Genesi 22

Nungungulu a ngu linga Abrahama

(Valamuli 11:28-40)

1Hwane nya gugirege satshavbo sesi, Nungungulu a di linga Abrahama. A di mu rana, khuye: “Abrahama!” Abrahama a di hakha, khuye: “Nyi womo avba.”

2A di mu embela, khuye: “Dzega mwanago Isaki, gyanana gyago gya gimwegyo basi u gi golago ngudzu, u bela ndzilani u gu hongola tigoni ga Muriya. Nu vbohide iyoyo, u na mu songa u gira khuye mhamba nya phaso nya guvbiswe, gigomoni nyi na gu nonedzago.”

3Khavbo avbo, Abrahama a di wuga ni dzimindru ngudzu, a ambagisa sighwabhata giburwana, a dzega sithumi saye sivili, ni mwanaye Isaki, a di koka dzikhuni nya miphaso, a bela ndzilani nya guhongole wulanga a nga leletedwago khu Nungungulu. 4Khu litshigu nya wuraru, Abrahama a di khusa maho, a gu wona wulanga na ngari hwindzo. 5A di embela sithumi saye, khuye: “Enu tshalani avba ni giburwana. Eni ni gyanana hi na vbindra hi hongola mbeli hi ya khozela. Hi na wuya nugunugu hi ta mu mana avba.”

6Abrahama a di dzega dzikhuni nya miphaso a dzi handzega magatani ga mwanaye Isaki, uye a di phara nilo ni ngala mandzani, va bela ndzilani va vavili. 7Khavbo avbo, Isaki a di wudzisa babe waye Abrahama, khuye: “Ama baba!”

Abrahama a di mu hakha, khuye: “Ganela, mwanangu.”

Isaki a engedza, khuye: “Avba, hi na ni nilo ni dzikhuni; aholu yomo evbini nvuta nya miphaso?”

8Abrahama a di hakha, khuye: “Nungungulu a na hi ninga nvuta nya miphaso nya guvbiswe, mwanangu.” Khu guralo, va di gimbila gumogo vatshavbo.

9 # Wona gambe: Jak 2:21. Na va vbohide wulanga wule va nga leletedwago khu Nungungulu, Abrahama a di gira giluvelo, a gu handzega avbo dzikhuni, a hunga mwanaye Isaki, a mu handzega vbadzikhunitunu vbatshani nya giluvelo. 10Abrahama a di khusedza libogo a gu dusa ngala a vbweta gu paya gyanana gyaye. 11Aholu, ngilozi ya Nungungulu yi di mu rana khu vbatshani Ndzadzini, khiyo: “Abrahama! Abrahama!”

Uye a di hakha, khuye: “Nyi womo avba.”

12Yi di engedza gambe yi mu embela, khiyo: “U nga khusi libogo lago u songa gyanana, u nga gi bayisi. Olu nyi ngu wona gukheni u na ni githawo ga Nungungulu, kholu khwa nyi bombela mwanago, gyanana gyago gya gimwegyo basi.”

13Khavbo avbo, Abrahama a di khusa maho, a wona nvuta mweyo na yi khwetede khu dzikeho misimboni. A di yi dzega a gu gira khiyo mhamba nya miphaso nya guvbiswe, a dzegisa khiyo mwanaye. 14Abrahama a di rana wulanga wule khuye: “Pfhumu Nungungulu a na ninga phindrulo.” Kala na muhuno gu ganedwa gupwani: “Gigomoni a ningago phindrulo Pfhumu Nungungulu.”

15Khavbo avbo, ngilozi ya Nungungulu yi di rana gambe Abrahama nya wuvili khu vbatshani ndzadzini, 16khiyo: “Nyi ngu sambanya khu lina langu furi gu ganela Pfhumu gukheni, olu u giridego kharati, u si feleli gu nyi ninga mwanago, gyanana gyago nya gimwegyo basi, 17#Wona gambe: Hebh 11:12. Eni nyi na gu kategisa; nyi na engedzela livelego lago khu sanana nya singi ngudzu, nya gutale kha nga dzinyeledzi dza ndzadzini, kha nga mafu nya fungu wa phwani. Sanana sago si na khozisa valala vawe si gu va dzegela madhoropa yawe. 18Mayigo yatshavbo ya mafuni, ma na kategiswa khu ga melego wago, kholu uwe u yingiside magana yangu.”

19Khavbo avbo, Abrahama a di bwelela avbo si nga bani na siri avbo sithumi saye, va ya wuya vatshavbo gumogo Bherisebha, iyo a ngaya vbahago ndranga yaye.

Livelego la Nahori

20Na si giregide satshavbo sesi, va dita tivisa Abrahama, khavo: “Milika nuye velegide livbandre na siraru sanana ni ndriyago Nahori.” 21Uzi khuye matiwula yakone, ni ndriyaye Bhuzi, Kemuweli babe wa Arani, 22Kesedi, Hazu, Pilidasi, Judilafi ni Bhetuweli. 23Bhetuweli khuye babe wa Rabheka. Khiso esi sanana nya livbandre na siraru a nga velega Milika ni Nahori, ndruye wa Abrahama. 24Mwanagadzi waye nya wuvili, nya gupwani khu Rewuma a velegide nuye Teba, Gahami, Tahasini ni Mahaka.

Currently Selected:

Genesi 22: BGE2014

Highlight

Copy