Genesi 12

II. MATIMO YA VANYAPANDRE

(Genesi 12:1—50:26)

Guvbanya gwa Abrama

(Genesi 12:1—23:20)

1 # Wona gambe: Mith 7:2-3; Hebh 11:8. Pfhumu Nungungulu a di embela Abrama, khuye: “Diga litigo lago, la valongo vago ni ndranga ya babe wago, u hongola ga litigo nyi na gu nonedzago. 2Nyi na wusa khu uwe litigo nya vathu nya vangi. Nyi na gu kategisa, nyi gu ninga lina nya wuzundzo, u na khala uwe gikategiso. 3#Wona gambe: Gal 3:8. Nyi na kategisa avo va gu kategisago, nyi vala avo va na gu valago. Vathu vatshavbo va tigoni va na kategiswa khu kotani gwago.”

4Abrama a di khuga a bela ndzilani kha nga guruma gwa Pfhumu Nungungulu. A di dzega Loti. Abrama a diri ni livbandre na mavili magumi ni livbandre (75) myaga, gikhati a khugidego khu tigoni ga Harani.

5A di dzega mwangadzi waye Sarayi ni Loti, gyanana gya ndriyaye, ni silo saye satshavbo a nga bani nari naso ni vathu va nga bani va mu thumela tigoni gwa Harani, va bela ndzilani vatshavbo va hongola tigoni gwa Khanani. Na va vbohide tigoni gwa Khanani, 6Abrama a di li tsemakanya khu vbakari ni vbakari kala a vboha dhoropani gwa Sikemi, vbafuvbi ni simbo nya wukhongolo wa Moreya. Vakhanani va di gu vbanya tigoni mule.

7 # Wona gambe: Mith 7:5; Gal 3:16. Pfhumu Nungungulu a di dzi wonegisa ga Abrama a mu embela, khuye: “Nyi na ninga litigo leli situgulwana sago.” Abrama a di vbaha vbale giluvelo gya Pfhumu Nungungulu a nga dzi wonegisago gwaye. 8A di khuga khu vbale a gu hongola mbeli kala gigomoni gi guromo phuvbo ga Khugadambo ga lidhoropa la Bheteli. A di tsitsa avbo mitshatsha yaye na gu wona Bheteli khu Muhwadambo, ni Hayi khu Khugadambo; a di gira gambe giluvelo a gu phasela avbo lina la Pfhumu Nungungulu. 9Abrama a di simamisa gu gimbila liendro laye, na gu ema avba, na gu ema vbale, na gu thonona Negebhi.

Abrama ni Sarayi tigoni ga Egipito

(Matewu 2:13-15)

10Gu di manega ndzala tigoni mule, Abrama a di thavela tigoni ga Egipito, aya vbanya iyo gikhati nya gukari, kholu, ndzala yi diri yikhongolo ngudzu. 11Vari vbafuvbi ni gu bela tigoni ga Egipito, Abrama a di embela mwangadzi waye Sarayi, khuye: “Upwa, nyi ngu dziti nya gukheni u nyamayi nya gumbure ngudzu. 12Avbo Vagipiti va na gu wonago, va na, khavo: I mwangadzi waye, va na nyi songa, va gu diga uwe u vbanya. 13Khu guralo, nyi ngu gu lomba gukheni u ganela gukhuwe u ndriyangu, gasi nyi fela gu pharwa gwadi khu kotani yago.”

14Abrama na vbohide tigoni ga Egipito, Vagipiti va di wona gukhavo mwangadzi waye mburide ngudzu. 15Manganagana ya Faro, gikhati ma nga mu wonago, ma di ya ganela khu uye ga Faro, ma zundza wumburi waye. Khu guralo, mwangadzi wa Abrama a di dzegwa a yiswa nyumbani ga Faro. 16Khu kotani yaye, Abrama a di pharwa gwadi ngudzu, a gu ningwa dzinvuta, dzimombe ni dziburu, sithumi nya vama ni vanyamayi, dziburu nya migadzi ni dzingameriya.

17Aholu Pfhumu Nungungulu a di tsayisa khu mitungu nya yikhongolo Faro ni ndranga yaye khu kotani ga Sarayi mwangadzi wa Abrama. 18Faro a di rumela guya ranwa Abrama, a ta mu embela, khuye: “Khu ginani u giridego esi kharati? Khu ginani u ngamba nyi embela gukhuwe i mwangadzi wago? 19Khu ginani u nga nyi embela gukhuwe i ndriyago, u nyi diga nyi mu hakha kha nga mwangadzi wangu. Olu dzega mwangadzi wago, oyu, mu dzege u hongola naye.” 20Khavbo avbo, Faro a di ruma masotshwa yaye khu githawo gasi gu bangaladza Abrama ni mwangadzi waye, ni silo saye satshavbo a nga bani nari naso kala va gu duga vbinganoni nya litigo la Egipito.

Currently Selected:

Genesi 12: BGE2014

Highlight

Copy