Ekisodha 18

Jetro a nguta manana ni Mosi

1Jetro, muphasi nya mhamba wa Medhiyani, sade wa Mosi, a dipwa silo satshavbo esi Nungungulu a giridego ga Mosi ni ga vathu vaye va na Israyeli; edzi Pfhumu Nungungulu a dusidego khidzo Israyeli khu tigoni ga Egipito.

2Jetro, sade wa Mosi, a di dzega Zipora, ngadza Mosi, a nga bani a mu rumede gu ya khala gaya gwawe, 3gumogo ni sanana saye sa sivili, gimwegyo lina laye nya gupwani khu Gerisoni, kholu a di khuye: “Eni nyi mu luveli tigoni ga vane,” 4ni gimbe nya gupwani khu Eliyezeri, kholu a di khuye: “Nungungulu wa babe wangu a nyi phaside a nyi vbulugiside gu songwa khu litshari la Faro.”

5Jetro, sade wa Mosi, ni mwangadzi wa Mosi ni sanana saye, va di endrela Mosi mugiwulani a nga bani a ghovide umo, gigomoni ga Nungungulu. 6Uye a di embela Mosi, khuye: “Eni kheni sade wago Jetro, nya guta gwago gumogo ni mwangadzi wago ni sanana sago sa sivili.”

7Khavbo avbo, Mosi a di duga a khinga sade waye, a khidzima a mu bhejari. Va ambisana mahungu khu gurula, va bela tshatshani gwa Mosi. 8Mosi a di embeledzela sade waye satshavbo esi Pfhumu Nungungulu a nga girago ga Faro ni Vagipiti khu kotani ya Israyeli, sigaradzo satshavbo va si manidego ndzilani, edzi Pfhumu Nungungulu a va vbulugisidego khidzo.

9Jetro a di nengela khu satshavbo esi nya sadi Pfhumu Nungungulu a giredego va na Israyeli, khu gu va tshula mandzani ga Vagipiti. 10Jetro a di khuye: “A na rungudzwe Pfhumu Nungungulu a mi vbulugisidego mandzani ga Vagipiti ni mandzani ga Faro, Uye a tshudego vathu mandzani ga Vagipiti. 11Olu nyi ngu dziti gukheni Pfhumu Nungungulu khongolo guvbindra vanungungulu vatshavbo, kholu a va phalalegiside ga esi va nga bani va dzi gugumugisa khiso ni dzihanyi.” 12Khavbo avbo, Jetro, sade wa Mosi, a di ningela miphaso nya guvbiswe ni dzimhamba ga Nungungulu. Aroni ni madhota yatshavbo ya Israyeli ya dita hodza gumogo ni sade wa Mosi mbeli ga Nungungulu.

Mosi a ngu hatha valamuli

(Mitengo 11:14-17; Dhewuteronome 1:9-18)

13Khu mindru gakone, Mosi a di khala phathani a lamula vathu. Vathu va di ema mbeli ga Mosi gukhugela ni dzimindru kala gupfolani na lidambo. 14Sade wa Mosi na wonide satshavbo iso a nga bani a gu gira ga vathu, a di mu wudzisa, khuye: “Ginani u girago ga vathu, khu ginani vathu va emago mbeli gwago gukhugela dzimindrudzile kala gupfolani nya lidambo?”

15Khavbo avbo, Mosi a di hakha sade waye, khuye: “Kholu vathu vava va guta gwangu gu ta wudzisa Nungungulu.” 16Muthu a gu bani nari ni mahungu ni muthu kwawe, va guta gwangu nyi ta va lamula, nyi va tivisa sileletelo sa Nungungulu ni milayo yaye.

17Sade wa Mosi a di mu embela, khuye: “Khandridzo edzi u girago. 18Kholu u na garala uwe, ni vathu vava u gu navo va na garala navo, kholu thumo wowu wu lemede ngudzu gu wu rwala uwe wenga. 19Olu, nyi yingise; nyi na gu ninga wusingalagadzi, Nungungulu a na khale ni uwe! Uwe u na khala muemeli nya vathu mbeli ga Nungungulu, u bikela mahungu yawe ga Nungungulu.” 20U na va hevbudza sileletelo ni milayo, u va nonedza ndzila va fanedego gu gimbila khiyo, ni mithumo va yelago gu yi thuma. 21Uwe hatha vbakari nya vathu vatshavbo, vama nya gukari nya vadi ni lisine, va thavago Nungungulu, vama va tumbegidego, va si dzumeligo gurengeledwa, u va vega kha nga vathangeli nya likhumi mazana, nya lizana, nya livbandre magumi ni nya likhumi. 22Avo va na lamula vathu vava gikhati gyatshavbo. Mahungu yale nya makhongolo, va na ma tisa avbo gwago, aholu aya mambe yatshavbo nya madugwana va na ma vbedza avo, kharati u na vbungula rwalo wago, avo va na hengela nago gu wu rwala. 23Wa gu gira kharati, nu gu leletedwa khu Nungungulu, uwe u na mana tshivba nya guthume u ya mbeli, gambe vathu vava va na bwelela magaya gwawe na va manide gurula.

24Mosi a di yingisa magana ya sade waye, a gu gira satshavbo esi a nga embedwago khuye. 25Mosi a di hatha vbakari nya vathu vatshavbo va na Israyeli, vama nya vadi a va emisa mbeli nya vathu kha nga vathangeli nya likhumi mazana, nya lizana, nya livbandre magumi ni nya likhumi. 26Avo va di lamula vathu gikhati gyatshavbo; mahungu nya gugaradze va di ma yisa ga Mosi, aholu aya mambe mahungu yatshavbo nya guvbevbuge va di ma vbedza avo.

27Khavbo avbo, Mosi a di vbanganana ni sade waye, Jetro a di bwelela a hongola tigoni gwaye.

Currently Selected:

Ekisodha 18: BGE2014

Highlight

Copy