Genesi 36

Livelego la Esawu

(1 Dzikoronika 1:35-54)

1Esi khu sanana sa Esawu, a gu uye Edhomi.

2Esawu a di dzega vagadzi vavili vbakari nya vanyamahegyane va tigoni gwa Khanani: Adhani, nyamahegyane wa Eloni, Muhiti, ni Owolibama, nyamahegyane wa Ana, gyanana gya Kibeyoni, Muhevhi; 3#Wona gambe: Gen 26:34. hwane nya ava, a di dzega Bhasemati, nyamahegyane wa Ismayeli, ndruye wa Nebhayoti.

4Adha velegide ni Esawu gyanana nya gupwani khu Elifazi; Bhasemati a velega Reweli; 5Owolibama a di velega Jewusi, Jalamo ni Kora. Esi khu sanana sa Esawu si velegidwego tigoni gwa Khanani.

6Esawu a di dzega vagadzi vaye, ni sanana saye nya vama ni esi nya vanyamayi ni vathu vatshavbo va ndrangani gwaye, mitshambi yaye, sirengo saye satshavbo ni silo saye satshavbo a nga thumago tigoni gwa Khanani, a hongola ga limbe litigo, a hambana ni ndriyaye Jakobe. 7Kholu dzithomba dzawe dzi di tade ngudzu, nyamba dzi kodza gu khala dangamwedo, wulanga va nga bani va vbanya avbo wu di si eneli khu kotani nya mitshambi ya avo va vavili. 8Khavbo avbo, Esawu, a gu uye Edhomi, a diya vbaha gigomoni gya Seyiri.

Sanana sa Esawu tigoni ga Edhomi

9Esi khu sanana sa Esawu, nyapandre wa Vaedhomi, a velegidego gigomoni gya Seyiri.

10Aya malina ya sanana sa Esawu: Elifazi, gyanana gya Adha, mwangadzi wa Esawu; Reweli, gyanana gya Bhasemati, mwangadzi wa Esawu.

11Sanana sa Elifazi, khesi: Temani, Omari, Sefo, Gayetani ni Kenazi.

12Elifazi, gyanana gya Esawu, a diri ni gibhayi nya gupwani khu Timina, uye a di velegela gyanana Elifazi va gi rana khavo khu Amaleki. Esi khu situgulwana sa Adha, ngadza Esawu.

13Sanana sa Reweli, khesi: Nahati, Zera, Sama ni Miza. Esi khiso situgulwana sa Bhasemati, ngadza Esawu.

14Esi khu sanana sa Owolibama, nyamahegyane wa Ana, gyanana gya Kibeyoni, ngadza Esawu: Jewusi, Jalamo ni Kora.

Vathangeli va Edhomi

15Ava khu vathangeli nya sanana sa Esawu. Sanana sa Elifazi, mwamana nya matiwula ya Esawu si nga khalago vathangeli, khesi: Temani, Omari, Sefo, Kenazi, 16Kora, Gayetani ni Amaleki. Ava khavo va nga khalago vathangeli nya linyumba la Elifazi tigoni gwa Edhomi. Khiso esi situgulwana sa Adha.

17Sanana nya lihundzu la Reweli, gyanana gya Esawu, si nga khalago vathangeli, khesi: Nahati, Zera, Sama ni Miza. Ava khavo va nga khalago vathangeli nya linyumba la Reweli tigoni gwa Edhomi. Khiso esi situgulwana sa Bhasemati, ngadza Esawu.

18Esi khu situgulwana sa Owolibama, ngadza Esawu si nga khalago vathangeli: Jewusi, Jalamo ni Kora. Khavo ava vathangeli va nga velegwa khu Owolibama, nyamahegyane wa Ana, ngadza Esawu.

19Esi khiso sanana sa Esawu, a gu uye Edhomi; khavo gambe vathangeli vawe.

Situgulwana sa Seyiri

(1 Dzikoronika 1:38-42)

20Esi khu sanana sa Seyiri, Vahorita, vathu nya guphele va nga vbahago tigoni mule: Lotani, Sobhali, Kibeyoni ni Ana, 21Dhisoni, Eseri ni Dhisani. Khavo ava vathangeli va Vahorita, sanana sa Seyiri, tigoni ga Edhomi.

22Sanana sa Lotani khu Hori ni Homani; ndruye nya nyamayi wa Lotani khu Timina.

23Sanana sa Sobhali, khesi: Alivhani, Manahati, Ebhali, Sefo ni Onani.

24Esi khu sanana sa Kibeyoni: Ayiya ni Ana. Khuye Ana yoyu a nga tugulago nambo nya mati nya guvbise giwulani na gu havisa dziburu dza babe waye Kibeyoni.

25Ana velegide gyanana gimwegyo nya gikhwathana gi ranwago pwani khu Dhisoni ni gyanana gimwegyo nya gupwani khu Owolibama.

26Sanana sa Dhisoni, khesi: Hendani, Esibhani, Jitarani ni Karani.

27Sanana sa Ezeri, khesi: Bhilani, Zahavani ni Akani.

28Sanana sa Dhisani, khesi: Uzi ni Arani.

29Khavo ava vathangeli nya mahundzu ya Vahori: Lotani Sobhali, Kibeyoni, Ana, 30Dhisoni, Eseri ni Dhisani. Ava khu vathangeli nya Vahori gukhedza khu lihundzu lawe, tigoni gwa Seyiri.

Vafumeli ni vathangeli va Edhomi

(1 Dzikoronika 1:43-54)

31Ava khavo vafumeli va nga fumelago tigoni gwa Edhomi, na gu si gu manegi mufumeli nya gufumele sanana sa Israyeli: 32Tigoni ga Edhomi mufumeli nya guphele khu Bhela, mwamana wa Bheyori; lina nya lidhoropa laye a nga velegedwa umo khu Dhinabha. 33Gikhati a fudego Bhela, wulanga waye a di fuma Jobhabhi, mwamana wa Zera wa Bhozira.

34A difa Jobhabhi, wulanga waye a gu fuma Husamo wa gipandre gya Temani.

35Na fude Husamo, wulanga waye a di fuma Hadhadhi, mwamana wa Bhedhadhi, a nga palago Madhiyani mapanini ya Mowabhi. Lina nya lidhoropa laye khu Avhiti.

36A difa Hadhadhi, wulangani gwaye a di fuma Samila wa Masireka.

37Na fude Samila, wulangani gwaye a di fuma Sawule wa Reyobhote, vbafuvbi ni tsongo wa Ewufrate.

38Sawule a difa, wulangani gwaye gu fuma Bhahali-Hanani, mwamana wa Akibhori.

39Bhahali-Hanani, mwamana wa Akibhori a difa, wulangani gwaye gu fuma Hadhari wa dhoropani ga Pawu, mwangadzi waye a diri uye Mahetabheli, nyamahegyane wa Matiredhi, gyanana gya Me Zahabhi.

Vambe vathangeli va Edhomi

40Aya khu malina nya vathangeli nya situgulwana sa Esawu, gukhedza khu dzindranga, malanga ni lihundzu lawe: Muthangeli Timina, ni Alivha, ni Jeteti, 41Owolibama, ni Ela, ni Pinoni, 42Kenazi, ni Temani, ni Mibizari, 43Magidhiyeli ni Irani. Khavo ava vathangeli va Edhomi gukhedza khu dzindranga dzawe ni mayigo va nga fumelago.

Esawu khuye nyapandre wa vathu va Edhomi.

Currently Selected:

Genesi 36: BGE2014

Highlight

Copy