Genesi 8
8
Gubosa nya ndrambi
1Nungungulu a di alakanya Nowa ni sirengo satshavbo nya likhabi, ni sifuyo si nga bani siri ni Nowa taroni. A di wusa phuvbo yi gu furugedza mafuni, mati ma phela gubosa.
2Sifefe nya mati ya vbavbatshi ni dzinyangwa dza vbatshani dzi di segega. Ndzadzi yi di hegisa guwa, yi khamuga. 3Mati ma diya na ma gu vbunguga mafuni. Guvbelani nya lizana ni livbandre magumi (150) matshigu, mati ma di boside nya dzadi. 4Khu litshigu nya likhumi na livbandre na mavili nya ngima nya livbandre na mivili, litaro li diya tshegema gigomoni gya Ararati. 5Mati ma di simamisa gu vbwasama kala khu ngima nya likhumi. Khu litshigu nya guphele nya ngima yoyo, gu di phela gu wonega dzitshokha nya sigomo.
6Hwane nya magumana matshigu, Nowa a di tula gihogo a nga bani giride vbalitarotunu.
7A di dusa mahigonganye a wu diga wu vbuvba vbavbandze, aholu wu di bwelela nyamba hwela, kholu gu di lomba guvirela gambe mati mavbwa tigoni. 8Nowa a di dusa lituva gasi gu wona mwendro mati ma vbungugide mafuni. 9Aholu lituva kha la nga ya mana wulanga nya gumbake, kholu mati ma di nga langaladzide mafu yatshavbo; lituva li di bwelela ga Nowa. Uye a di dusa libogo vbavbandze a gu li hakha a li bedza taroni. 10A di virela gambe livbandre na mavili matshigu, a gu li dusa gambe li vbuvba vbavbandze nya litaro. 11Lituva li di wuya gambe gwaye ni silambo, na li pharide khu rotho lihagane nya liphya nya simbo nya olivha. Khavbo avbo, Nowa a di dziti gukhuye mati ma vbwasamide mafuni. 12Khavbo avbo, a di lindrela gambe mambe livbandre na mavili matshigu a gu tshula lituva. Ilo kha la nga wuya gambe.
13Gukhugela litshigu nya guphele nya mwaga, nya ngima nya guhegule, avbo Nowa a nga bani a enedza livbandre na limwedo mazana ni mwaga moyo (601) nya guvelegwe gwaye, mati ma di vbwide mafuni. Nowa a di tula vbatshani nya litaro a gu holela vbavbandze, a wona gukhuye litigo latshavbo li bangide. 14Khu litshigu nya likhumi na livbandre na mavili, nya ngima nya wuvili, mafu yatshavbo ma di bangide gwadi.
Guphela nya litigo liphya
15Khavbo avbo, Nungungulu a di embela Nowa, khuye: 16“Duga khu taroni, uwe ni mwangadzi wago ni sanana sago satshavbo ni vagadzamwane vago. 17Dusa niso sirengo satshavbo u gu naso litaroni, mafumbu yatshavbo nya sinyoni, sirengo nya sikhongolo ni esi nya sidugwana ni iso nya gukhwirire khu lididi mafuni, gasi si velegelana, si andra si tadza mafu.”
18Nowa a di duga khu taroni ni mwangadzi waye, ni sanana saye ni vagadzamwane vaye.
19Khu hwane gwaye gu di duga niso, khu mafumbu yawe, sirengo satshavbo si khwirirago khu lididi mafuni, ni sinyoni ni sirengwanana si vbanyago mafuni.
20Nowa a di gira giluvelo a gi phasela ga Pfhumu Nungungulu. A di dzega gimwegyo ga lifumbu ni lifumbu nya sinyoni ni sirengo sile nyamba loledziswa gu hodzwa, a gu luva Pfhumu Nungungulu khu phaselo nya mhamba nya guvbiswe vbagiluvelotunu. 21Pfhumu Nungungulu a dipwa gunengela gwadi nya ningelo wule, a gu ganela, khuye: “Gima kha nyi na nga vala gambe litigo khu kotani nya gughohe ga muthu. Ambari olu muthu gukhugela wananani gwaye a alakanyelago guvivba monyoni gwaye. Aholu, Eni gima kha nyi na nga fuvisa gambe sirengo satshavbo si vbanyago, kha nga edzi nyi giridego.”
22“Gikhati gyatshavbo mafu ma na simamago na ma romo,
guyala ni guhavela,
guvbisa ni girame
matshiga ni maronga,
mihani ni wutshigu,
gima kha si na fuva.”
Currently Selected:
Genesi 8: BGE2014
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.