Genesi 29
29
Jakobe a ngu manana ni Rakeli
1Jakobe a di simama ni liendro laye kala a vboha tigoni ga vathu va Khugadambo. 2A di khusa maho a wona nambo. Vbafuvbi ni nambo wowo gu di mbambamede mitshambi miraru nya dzinvuta, kholu namboni momo gu di sedzwa umo mati mitshambi; gu diri ni giwindri nya gikhongolo gi nga bani gi sega likana nya nambo. 3Giwindri gi di redwa basi gikhati yi tshanganago mitshambi yatshavbo ni vahavisi vawe gasi va kodza guya sedza mati dzinvuta va bwelo khavbo va sega gambe likana nya nambo.
4Jakobe a di wudzisa vahavisi, khuye: “Mwa guta khu hayini vandriyangu?” Avo va di hakha, khavo: “Ethu ha guta khu Harani.”
5Jakobe a di engedza, khuye: “Mu ngu mutini Laboni mwamana wa Nahori, gani?”
Avo va di hakha, khavo: “Hi ngu muti.”
6Uye a di va wudzisa, khuye: “A ngari wadi uye, gani?” Avo va di hakha, khavo: “A ngari wadi. Nyamahegyane waye nya gupwani khu Rakeli khuye wule atago ni tshambi.”
7Uye a di va embela, khuye: “Gu ngari mihani, gi si gu vbohi gikhati nya gu tombanise mitshambi yatshavbo. Sedzani mati dzinvuta mu bwelele nadzo mu ya dzi havisa.”
8Va di mu hakha, khavo: “Ahihi. Kha hi dzi kodzi, kala yi tshangana mitshambi yatshavbo. Khavbo hi ndreyisago giwindri gi segago nambo, hi ninga mati mitshambi yi sela.”
9Na nga gu bhula navo, a di vboha Rakeli ni tshambi wa babe waye, kholu a diri muhavisi. 10Avbo Jakobe a nga wonago Rakeli nyamahegyane wa Laboni, ndruye wa mayi waye, ni dzinvuta dza kokwe waye Laboni, a diya wumbulusa giwindri gi segago likana nya nambo a gu sedza mati tshambi wa Laboni, ndruye wa mayi waye. 11Khu hwane a di losa Rakeli khu bhesu, a phela gu lila khu lito nya gukhugege ngudzu. 12Jakobe a di tivisa Rakeli khuye uye nongo wa babe waye, kholu gyanana gya Rebheka; Rakeli a di tutuma aya tivisa babe waye.
13Avbo Laboni a ngapwago mahungu ya Jakobe, mwamana wa ndriyaye, a di tutuma a mu khinga, a mu wugarela a mu bhejari, a hongola naye ndrangani gwaye. Jakobe a di embeledzela Laboni satshavbo iso si nga dugelelago. 14Laboni a di mu embela, khuye: “Khu lisine, uwe u novba wangu, u wa nyama yangu.” Jakobe a di khala ni Laboni tanga nya ngima rumba.
Dzegano wa Jakobe
15Khu hwane, Laboni a di wudzisa Jakobe, khuye: “Ina u ngu yela gu nyi thumela mahala basi kholu u gu nongo wangu, gani? Nyi embele kharini u yelago gu hakha?”
16Khu guralo, Laboni a diri ni vanyamahegyane vavili; uye nya koma a di ranwa gupwani khu Liya, uye nya nandra pwani khu Rakeli. 17Liya a diri ni maho nya siphithu, gasi Rakeli a diri mbiri nya gukhedzege nya gumbure ngudzu. 18Kha nga Jakobe a nga bani a gu gola ngudzu Rakeli, a di ganela, khuye: “Nyi na gu thumela livbandre na mivili myaga nyi fela gu dzega Rakeli, nyamahegyane wago nya nandra.”
19Laboni a di hakha, khuye: “I tshukwana ngudzu gu mu ningela gwago, guvbindra gu mu ningela ga mumbe mwama; khala ndrangani gwangu.” 20Jakobe khu gufela Rakeli, thumide livbandre na mivili myaga; aholu uye a di yi wona kha nga matshigu madugwana; kholu a di gu haladza ngudzu Rakeli.
Liya ni Rakeli
21Jakobe a di embela Laboni, khuye: “Nyivbe mwangadzi wangu, kholu matshigu yangu ma vbede, olu nyi ngu yela gu dzegana naye.”
22Laboni a di ramba vathu vatshavbo va wulanga wule a gira buzo. 23Aholu, ni wutshigu, Laboni a di yisa mwanaye Liya ga Jakobe. Uye a di hengela lidawu naye. 24Laboni a di dzega githumi gyaye nya nyamayi nya gupwani khu Zilipa, a ninga mwanaye Liya gasi gi mu thumela.
25Ni dzimindru, gikhati Jakobe a nga wonago gukhuye gasi khu Liya a gu naye, a di embela Laboni, khuye: “Ginani esi u nyi giredego? Gasi eni kha nya gu thumela livbandre na mivili myaga khu gola Rakeli, gani? Khu ginani olu u nga nyi pemba?”
26Laboni a di hakha, khuye: “Tigoni gwathu kha hi olovedzi kharato, gu ningela nyamahegyane nya nandra a hegudza uye nya koma gu dzegwa. 27Olu vbedza semana yeyi nya buzo, hi na gu ninga gambe mumbe, u na thuma gambe yimbe livbandre na mivili myaga ndrangani gwangu.”
28Jakobe a di gira kharato. Guvbelani nya semana nya buzo, Laboni a di mu ninga mwanaye Rakeli, a khala mwangadzi waye. 29Laboni a di ningela githumi gyaye nya nyamayi nya gupwani khu Bhila gasi gu thumela mwanaye Rakeli. 30Jakobe a di hengela malawu ni Rakeli, a gu haladza ngudzu Rakeli guvbindra Liya. Jakobe a di simama gu thumela Laboni yimbe livbandre na mivili myaga.
Sanana sa Jakobe
31Avbo Pfhumu Nungungulu a nga wona nya gukhuye Liya kha godwi, a di mu ninga livelego; gasi Rakeli a di khala nyamba velega. 32Liya, a di khura mimba, a velega gikhwathana, a nga gi riyago lina la Rubheni, kholu a di khuye: “Pfhumu pwide gusaniseka gwangu, khu guralo, olu mwama wangu a na nyi haladza.”
33A di engedza a khura mimba, a velega gambe gikhwathana, a ganela, khuye: “Pfhumu dzitide gukhuye nyi ngu nyenywa, a nyi ningide gambe oyu”; a mu riya lina la Simiyoni.
34Liya a di engedza a khura gambe mimba, a velega gambe gikhwathana, a ganela, khuye: “Olu mwama wangu a na hungega avbo gwangu, kholu nyi mu ningide sanana siraru.” A di gi riya khuye khu Levhi.
35A engedza gambe a khura mimba, a velega gimbe gyanana nya gikhwathana; khavbo avbo, a di ganela, khuye: “Olu nyi na bonga Pfhumu Nungungulu. Khu guralo, a di gi riya lina la Judha. A hegisa, kha nga velega gambe.”
Currently Selected:
Genesi 29: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
