodza gogo gikhati gyatshavbo.” 35Jesu, khuye: “Eni kheni guhodza nya womi. Uye atago gwangu gima kha napwa ndzala; ni uye a khodwago gwangu, gima kha napwa lidora. 36Gale na nyi mi embedeni, nya gukheni enu kha mu khodwi gwangu ambari mu nyi wonago. 37Vatshavbo ava Babe a nyi ningago va nata gwangu; eni kha nyi dzi kodzi gu nyenya ni moyo nya ava vatago gwangu. 38Kholu nyi tshigide khu Ndzadzini, gasi guta gira guhaladza ga wule a nyi rumedego; kha nya tela guta gira guhaladza gwangu. 39Gugola ga uye a nyi rumedego khu gukhuye nyi si luzisi ni moyo nya vale a nyi ningidego, aholu nyi va wusa litshigu nya mahegiso. 40Gugola ga Babe wangu khogu: Muthu watshavbo a wonago Mwamana, a gu khodwa gwaye, a na mana guvbanya nya gupindruge; gasi eni nyi na mu wusa litshigu nya mahegiso.”

41Khavbo avbo, Vajudha va di ngurangura kholu uye a nga ganela, khuye: “Eni nyi guhodza gu nga tshiga khu Ndzadzini.” 42Avo va di wudzisana, khavo: “Ina khandruye oyu Jesu, gyanana gya Josefe, oyu hi vatigo vavelegi vaye? Khu ginani a gukhuye: ‘Eni nyi tshigide khu Ndzadzini?’ ”

43Jesu a di khuye: “Mu nga nguranguri khu gyanu. 44Mwalo a dzi kodzago guta gwangu, a gumba ranwa khu Babe a nyi rumedego; uyoyo nyi na mu wusa litshigu nya mahegiso. 45#Wona gambe: Isa 54:13. Vaprofeti va lovide gukhavo: ‘Vatshavbo va na hevbudzwa khu Nungungulu.’ Muthu watshavbo a pwidego ni guhevbudzwa khu Babe, a nguta gwangu. 46Mwalo a wonidego Babe vbavbandze ga wule atago khu ga Nungungulu; uye khuye a wonidego Babe. 47Khu lisine, nyi ngu mi embelani: Uye a khodwago a na ni guvbanya nya gupindruge. 48Eni nyi guhodza nya guvbanye. 49Vakokwe vanu va hodzide manaha giwulani, aholu va fude. 50Gasi, ogu khu guhodza gutago khu Ndzadzini; uye a gu hodzago gima kha nafa. 51Eni nyi guhodza nya guvbanye gu tshigidego khu Ndzadzini. Uye a gu hodzago a na vbanya kala gupindruga; guhodza nyi na ningelago khu givili gyangu, gasi guvbanyisa litigo.”

52Vajudha va di ganedzisana, khavo: “A na dzi kodza kharini gu hi ninga givili gyaye hi hodza?” 53Jesu a di khuye: “Khu lisine, nyi ngu mi embelani, gukheni: Mwa gumba hodzani givili gya Mwamana wa Muthu ni gumba sela novba waye, kha mu na mana guvbanya. 54Uye a hodzago givili gyangu ni gusela novba wangu a na ni guvbanya nya gupindruge; eni nyi na mu wusa litshigu nya mahegiso. 55Kholu givili gyangu, guhodza nya lisine; ni novba wangu, gusela nya lisine. 56Uye a hodzago givili gyangu ni gusela novba wangu a na khala ni eni, eni nyi na khala naye. 57Kha nga Babe, a vbanyago, a nyi rumedego, a nyi vbanyisa khu tshivba yaye, a nuye oyu a nyi hodzago a na vbanya khu tshivba yangu. 58Khugo ogu guhodza gu tshigidego khu Ndzadzini; kha gufanani ni gule gu nga hodzwago khu vababe vanu, va fudego; oyu a hodzago guhodza gogu a na vbanya kala gupindruga.”

59Esi ganede Jesu na gu hevbudza nyumbani nya nombelo ya Kafarinawume.

Jesu khuye basi a gu ni mahungu nya guvbanyise

60Vangi nya vapizane vaye, na va pwide, va di khavo: “Ma ngu lemela magana yaya! Khu mani a na gu ma yingisago?” 61Na dzitide Jesu nya gukhuye vapizane va ngu kanakana myonyoni gwawe, a di khuye: “Esi sa gu mi khunguvanyisa, gani? 62Ahati mwa gu wona Mwamana wa Muthu na gu lita iyo a nga bani a romo, mu na khenu ginani? 63Liphuvbo khilo li ningago guvbanya, gasi givili kha gi phasi gilo. Magana nyi mi embedego Liphuvbo ni guvbanya. 64Aholu, vbakari gwanu vomo va si khodwigo.” Khu lisine, Jesu a di gu vati, gukhugela guhegulani, khu vevbini vale va nga bani va si khodwi, ni gu, khu wevbini wule a nga vbweta gu mu ningela. 65A di engedza gambe, khuye: “Khu kharato nyi ngu mi embelani, kheni: Mwalo atago gwangu a gumba ningwa khu Babe wangu.”

66Gukhugela avbovbo, vapizane nya vangi va di bwelela hwane va mu diga, va si gimbili gambe naye. 67Khu kharato, Jesu a di wudzisa vale nya likhumi na vavili vapizane vaye, khuye: “Enu nenu mwa gu vbweta gu hongolani, gani?” 68Simoni Pedro a di phindrula, khuye: “Hi naya ga mani, Pfhumu? Olu a gu uwe u gu ni magana nya guvbanye nya gupindruge! 69#Wona gambe: Mat 16:16; Mark 8:29; Luk 9:20. Ethu hi ngu khodwa, gumogo ni gu dziti gukhethu uwe khuwe Gihathwa gya Nungungulu.” 70Jesu a di va phindrula, khuye: “Ina khandreni nyi mi hathidego enu nya likhumi na vavili, gani? Ambari ulo, moyo wanu Sathane.” 71A di thula Judha mwamana wa Simoni Sikarioti, kholu khuye a nga bani a gu vbweta gu mu ningela, ambari a nga bani ari moyo nya vale nya likhumi na vavili.

Currently Selected:

Johane 6: BGE2014

Highlight

Copy