Genesi 47

Jakobe a ngu bikedwa gwa Faro

1Khavbo avbo, Josefa a di ya bikela mahungu ga Faro, khuye: “Babe wangu ni vandriyangu va dzude khu tigoni ga Khanani; va dzude ni sifuyo sawe nya sidugwane ni esi nya sikhongolo, ni silo sawe satshavbo, olu vomo gipandrengulu gya Goseni.” 2A di dzega livbandre vama vbakari ga vandriyaye, a va bikela ga Faro.

3Faro a di va wudzisa, khuye: “Khu wevbini thumo wanu?”

Avo va di hakha Faro, khavo: “Sithumi sago, vahavisi, ethu ambari vababe vathu.” 4Va di ganela gambe ga Faro, khavo: “Hi rurede tigoni momu, kholu gu ngu hamugega mwasi nya guhavise mitshambi ya sithumi sago, gambe ndzala yingi ngudzu tigoni ga Khanani. Olu hi ngu gu lomba u dzumedzisa sithumi sago guya vbaha tigoni ga Goseni.”

5Khavbo avbo, Faro a di embela Josefa, khuye: “Babe wago ni vandriyago va dzude gasi guta khala vbafuvbi nago. 6Litigo rumba la Egipito lomo mandzani gwago; hatha gipandre nya gyadi nya litigo u vega umo babe wago ni vandriyago. Va na vbahe tigoni ga Goseni, gambe wa gu wona gukhuwe vbakari gwawe vomo vathu nya guti, va hathe u va vege kha nga vawoneleli nya mitshambi yangu.”

7Josefa a di bedza babe waye Jakobe aya mu bikela ga Faro; Jakobe a di kategisa Faro. 8Faro a di wudzisa Jakobe, khuye: “Khu wevbini tengo nya myaga nya guvbanye gwago?”

9Jakobe a di hakha, khuye: “Tengo nya myaga nya lendro langu, lizana ni magumararu (130) myaga. Gikhati nya myaga nya guvbanye gwangu gi rode gambe gi tade khu gutshaniseka, kha gi ningani ni myaga nya guvbanye ga vababe vangu, matshiguni nya guendre gwawe.” 10Jakobe a di kategisa Faro, a gu duga.

11Khavbo avbo, Josefa a di vega babe waye ni vandriyaye, a va ninga sipeto malangani nya yadi ngudzu ya tigoni ga Egipito, ga gipandre gya Ramisesi, kha nga edzi a nga embedwago khidzo khu Faro. 12Josefa a di sayisa babe waye ni vandriyaye gumogo ni ngamo yatshavbo ya babe waye, a va ninga guhodza gukhedza khu tengo nya sanana sawe.

Josefa a ngu renga litigo latshavbo la Egipito gasi gu ninga Faro

13Gu di hamugega guhodza tigoni gwatshavbo; ndzala yi diri yingi ngudzu, Egipito ni litigo la Khanani, vathu va di rereka khu kotani nya ndzala. 14Josefa a di hengeledzela dzitsapawu dzatshavbo dzi nga bani dzi romo tigoni ga Egipito ni Khanani, khu sivbila va nga bani va ta renga, a di dzega dzitsapawu dzodzo a dzi bedza nyumbani ga Faro. 15Gikhati dzitsapawu dzi vbedego tigoni ga Egipito ni Khanani, Vagipiti vatshavbo va diya ga Josefa va ya, khavo: “Hi ninge guhodza. Ina hi nafa nu gu hi wona, kholu hi vbedzidego dzitsapawu, gani?”

16Josefa a di hakha, khuye: “Resani sifuyo sanu, eni nyi na mi ningani guhodza, kha nga mu vbedzidego dzitsapawu.” 17Vathu va di resa sifuyo ga Josefa; uye a di va ninga guhodza va resa dzikavalu, sifuyo nya sidugwane ni esi nya sikhongolo ni dziburu, uye a di va vbanyisa khu guhodza ndrani nya mwaga wule watshavbo.

