Ekisodha 4

Nungungulu a ngu ninga tshivba Mosi

1Aholu Mosi a di phindrula, khuye: “Ahati avo va gumba khodwa gwangu, va si yingisi lito langu va ganela, khavo: Pfhumu Nungungulu gima kha dzi wonegisa gwago!”

2 Pfhumu Nungungulu a di wudzisa Mosi, khuye: “Ginani u gu nagyo mandzani?” Uye a di hakha, khuye: “I ndronga.” Nungungulu a di khuye: 3“Yi rinye vbavbatshi.” Mosi a di rinya ndronga vbavbatshi, iyo yi di vbindrugedza li khala nyoga. Mosi a di li thava. 4Pfhumu Nungungulu a di embela Mosi, khuye: “Thawuludza mandza yago u mola nyoga khu ngilatunu.” Uye a di thawuludza mandza yaye a yi mola khu ngilatunu, iyo yi di vbindrugedza yi khala gambe ndronga. 5“Gasi va fela gukhodwa gukhavo, Pfhumu Nungungulu a dzi wonegiside gwago, Nungungulu wa vababe vawe, Nungungulu wa Abrahama, Nungungulu wa Isaki ni Nungungulu wa Jakobe.”

6 Pfhumu Nungungulu a di mu embela gambe, khuye: “Vega mandza vbakhanatunu gwago.” Uye a di vega mandza vbakhanatunu, avbo a nga ma dusago, ma diri ni sokono, ma aga kha nga thondrwane.

7 Pfhumu Nungungulu a di ganela, khuye: “Vega gambe mandza vbakhanatunu.” Uye gikhati a nga vegago gambe mandza vbakhanatunu, avbo a nga ma dusago a di ma wona gambe idzosaye ni tshonge nya givili gyaye gyatshavbo.

8“Khu kharati, va gumba khodwa gwago ni gumba pwa lito nya giwoniso nya guphele, va na khodwa khu lito nya giwoniso nya wuvili. 9Va gumba khodwa ga siwoniso sesi sa sivili, va si khodwi gambe ga lito lago, u na rega mati nya tsongo u ma vbaladza mafuni nya gihala; mati u na regago tsongoni ma na vbindrugedza ma khala novba mafuni.”

10Khavbo avbo, Mosi a di embela Pfhumu Nungungulu, khuye: “U na nyi divalela, Pfhumu yangu, eni khandri nyi muthu nya gukodze gu ganela, kholu gukhugela gale ni gale, eni nyi muthu nya gilimiti ni gukangamela gu ganela.”

11 Pfhumu Nungungulu a di mu hakha, khuye: “Gasi khu mani a nga ningago muthu likana. Mwendro khu mani a nga gira gidudu mwendro givbwiri oyu nya guwone mwendro oyu nya gikhumu? Ina khandri Eni Pfhumu Nungungulu, gani? 12Khu guralo, indra olu, Eni nyi na bani nyiri kanani gwago, nyi na gu hevbudza iso u yelago gu ganela.”

13Aholu Mosi a di hakha, khuye: “Nyi divalele, Pfhumu yangu, rumela mumbe u na mu manago guvbindra eni.”

14Khavbo avbo, Pfhumu Nungungulu, a di goroga khu Mosi, a mu embela, khuye: “Ina mwalo Aroni mulevhi a gu ndriyago, gani? Eni nyi ngu dziti nya gukheni a ngu ganela gwadi. Wona gukhuwe a na duga a gu khinga, avbo a na gu wonago a na nengela monyoni gwaye. 15Uwe u na ganela, u vega magana kanani gwaye. Eni nyi na bani nyiri kanani gwago ni gwaye, nyi na mi hevbudza iso mu fanelago gu gira. 16Wulangani gwago a na ganela uye ga vathu a na khala uye likana lago, uwe gwaye u na khala kha nga Nungungulu. 17Khavbo avbo, phara ndronga yeyi mandzani, khiyo u na girago khiyo siwoniso.

Mosi a ngu bwelela tigoni ga Egipito

18Mosi a di duga a bwelela ga Jetro, babe wa mwangadzi waye, aya mu embela, khuye: “Nyi dige nyi hongola, nyi bwelela ga vandriyangu va guromo tigoni ga Egipito, gasi gu ya wona mwendro va nga gu vbanya.”

Jetro a di hakha, khuye: “Indra gwadi khu gurula.”

19 Pfhumu Nungungulu a di embela Mosi tigoni ga Medhiyani, khuye: “Khuga, bwelela tigoni ga Egipito kholu va fude vatshavbo va nga bani va gu vbweta gu gu songa.” 20Khavbo avbo, Mosi a di dzega mwangadzi waye ni sanana saye a va khiledza vbaburutunu, a gu bwelela tigoni ga Egipito. Mosi a di phara ndronga ya Nungungulu mandzani.

21 Pfhumu Nungungulu a di ganela ga Mosi, khuye: “Ndzilani gwago nya gubwelele tigoni ga Egipito, wona siliwugiso nyi vegidego mandzani gwago; u na si gira satshavbo mbeli ga Faro, Eni nyi na bangisa monyo waye.” “Uye kha na diga vathu va duga.” 22Uwe u na embela Faro, khuwe: “Pfhumu Nungungulu wari, khuye: Gyanana gyangu nya matiwula khu Israyeli. 23#Wona gambe: Eks 12:29. Nyi ngu gu embela gukheni diga gyanana gyangu gi duga, gi fela gu ya nyi thumela, aholu uwe u ngu bomba gu gi diga gi duga! Khu guralo, nyi na songa gyanana gyago nya matiwula.”

24Mosi nari vbakari nya ndzila, lizumbotunu, Pfhumu Nungungulu a di mu tela a vbweta gu mu songa. 25Khavbo avbo, Zipora, a di dzega giwindri nya guvbire, a gu pila sutu gyanana gyaye, a gu kuha khuwo mawundru ya Mosi, a ganela khuye: “Avbo gwangu, uwe u mwama nya novba.” 26Khu guralo, Pfhumu Nungungulu, a di mu diga. Khu vbale, Zipora a di mu embela, khuye: “U mwama nya novba,” khu kotani nya wugwera.

27Khavbo avbo, Pfhumu Nungungulu a di embela gambe Aroni, khuye: “Indra u khinga Mosi giwulani.” Uye a di duga aya mu mana gigomoni gya Nungungulu, a mu bhejari. 28Mosi a di embeledzela Aroni magana yatshavbo aya Pfhumu Nungungulu a mu rumidego khayo, ni siwoniso satshavbo esi a nga mu rumago gu gira.

29Mosi ni Aroni va di hongola va ya tombanisa madhota yatshavbo nya sanana sa na Israyeli. 30Aroni a di tivisa magana yatshavbo aya Pfhumu Nungungulu a nga embelago Mosi, aholu Mosi a di gira siliwugiso mbeli ga vathu. 31Vathu va di khodwa. Avo na va pwide nya gupwani Pfhumu Nungungulu holede sanana sa na Israyeli, a gu wona gutshaniseka gwawe, va di noga va mu khozela.

Currently Selected:

Ekisodha 4: BGE2014

Highlight

Copy