Ekisodha 2
2
Guvelegwa gwa Mosi
(Ekisodha 6:20; Mitengo 7:20-21; Vahebheru 11:23)
1Mwama moyo nya lihundzu la Levhi, a di dzega nyamahegyane nya lihundzu la limwedo. 2#Wona gambe: Mit 7:20; Hebh 11:23. Mwangadzi waye a di khura mimba a gu velega gyanana nya gikhwathana; khu gu gi wona gumbura ngudzu, a di gi siha a khala nagyo gipimo nya migima miraru. 3Kha nga a nga bani a si kodzi gu simama gu gi siha matshigu nya gulaphe, a di luga gitataro nya dzimbosi a gi londra khu nyedzi a vega umo gyanana aya gi vega dzitshavani bambe nya tsongo. 4Ndruye nya gyagadzyana wa gyanana a di khala khu hwindzo a gu khedzisela gasi gu wona ginani gi na gu dugelelago. 5Khu gikhati gyogyo, nyamahegyane wa Faro a di relela tsongoni guya hamba, sithumi saye nya sagadzyana na si gu gimbilagimbila bambe nya tsongo. Na wonide gitataro vbakari nya dzitshava, a di ruma githumi guya gi dzega. 6Na gi tude a di wona gyanana na gi gu lila. A di pwela wusiwana gyanana gile, a ganela, khuye: “Gyanana nya Vahebheru!”
7Khavbo avbo, ndruye wa gyanana a di embela nyamahegyane wa Faro, khuye: “U ngu dzina gukhuwe eni nyi ya gu ranela nyamayi moyo nya Muhebheru a gu mamisela gyanana gegi, gani?”
8Nyamahegyane wa Faro a di hakha, khuye: “Indra!” Khu guralo, gyagadzyana gi di tutuma gi ya rana mayi wa gyanana gile. 9Khavbo avbo, nyamahegyane wa Faro a di embela nyamayi, khuye: “Dzega gyanana gegi u nyi dandrisela, eni nyi na gu livba.” Nyamayi a di dzega gyanana aya gi dandrisa. 10#Wona gambe: Mit 7:21. Na gi dandride gyanana, nyamayi a di gi dzega aya gi ningela ga nyamahegyane wa Faro, a nga gi hakhago kha nga gyanana gyaye furi. Uye a di rana gyanana khuye khu Mosi, kholu a di khuye: “Nyi gi duside khu matini.”
Mosi a ngu songa Mugipiti a thavela Medhiyani
(Mitengo 7:23-29; Vahebheru 11:24-27)
11 # Wona gambe: Mit 7:23-29; Hebh 11:24. Ga matshigu yale, Mosi nari khongolo, a di hongola ga vandriyaye, aya wona khu maho yaye gulemela nya mithumo yawe. A di wona moyo nya Mugipiti na gu bayisa moyo nya Muhebheru, a gu ndriyaye. 12A di khedzisa dziphuvbo dzatshavbo a wona nya gukhuye gu mwalo muthu, a di songa Mugipiti a mu futela khu mafu.
13Khu mindru gakone, a di duga gambe, aholu a diya mana Vahebheru vavili na va gu dwana. Mosi a di kawuka oyu a nga bani na ghohede kwawe, khuye: “Khu ginani u vetago ndriyago?” 14Uye a di mu phindrula, khuye: “Khu mani a nga gu vega kha nga muthangeli ni mulamuli vbakari gwathu? Wa gu vbweta gu nyi songa neni kha nga Mugipiti u nga mu songago, gani?” Khavbo avbo, Mosi a di khala hwanga, a pimisa, khuye: “Mahungu yaya khu lisine ma tidwe.”
15 # Wona gambe: Mit 7:29; Hebh 11:27. Avbo Faro a nga pwago mahungu yaya, a di vbweta Mosi gasi gu mu songa; aholu uye a di thava aya khala tigoni ga Medhiyani. Na vbohide iyoyo, a diya khala vbafuvbi ni nambo. 16Muphasi nya mhamba wa Medhiyani a diri ni livbandre na vavili vanyamahegyane, va ngata rega mati va tadza sighowolo gasi gu sedza tshambi wa babe wawe. 17Gu dita vahavisi va ta si tutumisa; khavbo avbo, Mosi a di khuga a si emela, a gu sedza tshambi.
18Gikhati vanyamahegyane va nga bwelelago avbo a nga bani a romo babe wawe Reweli,#2:18 Limbe lina la Reweli, muphasi nya mhamba wa Medhiyani, khu Jetro. uye a di va wudzisa, khuye: “Mu di dzi kodza kharini muhuno mu vbiredzelago gu wuya?”
19Avo va di hakha, khavo: “Mwama moyo nya Mugipiti a di hi emela ga vahavisi, a hi regela mati a bwelo khavbo a sedza mitshambi yathu.”
20Reweli a di va wudzisa, khuye: “Womo hayi uye? Khu ginani mu ngamba mu resani avba mwama yoyo? Indrani mu ya mu rana gasi hita hodza naye.”
21Mosi a di dzumela gu khala ni mwama wule; uye a di ninga Mosi nyamahegyane waye nya gupwani khu Zipora, gu khala mwangadzi waye. 22#Wona gambe: Mit 7:29. Zipora a di velega gyanana nya gikhwathana egi Mosi a nga gi riya lina la Gerisoni, a ganela, khuye: “Nyi muwuyi tigoni momu nya valombo.”
Gufa ga mufumeli wa Egipito
23Hwane nya myaga nya gutale, a difa mufumeli wa Egipito, vathu va na Israyeli, va di tshaniseka wugumbini. Va di lila, dzihuwa nya gutshaniseke gwawe, dzi di gwela kala ga Nungungulu. 24#Wona gambe: Gen 15:13-14.Nungungulu a dipwa gulila gwawe, a dundruga gidzumeledzwano a giridego ni Abrahama, Isaki ni Jakobe. 25Nungungulu a di khedza sanana sa Israyeli, a wona gutshaniseka gwawe.
Currently Selected:
Ekisodha 2: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
