Ekisodha 19
19
III. GIDZUMELEDZWANO GYA SINAYI
(Ekisodha 19:1—24:18)
Nungungulu a ngu ganela ni Mosi gigomoni gya Sinayi
1Khu ngima nya wuraru, hwane nya gu sanana sa Israyeli na si dugide khu tigoni ga Egipito, khu litshigu nya guphele nya ngima yoyo furi, si di vboha giwulani gya Sinayi. 2Na va khugide khu Refidhimi, va di vboha giwulani gya Sinayi, va gu zumba avbovbo, Israyeli a di zumba mbeli nya gigomo.
Pfhumu Nungungulu a ngu tumbisa gidzumeledzwano
3Mosi a di lita kala vbafuvbi ni Nungungulu. Khu mugigomoni Pfhumu Nungungulu a di mu rana, a mu embela, khuye: “U na ganela esi ga nyumba ya Jakobe, u tivisa esi ga sanana sa Israyeli, khuwe: 4Enu mu si wone esi nyi giridego ga Vagipiti, ni edzi nyi mi rwadego khidzo khu dzimbapi nya lighama nyi gu mi wuyisa avbo gwangu. 5Olu mwa gu yingisani lito langu, mu vegisa gidzumeledzwano gyangu, mu na khala thomba yangu vbakari nya mayigo yatshavbo, kholu litigo latshavbo la gu lumba Eni. 6#Wona gambe: Dhet 7:6; 14:2; Tit 2:14; 1 Ped 2:9. Enu mu na khalani litigo nya vaphasi nya mhamba, litigo li agidego. Aya khu magana u na ya embelago sanana sa Israyeli.”
7Mosi a dita ramba madhota nya libandla a gu va embeledzela magana yaya yatshavbo, kha nga idzo Pfhumu Nungungulu a nga mu rumago khidzo. 8Vathu vatshavbo va di hakha khu gumogo, khavo: “Satshavbo esi Pfhumu Nungungulu a ganedego, ethu hi na si thuma.” Mosi a di ya bikela ga Pfhumu Nungungulu magana ya vathu.
Gu dongisela nya gidzumeledzwano
9 Pfhumu Nungungulu a di embela Mosi, khuye: “Wona, Eni nyi nguta nyi ta manana nago ndrani nya lipfhi nya gusivbale, gasi vathu va fela gupwa gikhati nyi na ganelago nago, va fela gu gu tumba gikhati gyatshavbo.” Kholu Mosi a di khade a embeledzela Pfhumu Nungungulu mahungu nya vathu vaye.
10 Pfhumu Nungungulu a di embela gambe Mosi, khuye: “Indra ga vathu u ya va agisa muhuno ni mindru; va na handze guambala gwawe. 11Va na khale na va dzi dongisede litshigu nya wuraru, kholu khu litshigu nya wuraru, Pfhumu Nungungulu a na tshiga na gu wonwa khu vathu vatshavbo vbatshani nya gigomo gya Sinayi. 12Gambe u na vegela vbingano vathu, wu dzundrulugelago gigomo, u va embela, khuwe: Dzi woneleni, mu nga gweli gigomoni, mwendro gu kuha basi dzibambe gakone. Kholu muthu watshavbo a na kuhago gigomo a na songwa. 13Mwalo a na mu kuhago khu mandza, aholu a na ya khu gu pfarwa khu giwindri, mwendro gu hekhwa khu matshari. Gani girengo, gani muthu kha na vbanya. Na gu wombwa pundru#19:13 Pundru a diri keho, khu Gihebheru pwani Yobeli, khavbo litago khago lina nya gupwani “Jubileu.” Wona Leh 25: 9-10, kholu gu di wombwa pundru gasi gu tivisa mwaga nya wuhigo wa Pfhumu. khu gulaphisa vathu va na gwela gigomoni.”
14Khavbo avbo, Mosi a di tshiga khu gigomoni aya ga vathu. Uye a di agisa vathu, avo va di ya handza dzingandzu dzawe. 15A di embela vathu, khuye: “Dzi dongiseleni litshigu nya wuraru. Vbayegani malawu, mu nga tshangani ni nyamayi.”#19:15 Guvbayega malawu nayo nya gu dzi agise wu nga bani wu gurumedza muthu watshavbo gasi gu dzi kodza gu hidzimela vbamiphasotunu, mwendro thumoni wu tidwago kha nga thumo wu agidego, nya nga nyimbi.
Nungungulu a ngu dzi wonegisa Gigomoni ga Sinayi
(Dhewuteronome 4:10-14; 5:1-5)
16 # Wona gambe: Gutu 4:5. Khu litshigu nya wuraru, ni mambagugya, gu di dzuma mabara ni gulasa, vbatshani nya gigomo gu fenengedzwa khu lipfhi nya gusivbale, ni gudzuma nya gukhongolo nya pundru. Vathu vatshavbo va nga bani va romo lizumboni va di ndrendremela. 17Mosi a di dusa vathu khu lizumboni va hongola ga Nungungulu va ya emisedwa vbavbatshi nya gigomo. 18Gigomo gyatshavbo gya Sinayi gi di fenengedzwa khu wutshi, kholu Pfhumu Nungungulu a di tshiga avbo vbakari nya nilo. Wutshi wakone wu di lita wu tuvigela vbatshani kha nga wa vbagikhotunu, ni gigomo gyatshavbo gi di ndrendremela ngudzu. 19Pundru wu di engedzelana gu dzuma wu dzungurula khu tshivba. Mosi a di ganela; Nungungulu a hakha khu ndrani nya libara.
20 Pfhumu Nungungulu a di tshiga vbatshani nya gigomo gya Sinayi, Pfhumu Nungungulu a di rana khu tshokatunu nya gigomo, Mosi a di lita. 21Pfhumu Nungungulu a di embela Mosi, khuye: “Relela u ya laya vathu gukhuwe va nga hidzimeli va tsemakanya vbingano khavo va guta wona Pfhumu Nungungulu; gu ngafa vathu nya gutale ngudzu vbakari gwawe. 22#Wona gambe: Hebh 12:18-20. Ambari vaphasi nya mhamba navo va hidzimelago ga Pfhumu Nungungulu, va na phele khu gu dzi agisa gasi Pfhumu Nungungulu a si va songi.”
23Mosi a di ganela ga Pfhumu Nungungulu, khuye: “Vathu kha va dzi kodzi gu lita gigomoni ga Sinayi, kholu uwe u hi layide khu tshivba, khuwe: Vega mivbingano yi dzuwulugela gigomo, mu gi agisa.”
24 Pfhumu Nungungulu a di khuye: “Tshiga. U na lita gambe uwe gumogo ni Aroni. Aholu vaphasi nya mhamba ni vathu va nga tutumeli gu lita ga Pfhumu Nungungulu, gasi nyi si va songi.”
25Khu guralo, Mosi a di relela a hongola ga vathu aya va embeledzela satshavbo sesi.
Currently Selected:
Ekisodha 19: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
