Ekisodha 9

V. TUNGU NYA LIVBANDRE

Mbendreni nya sirengo

1Khu hwane, Pfhumu Nungungulu a di embela Mosi, khuye: Indra u ya ganela ni Faro, u mu embela, khuwe: “Pfhumu Nungungulu wa Vahebheru a ngu ganela kharati, khuye: Tshula vathu vangu va hongola va ya nyi thumela. 2Kholu, wa gu bomba gu va tshula va hongola, u simama gu va moledzela khu tshivba, 3wona gukhuwe gyandza gya Pfhumu Nungungulu gi na bayisa mitshambi yago yi guromo mapanini, gi bayisa dzikavalu, dziburu, dzingameriya, dzimombe ni dzinvuta; wu na bani wuri tungu nya wukhongolo ngudzu. 4Pfhumu Nungungulu a na vega vbingano, a hambanisa mitshambi ya Israyeli ni mitshambi ya Egipito. Kha gu nafa gilo ga esi si lumbago sanana sa Israyeli.”

5 Pfhumu Nungungulu a di vega gikhati nya gukari a ganela, khuye: “Mindru, Pfhumu Nungungulu a na gira esi tigoni.” 6Khu mindru gakone, Pfhumu Nungungulu a di gira kharato; gu difa mitshambi yatshavbo ya Vagipiti, aholu ga mitshambi ya sanana sa Israyeli, gu mwalo girengo gi ngafago. 7Faro a di ruma gu yati esi si dugeledego, va mu tivisa gupwani ambari ni girengo gimwegyo basi gi mwalo gi fudego vbakari nya mitshambi ya Israyeli; ambari ulo a di simama gu bangisa monyo waye, a si tshuli vathu va hongola.

VI. TUNGU NYA LIVBANDRE NA MOYO

Silondra nya sithunya

(Gutuledwa 16:2-11)

8Khu guralo, Pfhumu Nungungulu a di embela Mosi ni Aroni, khuye: “Tadzani sandza sanu khu nguma wa vbagikhotunu, Mosi a na wu swaya vbatshani, mbeli ga Faro. 9Wu na vbindrugedza wu khala kudzudzwane wu na fenengedzago litigo latshavbo la Egipito. Gu na duga sithunya nya gufufute wusila, milini nya vathu ni sirengo, tigoni gwatshavbo ga Egipito.”

10 # Wona gambe: Gutu 16:2. Khavbo avbo, va di baga nguma wa vbagikhotunu va ya ema mbeli ga Faro. Mosi a di swaya nguma vbatshani, uwo wu di vbindrugedza wu khala mbatata, gu duga sithunya nya makhoro milini nya vathu ni sirengo. 11Dzinyanga dzi di tandrega gu ema mbeli ga Mosi khu kotani nya sithunya, kholu va di tade khu sithunya, idzosaye ni vatshavbo vambe Vagipiti. 12Aholu Pfhumu Nungungulu a di bangisa monyo wa Faro, a si yingisi Mosi ni Aroni, kha nga idzo Pfhumu Nungungulu a nga embelago khidzo Mosi.

VII. TUNGU NYA LIVBANDRE NA WUVILI

Ndzadzi nya maralala

(Dzindzimo 78:47-49; Gutuledwa 8:7; 16:21)

13 Pfhumu Nungungulu a di embela Mosi, khuye: Wuga dzimindrudzile ngudzu, u ya dzi wonegisa mbeli ga Faro, u mu embela, khuwe: “Pfhumu Nungungulu wa Vahebheru a ngu ganela kharati, khuye: Tshula vathu vangu va hongola va ya nyi thumela. 14Kholu gikhati gegi nyi na rumela mitungu yangu yatshavbo gwago ni ga sithumi sago ni ga vathu va tigoni gwago gasi u dziti gukhuwe mwalo mumbe nya gufanane ni eni mafuni gwatshavbo. 15Kholu nari gukhwatshi nyi khuside libogo langu; nari pwani nyi thumiside tshivba yangu nyi gu veta khu tungu, uwe ni vathu vago, olu na mu mbembide mu vbela mafuni. 16#Wona gambe: Rom 9:17.Aholu nyi gu digide u vbanya, khu gufela gukheni u wone tshivba yangu, ni gukheni lina langu li tidwe tigoni gwatshavbo. 17Aholu, uwe u nga gu simama sago gu dzi gugumugisa, u bomba gu tshula vathu vangu va hongola, gani? 18Wona, mindru khu gikhati gegi, nyi na wisa ndzadzi nya maralala nya gulemele ngudzu, aya nya gu gima ma si gu wonwi tigoni gwatshavbo ga Egipito, gukhugela gutumbunuga ga ilo kala muhuno. 19Olu rumela gu ya wuyisa sifuyo sago, ni silo sago satshavbo si guromo vbavbandze. Kholu ndzadzi nya maralala yi na thegela vathu vatshavbo ni sirengo satshavbo si na gu bani si romo vbavbandze, satshavbo si na gu bani sa sa khothedwa mudzinyumbani si nafa.”

