Ekisodha 7
7
1Khavbo avbo, Pfhumu Nungungulu a di embela Mosi, khuye: “U ngu wona, nyi ngu gu gira Nungungulu mahoni ga Faro. Ndriyago Aroni a na khala muprofeti wago. 2Uwe u na ganela satshavbo esi nyi na gu rumago, ndriyago Aroni a na si tivisa ga Faro gasi uye a dige sanana sa Israyeli si duga tigoni gwaye. 3#Wona gambe: Mit 7:36.Aholu, eni nyi na bangisa monyo wa Faro; nyi fela gu engedzela siwoniso ni siliwugiso sangu tigoni ga Egipito. 4Ambari ulo, Faro kha na nga mi yingisani, eni nyi na lemedzisa mandza yangu tigoni ga Egipito, nyi na dusa mabutho yangu, ni vathu vangu, sanana sa Israyeli tigoni ga Egipito khu sitsayiso nya sikhongolo ngudzu. 5Khavbo avbo, Vagipiti, va na dziti gukhavo Eni kheni Pfhumu Nungungulu, avbo Eni nyi na thawuludzago mandza yangu nyi bayisa Vagipiti, nyi dusa sanana sa Israyeli vbakari gwawe.”
6Khu guralo, Mosi ni Aroni va di gira edzi va nga rumwago khidzo khu Pfhumu Nungungulu. 7Mosi a diri ni tanga nya livbandre na mararu magumi myaga, Aroni ni livbandre na mararu magumi ni myaga miraru gikhati va nga ya ganelago ni Faro.
Mitungu tigoni ga Egipito
(Ekisodha 7:8-12-36; Dhewuteronome 6:20-23)
8 Pfhumu Nungungulu a di ganela ga Mosi ni Aroni, khuye: 9“Gikhati Faro a na mi embelago, khuye: Girani giliwugiso, uwe u na embela Aroni, khuwe: Dzega ndronga yago u yi rinya mbeli ga Faro, iyo yi na vbindrugedza yi khala nyoga.”
10Khavbo avbo, Mosi ni Aroni va diya ga Faro va ya gira idzo va nga rumwago khu Pfhumu Nungungulu, Aroni a di rinya ndronga yaye mbeli ga Faro ni ga dzindruna dzaye, ndronga yi di vbindrugedza yi khala nyoga. 11Aholu Faro nuye a di rana va nya guti ni dzinyanga, avo navo va nya guti va Egipito, va di gira navo idzosaye khu wugengeli wawe nya gusihalege. 12Khu guralo, moyo ni moyo a di rinya ndronga yaye, dzi vbindrugedza dzi khala dzinyoga; aholu ndronga ya Aroni yi di midza dzindronga dzawe. 13Ambari ulo, monyo wa Faro wu di banga, a bomba gu yingisa Mosi ni Aroni kha nga idzo a nga ganelago Pfhumu Nungungulu.
I. TUNGU NYA GUHEGULE
Mati ma ngu vbindrugedza ma khala novba
(Ekisodha 4:9; Dzindzimo 78:44; 105:29; Gutuledwa 11:6-8; 16:3-10)
14Khavbo avbo, Pfhumu Nungungulu a di embela Mosi, khuye: Monyo wa Faro wu bangide. A ngu bomba gu diga vathu va duga. 15Indra ga Faro mindru vbadzimindrutunu, gikhati uye a dugago a hongola matini.#7:15 Faro a di gu duga matshigu yatshavbo dzimindrudzile ngudzu, a gu hongola tsongoni aya gira mi lombelo ni gu phasela tsongo kholu wu di khozedwa kha nga nungungulu nya khongolo tigoni ga Egipito kholu khuwo wu ningago tshivba ni guhodza vathu va Egipito. U na mu lindrela bambe nya tsongo, nu pharide mandzani ndronga yile yi nga vbindrugedza yi khala nyoga. 16U na mu embela, khuwe: “Pfhumu Nungungulu wa Vahebheru a nyi rumede gwago, guta gu embela, kheni: Diga vathu vangu va duga gasi va ya nyi thumela giwulani, aholu uwe kala olu khu dzini gu nyi yingisa.” 17#Wona gambe: Gutu 16:4. Pfhumu Nungungulu a di ganela kharati, khuye: “Olu u na dziti gukhuwe kheni Pfhumu Nungungulu, nyi na veta mati nya tsongo, khu ndronga nyi gu nayo mandzani, ayo ma na vbindrugedza ma gu khala novba. 18Dzindzandzi dzi guromo tsongoni dzi nafa, mati ma na nunga, Vagipiti va na nyenya gusela mati ya tsongoni.”
19 Pfhumu Nungungulu a di engedza gambe a embela Mosi, khuye: “Embela Aroni, khuwe: Phara ndronga yago, u khusedza mandza yago vbatshani nya mati ya Egipito, vbatshani nya mitsongo ni vbatshani nya sitsongwana sawe, vbatshani nya matsiva ni vbatshani nya madhamu yawe, mati ma na vbindrugedza ma khala novba, gu na manega novba tigoni gwatshavbo gwa Egipito, ambari somboni nya guvatwe ni esi nya siwindri.”
20Mosi ni Aroni va di gira kha nga idzo va nga rumwago khidzo khu Pfhumu Nungungulu. A di khusa ndronga a gu veta mati nya tsongo, na gu wonwa khu Faro ni madhota yaye. Mati yatshavbo ya tsongoni ma di vbindrugedza ma khala novba. 21Dzindzandzi dzi difa tsongoni, tsongo wu di nunga, Vagipiti va di tandrega gu sela mati ya tsongoni, gu di manega novba tigoni gwatshavbo ga Egipito.
22Aholu dzinyanga dza tigoni ga Egipito dzi di gira nidzo idzosaye khu wugengeli waye. Aholu monyo wa Faro wu di banga, gima kha va yingisa kha nga idzo a nga ganela khidzo Pfhumu Nungungulu. 23Aholu, Faro a di thendregedza a va pfhurarela a gu bela nyumbani gwaye; nyamba thela kota khiso. 24Vagipiti vatshavbo va di kemba milambo bambe nya tsongo, va vbweta mati nya gusele, kholu va di tandrega gu sela mati ya tsongoni.
25Kharati gu di vbindra livbandre na mavili matshigu hwane nya gu Pfhumu Nungungulu na vetide tsongo.
Currently Selected:
Ekisodha 7: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