18Gu vbelani nya mwaga wule, va dita gambe vathu ga Josefa va ta mu embela, khavo: Kha hi dzi kodzi gu sihela muthangeli wathu lisine nya gukhethu, olu hi gu ningidego dzitsapawu ni sifuyo sathu satshavbo mandzani gwago, hi mwalo gambe gimbe gilo nya gu gu ninge vbavbandze ga sivili sathu ni sipeto sathu. 19Ina u na hi diga hifa mbeli gwago, ethu gumogo ni sipeto sathu, gani? Hi renge ethu gumogo ni sipeto sathu khu gu hi ninga guhodza, gasi ethu gumogo ni sipeto sathu, hi na khala dzikhumbi dza Faro; hi ninge mbewu hi kodze guvbanya hi sifi, gasi litigo li si khali giwula.

20Khu magirelo yoyo, Josefa a di rengela Faro litigo latshavbo la Egipito, kholu Vagipiti vatshavbo va di rengisela sipeto sawe khu gupwa gutshaniswa khu ndzala. Khu guralo, litigo latshavbo la Egipito li di lumba Faro. 21Josefa a di dzega vathu vatshavbo va tigoni ga Egipito a va gira dzikhumbi. 22Aholu gima kha renga sipeto sa vaphasi nya mhamba, vaphasi nya mhamba va di gu hakhiswa khu Faro tengo nya gukari, va di vbanya khu tengo wowo va nga bani na va gu hakhiswa khu Faro; khu guralo, avo kha va rengisa sipeto sawe.

23Josefa a di embela vathu, khuye: “Gukhugela muhuno, enu gumogo ni sipeto sanu, mwa gu lumba Faro. Khiyo eyi mbewu, yalani marembweni. 24Avbo nya gikhati nya guvbwere, mu na ningela ga Faro gipandre nya livbandre, gasi simbe sipandre nya sina si na lumba enu, gu vega mbewu nya guyale marembweni ni gu hodzani enu, ni vathu vanu ni gu hodzisa ngamo yanu.”

25Vathu va di hakha, khavo: “Uwe u vbanyiside womi wathu! Hi mane wuhigo mbeli ga mune wathu, hi na simama gu khala dzikhumbi dza Faro.”

26Josefa a di vega nayo tigoni gwatshavbo gwa Egipito nya hwengo nya gipandre nya livbandre wu yelago gu ningwa Faro, nayo yoyu wu simamago kala na muhuno. Vbavbandze ga nayo yoyu, gu di tshala basi sipeto sa vaphasi nya mhamba kholu si di si fumedwi khu Faro.

Sileletelo nya guhegise sa Jakobe

(Genesi 23:17-19; 24:2; 49:29-32; 50:5)

27Israyeli a di vbaha tigoni ga Egipito a khala iyo, gipandre ngulu gya Goseni; va na Israyeli va di renga sipeto va velegelana ngudzu khu tshivba.

28Jakobe vbanyide likhumi na livbandre na mivili myaga tigoni ga Egipito; matshigu nya guvbanye gwaye lizana ni magumana na livbandre na mivili (147) myaga. 29Na ma gu hidzimela matshigu nya gufe ga Jakobe, a di ranisa mwanaye Josefa a mu embela, khuye: “Nya gu bani nyi manide wuhigo mbeli gwago, nyi ngu gu lomba u vege mandza yago vbanyongatunu gwangu u nyi girela wuwadi ni gu tumbega, nyi ngu gu lomba u nga nyi dzingi tigoni ga Egipito. 30#Wona gambe: Gen 49:29-32; 50:6. Aholu nyi yise nyi ya lala gumogo ni vavelegi vangu; u na nyi dzega u nyi dusa tigoni ga Egipito, u ya nyi dzinga thowoni gwawe.” Josefa a di hakha, khuye: “Nyi na gira esi u nyi embelago.”

31Khavbo avbo, Jakobe a di simamisa a ganela, khuye: “Sambanya nyi gupwa.” Josefa a di sambanya, Israyeli a di noga a khozela vbagikhuledzotunu nya lidawu laye.

Currently Selected:

Genesi 47: BGE2014

Highlight

Copy