20Sithumi sa Faro si nga yingisago sileletelo sa Pfhumu Nungungulu, si di vbiredzela gu wuyisela sithumi ni sifuyo sawe dzinyumbani. 21Aholu uye a ngamba khathala khu lito la Pfhumu Nungungulu monyoni gwaye, a di diga sithumi ni mitshambi yaye vbavbandze.

22Khavbo avbo, Pfhumu Nungungulu a di embela Mosi, khuye: “Khusedza mandza yago ndzadzini, gasi yiwa ndzadzi nya maralala tigoni gwatshavbo ga Egipito, yi thegela vathu, sifuyo ni mwasi watshavbo tigoni ga Egipito.” 23Mosi a di khusa ndronga yaye a gu nonedza damboni, khavbo avbo, Pfhumu Nungungulu a di dzumisa mabara ni gu wisa maralala gu dzura nilo mafuni. Pfhumu Nungungulu a di wisa ndzadzi nya maralala tigoni ga Egipito. 24#Wona gambe: Gutu 8:7; 16:21. Gu di manega maralala na ma pfanganide ni nilo, khu mawelo nya guthise ngudzu, nya gu gima gu di si gu wonwi tigoni gwatshavbo ga Egipito, gukhugela guvbahwa nya ilo. 25Tigoni gwatshavbo ga Egipito ndzadzi nya maralala yi di mbembisa silo satshavbo si nga bani siri vbavbandze, gukhugela vathu kala ni sirengo, maralala ma di songa ni mwasi wa khabini, ma komolela ni misimbo yatshavbo. 26Vbavbandze basi ga litigo la Goseni, umo si nga bani si gu vbanya umo sanana sa Israyeli, umomo kha ma manega maralala.

27Khavbo avbo, Faro a di ruma gu ya rana Mosi ni Aroni, a ta va embela, khuye: “Olu nyi ghohide; Pfhumu Nungungulu lulamide; aholu eni ni vathu vangu hi sighohi. 28Lombelelani ga Pfhumu Nungungulu, kholu hi garade, gasi gu si manegi gambe mabara ni maralala nya guthise ngudzu. Eni nyi na mi tshulani mu hongola nyamba himbedzedwa khu gilo.”

29Mosi a di mu embela, khuye: “Avbo nyi na dugago khu dhoropani nyi na ya khusedza mandza nyi lomba ga Pfhumu Nungungulu; mabara ma na degula ni ndzadzi nya maralala yi na khamuga, ufela gu dziti gukhuwe litigo la gu lumba Pfhumu Nungungulu. 30Aholu eni nyi ngu dziti gukheni uwe gumogo ni madhota yago ni olu gambe kha mu na nga thava mbeli ga Pfhumu Nungungulu.”

31Wu di ghohetedwa wuluva wu nga bani wu thede senge, ni tirigu yi nga bani yi thede makonva. 32Aholu sivbila ni mala kha sa nga ghohetedwa kholu si di bani si si gu rumbugi.

33Khavbo avbo, Mosi a di khuga mahoni ga Faro a duga vbavbandze nya lidhoropa. A di khusedza mandza ga Pfhumu Nungungulu; mabara ma di degula, ni ndzadzi nya maralala yi di khamuga, yi siwi gambe tigoni. 34Faro na wonide gukhuye ndzadzi yi khamugide gumogo ni mabara ni maralala, a di simamisa a ghoha khu gu dzi bangisa monyo waye uye ni sithumi saye. 35Kharati, monyo wa Faro wu di banga; gima kha nga dzumela gutshula sanana sa Israyeli a si diga si hongola, kha nga idzo Pfhumu Nungungulu a nga ganelago khu likana la Mosi.

Currently Selected:

Ekisodha 9: BGE2014

Highlight

Copy